អភិបាលខេត្តព្រះសីហនុដាក់ចេញវិធានការបង្រ្កាបល្បែងស៊ីសងគ្រប់ប្រភេទឱ្យមានប្រសិទ្ធភាព

លោកគួច ចំរើន អភិបាលខេត្តព្រះសីហនុបានដាក់ចេញនូវវិធានការ បង្រ្កាបល្បែងស៊ីសងគ្រប់ប្រភេទនៅក្នុងខេត្តឱ្យមាន​ប្រសិទ្ធភាព ដើម្បីការពារនិងធានាឱ្យបាននូវភូមិឃុំមានសុវត្តិភាព។

នៅក្នុងកិច្ចប្រជុំគណៈបញ្ជាកា​រ​ឯក​​ភាពរដ្ឋបាល​ខេត្តព្រះ​សីហនុកាលពីរសៀលថ្ងៃទី១៧កញ្ញាលោក គួច ចំរើនបានមានប្រសាសន៍ថា កិច្ចប្រជុំថ្ងៃនេះគឺដើម្បីត្រួតពិនិត្យដកបទពិសោធន៍នៃការចុះអនុវត្ត​ករណីការជួញដូរ​មនុស្សជួញ​ដូរព​ល​កម្ម និងអាជីវកម្មផ្លូវភេទ និងអនុវត្តតាមបទបញ្ជាដ៏ខ្ពង់ខ្ពស់របស់ សម្តេចតេជោ នាយករដ្ឋមន្រ្តី តាមរយៈ​សារសំឡេង ឱ្យចុះបង្រ្កាប និងបិទទីតាំងល្បែងស៊ីសងគ្រប់ប្រភេទនៅទូទាំងប្រទេស។

លោកអភិបាលខេត្តបានបន្តថា« ដូច្នេះសូមឱ្យអាជ្ញាធរគ្រប់លំដាប់ថ្នាក់ ត្រូវស្តាប់សារសំឡេងរបស់ សម្តេចតេជោ ឱ្យបានគ្រប់ៗគ្នា និងត្រូវអនុវត្តឱ្យបានម៉ឺងមាត់ តាមបទបញ្ជានេះ។ពាក់ព័ន្ធនឹងការបង្រ្កាបល្បែងស៊ីសងគ្រប់ប្រភេទនេះ ស្នើ​ឱ្យ​​​គ​ណៈបញ្ជាការឯកភាពរដ្ឋបាលក្រុង-ស្រុក  ត្រូវចុះធ្វើការអប់រំ វិធានការរដ្ឋបាល និងធ្វើកិច្ចសន្យា​បិ​ទ​ទីតាំងល្បែងស៊ីសងគ្រប់ប្រភេទជាដាច់ខាត ករណីរឹងរូស គណៈបញ្ជាការឯកភាពក្រុង-ស្រុក ត្រូវសួ​រ​យោ​​បល់ព្រះរាជអាជ្ញា និងមេធាវីប្រចាំរដ្ឋបាលខេត្តព្រះសីហនុជាមុនដើម្បីចាត់វិធានការតាមផ្លូ​វច្បា​ប់»។

បន្ទាប់ពីមានការពិភាក្សា  និងផ្លាស់ប្តូរយោបល់គ្នាយ៉ាងផុលផុស លោកអភិបាលខេត្តបាន  សម្រេចដាក់ចេ​ញនូវវិ​ធា​ន​កា​រដូចខាងក្រោម៖

– អ​ភិ​​បាលក្រុង-ស្រុក អធិការ និងមេបញ្ជាការមូលដ្ឋានកងរាជអាវុធហត្ថក្រុង-ស្រុក  ត្រូវដឹកនាំកិច្ច​ប្រ​ជុំ​នៅ​ល្ងា​ចនេះនិ​ងត្រូវចុះអនុវត្តបិទទីតាំងឡូតូនិងល្បែងស៊ីសងគ្រប់ប្រភេទទាំងអស់ នៅថ្ងៃទី១៨ ខែ​ក​ញ្ញា ឆ្នាំ២០២២ ដោយត្រូវធ្វើកំណត់ហេតុឱ្យបានច្បាស់លាស់ រួចត្រូវបូកសរុបរបាយការណ៍ជូនរដ្ឋ​បា​លខេ​ត្តនៅពេលល្ងាច ថ្ងៃដដែល និងថ្ងៃបន្តបន្ទាប់។

– មុនពេលចាត់វិធានការផ្លូវច្បាប់លើទីតាំងដែលរឹងរូស អភិបាលក្រុង-ស្រុក ត្រូវទូរស័ព្ទដោយផ្ទា​ល់ទៅ​​ព្រះ​រាជអាជ្ញា  ដើម្បីសម្របសម្រួលនីតិវិធី។

– នៅក្នុងតារាងតាមដានប្រតិបត្តិការប្រយុទ្ធប្រឆាំងគ្រប់ទម្រង់ ត្រូវរៀបចំ ១.លេខរៀង, ២.លេខកូដ, ៣.កាលបរិច្ឆេទ,៤.ប្រភព, ៥.ទីតាំង, ៦.អាសយដ្ឋាន, ៧.ក្រុមប្រតិបត្តិការ, ៨. អយ្យការដឹកនាំនីតិវិធី, ៩.កាលបរិច្ឆេទចាប់ផ្តើមប្រតិបត្តិការ និងបញ្ចប់ប្រតិបត្តិការ, ១០.កម្មវត្ថុបណ្តឹង ១១.លទ្ធផលនៃការ​ស្រា​វជ្រា​វ និង១២.ផ្សេងៗ។ ករណីមានបទល្មើសត្រូវបញ្ជាក់អំពីជនរងគ្រោះ និងជនសង្ស័យដែ​លត្រូ​វផ្ត​ន្ទាទោស។

– ចំពោះការចុះប្រតិបត្តិការការងារតាមទីតាំងនីមួយៗ  មន្រ្តីនគរបាលយុត្តិធម៌  ជាអ្នកធ្វើកំណត់ហេតុ    និង​ជាអ្នកឆែកឆេរ ទីតាំង និងមនុស្ស ។

– ពេលក្រុមការងារចុះអនុវត្ត ប្រសិនបើរកឃើញថា បង្ខាំងឱ្យធ្វើការ  ត្រូវពិន័យ  ២.៦២០.០០០រៀល និង​បង្ខំធ្វើការលើសម៉ោង ត្រូវពិន័យ ១.៦៨០.០០០រៀល តាមច្បាប់ស្តីពីការងារ។

– រៀបចំក្រុមការងារឱ្យបានច្បាស់លាស់៖ ក្រុមទី១.ក្រុមចុះប្រតិបត្តិការ,ក្រុមទី២.ក្រុមត្រួតពិនិត្យ​កាមេ​រ៉ាសុ​វត្ថិភាពក្រុមទី៣.ក្រុមត្រួតពិនិត្យផលនៃបទល្មើស ក្រុមទី៤.ក្រុមធ្វើកំណត់ហេតុ និងរបា​យកា​រ​ណ៍​។ ការចុះប្រតិបត្តិការលើកក្រោយនឹងប្រគល់ភារកិច្ចជូនអភិបាលរងខេត្ត០៤រូបជាអ្នកដឹកនាំ។ 

– កម្លាំងកងរាជអាវុធហត្ថជាអ្នកទទួលខុសត្រូវត្រួតពិនិត្យ ជុំវិញទីតាំងចុះប្រតិបត្តិការ ។-កិច្ចប្រតិបត្តិការលើកក្រោយ ត្រូវមានក្រុមឈុតខ្មៅមួយក្រុម ចាំជួយគាំទ្រ មានរថយន្តពន្លត់អគ្គីភ័យ និង​រថយន្តសង្គ្រោះបន្ទាន់។

-ស្នើធ្វើរបាយការណ៍បញ្ចប់ប្រតិបត្តិការឆែកឆេរអគារ ឆាងឆឹង ដើម្បីស្នើសុំមតិដឹកនាំពី សម្តេចក្រ​ឡា​ហោម ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

-រាល់ការចុះប្រតិបត្តិការ ស្នើ ឱ្យមានការសម្របសម្រួលនីតិវិធី ដោយព្រះរាជអាជ្ញា  ដែលមានក្រ​ឡា​បញ្ជី​ជា​អ្នកធ្វើកំណត់ហេតុនិងត្រូវកំណត់ទីតាំងអាជីវកម្មមានច្បាប់ និងអត់ច្បាប់ក្នុងតារាងតាមដានប្រតិបត្តិការ ជាមុន៕ សំអឿន