​មន្ត្រីសុខាភិបាល​ប្រាប់ពលរដ្ឋកុំឲ្យព្រួយបារម្ភ​ឱសថចរាចរក្នុងស្រុក​ថាគ្មានគុណភាព​

ប្រធាននាយកដ្ឋានឱសថ ចំណីអាហារ បរិក្ខាពេទ្យ និងគ្រឿងសំអាង ​លោក ហេង ប៊ុនគៀត ​បាន​ប្រាប់​កុំឱ្យប្រជាពលរដ្ឋព្រួយបារម្ភអំពីឱសថដែលចរាចរ​ក្នុងស្រុកថាគ្មានគុណភាព។

លោក ហេង ប៊ុនគៀត លើកឡើងក្នុងសន្និសីទសារព័ត៌មាន ស្ដីពី “សមិទ្ធផលសម្រេច​បានរយៈ​ពេល​ ៥ឆ្នាំកន្លងមក របស់ក្រសួងសុខាភិបាល” នៅថ្ងៃទី ១៥ ខែកញ្ញា ២០២២នេះថា ​ឱសថមុននឹង​ចរាចរណ៍នៅក្នុងប្រទេស​គឺត្រូវតែ​​មានការចុះបញ្ជិការ​ឱ្យបាន១០០% មុននឹងដាក់លក់​នៅលើ​ទីផ្សារ។

លោកបញ្ជាក់ថា ​«សូមកុំគិតថា ឱសថកម្ពុជាអន់ ឬប្រទេសផ្សេងល្បី​គឺសុទ្ធតែមានគុណភាព​ទាំងអស់មុននឹងដាក់លក់នៅលើទីផ្សារ។ ពីព្រោះយើងមើលតាំងពីការ​ចុះបញ្ជិការ​មើលតាំង​ពីរោងចក្រផលិត ផលិតកម្ម និងគុណភាពរហូតដល់ដាក់លកលើទីផ្សារ​គឺត្រូវតែមានភាពដូចគ្នា​ទៅនឹងឯកសារដើម»។

មន្ត្រីនាយកដ្ឋានឱសថ ចំណីអាហារ បរិក្ខាពេទ្យ និងគ្រឿងសំអាងរូបនេះបញ្ជាក់ថា ​ក្រសួងក៏បាន​យកផលិតផល​ទៅពិនិត្យគុណភាពឡើងវិញ​ក្រោយពីដាក់លក់​នៅលើទីផ្សារ​ដើម្បីតាមដានប្រសិទ្ធិភាពឱសថដែលក្រសួងតែងតែធ្វើជាប្រចាំ៕

អត្ថបទ៖ ឡេង ដេត