ព័ត៌មានជាតិ

៧ ខែ ឆ្នាំ ២០២២ រថយន្តអគ្គិសនីចុះបញ្ជីមានជាង ៣០០ គ្រឿង

បានផុស

២ years មុន

នៅ

ថ្ងៃពុធ ១៤ កញ្ញា ២០២២

ដោយ

រដ្ឋមន្រ្តីក្រសួងសាធារណការនិងដឹកជញ្ជូនបានបញ្ជាក់ថា រយៈពេល ៧ ខែ ឆ្នាំ ២០២២ មានរថយន្តអគ្គិសនីចំនួន ៣០៥ គ្រឿងបានចុះបញ្ជីនៅក្រសួងកើនឡើងជាង ១៨០០ភាគរយ បើប្រៀបធៀបឆ្នាំ ២០២១ មានតែ ១៦ គ្រឿងប៉ុណ្ណោះ។

លោករដ្ឋមន្រ្តីថ្លែងក្នុងពិធីសម្ពោធស្ថានីយបញ្ចូលថាមពលយានយន្តអគ្គិសនី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាបនៅថ្ងៃនេះ ពលរដ្ឋចាប់ផ្តើមយល់ដឹងពីការប្រើប្រាស់រថយន្តអគ្គិសនីមានការកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកទេសរដ្ឋមន្ត្រី ស៊ុន ចាន់ថុល បានលើកឡើងថា រថយន្តដែលដំណើរការដោយប្រេងឥន្ធនៈមានអត្រាពន្ធនាំចូលប្រហែល ១២៣ ភាគរយ ខណៈរថយន្តអគ្គិសនីអត្រាពន្ធតែជាង ៦០ ភាគរយ គឺខុសគ្នាជិតពាក់កណ្តាល។ ការប្រើប្រាស់អគ្គិសនីមានការចំណាយថែទាំថោកជាង ៣ ដងប្រៀបធៀបរថយន្តដំណើរការដោយឥន្ធនៈ។

លោកទេសរដ្ឋមន្ត្រីបានបន្តថា ការប្រើប្រាស់រថយន្តអគ្គិសនីមានការសន្សំសំចៃលើការថែទាំដោយសារគ្រឿងបន្លាស់តិចជាង ដូច្នេះការចំណាយជួសជុលក៏អស់តិចជាង។

បច្ចុប្បន្ននេះ ក្រសួងសាធារណការបានដំឡើងស្ថានីយបញ្ចូលថាមពលយានយន្តអគ្គិសនីចំនួន ៣ កន្លែង គឺនៅទីស្តីការក្រសួងសាធារណការ ខេត្តព្រះសីហនុ ខេត្តសៀមរាប និងស្ថានីយទី ៤ នឹងចាប់ផ្តើមដំឡើងនៅខេត្តបាត់ដំបង។

បើតាមលោករដ្ឋមន្រ្តី ស៊ុន ចាន់ថុល ក្រសួងសាធារណការបានបញ្ជាទិញរថយន្តអគ្គិសនីចំនួន ៤ គ្រឿង និងវិស័យឯកជនបានផ្តល់ចំនួន ៣ គ្រឿង សម្រាប់ប្រើប្រាស់សម្រាប់មន្រ្តីចុះពិនិត្យការដ្ឋានសាងសង់ផ្លូវផ្សេងៗ៕