ព័ត៌មានជាតិ

ព្រមានដកអភិបាលខេត្ត មេប៉ូលិសខេត្តក្រុង បើបង្ក្រាបល្បែងខុសច្បាប់មិនបាន

បានផុស

២ years មុន

នៅ

ថ្ងៃសៅរ៍ ១៧ កញ្ញា ២០២២

ដោយ

ប្រមុខរដ្ឋាភិបាលសម្ដេច តេជោ ហ៊ុន សែន បានចេញសារឲ្យបង្ក្រាបល្បែងស៊ីសងខុសច្បាប់ ហើយព្រមានមិនញញើតនឹងដកមន្រ្តីថ្នាក់ដឹកនាំខេត្តមិនថាជាចៅហ្វាយខេត្ត មេប៉ូលិសខេត្តក្រុង បើបង្ក្រាបល្បែងស៊ីសងមិនបានក្នុងមូលដ្ឋានរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោបានបញ្ជាក់ថា មិនបន្តឲ្យសភាពការណ៍ល្បែងខុសច្បាប់កើតឡើងបែបអនាធិបតេយ្យតទៅទៀតទេ។ សម្តេចប្រមុខរដ្ឋាភិបាលបានលើកឡើងថា ល្បែងខុសច្បាប់កើតមាននៅក្នុងមូលដ្ឋានខេត្តក្រុង មិនមែនអាជ្ញាធរមិនដឹងនោះទេ ក្រែងតែអស់លោកមិនធ្វើ។ ទីតាំងបនល្បែងខុសច្បាប់បានរីករាលដល់ហាងគុយទាវ ហាងកាហ្វេ ហើយសម្តេចក្រើនរំលឹកឲ្យម្ចាស់អាជីវកម្មហាងគុយទាវ ហាងកាហ្វេ ត្រូវតែបញ្ឈប់ជាបន្ទាន់ចៀសវាងការដកអាជ្ញាប័ណ្ណឈានដល់ការបិទទ្វារ ដែលនេះមិនមែនបទបញ្ជាឲ្យប៉ះពាល់អាជីវកម្ម គឺដើម្បីបង្ការកើតបញ្ហាអសន្តិសុខចោរលួចចោរប្លន់ដោយសារចាញ់ល្បែង។

ជាមួយគ្នានេះ សម្តេចក្រើនរំលឹកឲ្យអាជ្ញាធរខេត្ត ក្រុង ស្រុកយកការទទួលខុសត្រូវ ក្នុងឋានៈជាបញ្ជាឯកភាពលើកម្លាំងប្រដាប់អាវុទ្ធ ត្រូវធ្វើឲ្យច្បាស់ ធ្វើឲ្យដិតដល់ធ្វើឲ្យដាច់ណាត់ កុំឲ្យល្បែងខុសច្បាប់គ្រប់ប្រភេទរួមទាំងកន្ទុយលេខកើតមានក្នុងមូលដ្ឋាន ត្រូវតែបង្ក្រាបឲ្យដូចភ្លៀងរលឹមកុំឲ្យកើតមានជាដាច់ខាត៕