សម្ដេច ហ៊ុន សែន ព្រមានចាប់ខ្លួនមេបក្សនយោបាយម្នាក់នៅកម្ពុជា

សម្ដេចនាយករដ្ឋមន្រ្តីកម្ពុជា បានព្រមានចាប់ខ្លួនលោក ចាន់ យ៉េត ប្រធានគណបក្សនគរប្រជាធិបតេយ្យ ដែលទើបបញ្ចប់មុខតំណែង ពីសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលមានឋានៈស្មើ ទេសរដ្ឋមន្រ្តី។

មានប្រសាសន៍ផ្សាយផ្ទាល់ពិសេស នាព្រឹកថ្ងៃអង្គារ ទី២៩ ខែធ្នូ ឆ្នាំ២០២០នេះ ប្រមុខរាជរដ្ឋាភិបាលកម្ពុជា សម្ដេច​តេជោ បានថ្លែងថា លោក ចាន់ យ៉េត បានដើរធ្វើសកម្មភាពបោកប្រាស់មនុស្សជាច្រើនពាក់ព័ន្ឋនឹងករណីដីធ្លី ព្រមទាំងករណីមិនប្រក្រតីមួយចំនួនទៀត។

សម្ដេចមានប្រសាសន៍លើកឡើងថា លោក ចាន់ យ៉េត និងបក្ខពួក បានធ្វើឱ្យមានបញ្ហាលើករណីរឿងដីធ្លីប្រមាណ៣០០ហិកតា នៅបឹងជង្រុក ក្នុងស្រុកម៉ាឡៃ ខេត្តបន្ទាយមានជ័យ។

សម្ដេចនាយករដ្ឋមន្រ្តីកម្ពុជា បានព្រមានថា លោក ចាន់ យ៉េត ព្រមទាំងបក្ខពួក នឹងត្រូវចាប់ខ្លួន ប្រសិនបើមិនដកខ្លួនចេញពីករណីដីធ្លី និងករណីបើោកប្រាស់ផ្សេងទៀត។

សូមបញ្ជាក់ថា លោក ចាន់ យ៉េត ប្រធានគណបក្សនគរប្រជាធិបតេយ្យ ត្រូវបាន ព្រះមហាក្សត្រកម្ពុជា ចេញព្រះរាជក្រឹត្យបញ្ចប់មុខ ពីសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលមានឋានៈស្មើ ទេសរដ្ឋមន្រ្តី កាលពីថ្ងៃទី០៩ ខែធ្នូ ឆ្នាំ២០២០ ៕