រដ្ឋមន្ត្រីកសិកម្ម​ស្នើសុំការអន្តរាគមន៍ពី​សម្ដេច ស ខេង ទប់ស្កាត់ការនាំចេញជ័រកៅស៊ូ មិនទាន់កែច្នៃទៅបរទេស

លោក វេង សាខុន ​រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ បានស្នើសុំការអន្តរាគមន៍​ពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការទប់ស្កាត់​ការនាំចេញជ័រកៅស៊ូ និងឈើកៅស៊ូមិនទាន់កែច្នៃទៅបរទេស។​

សំណើនេះកើតមានឡើង បន្ទាប់ពីក្រសួងកសិកម្មរកឃើញថា សកម្មភាពអនាធិបតេយ្យរបស់ឈ្មួញ​ដើរប្រមូលទិញជ័រកៅស៊ូ និងឈើកៅស៊ូមិនទាន់កែច្នៃនាំចេញទៅបរទេស​នៅតែកើតមានឡើង​ដែលផ្ទុយនឹងច្បាប់​ហាមដាច់ខាត​មិនអនុញ្ញាតឱ្យមានការនាំចេញជ័រកៅស៊ូ និងឈើកៅស៊ូមិនទាន់កែច្នៃទៅបរទេសនោះឡើយ។

​ក្រសួងកសិកម្មបញ្ជាក់ថា «ការចរាចរនាំចេញជ័រកៅស៊ូ និងឈើកៅស៊ូមិនទាន់កែច្នៃទៅបរទេស នៅតែបន្តមានជាហូរហែធ្វើឱ្យសមាគមកៅស៊ូ រោងចក្រ និងសិប្បកម្មច្នៃកៅស៊ូក្នុងស្រុក ខ្វះវត្ថុ​ធាតុដើមសម្រាប់កែច្នៃប្រឈមនឹងការបិទទ្វារ​ព្រមទាំងបាត់បង់ចំណូលពន្ធរដ្ឋពីការនាំចេញ​ជ័រកៅស៊ូ និងឈើកៅស៊ូ និងបាត់បង់ការងាររបស់ប្រជាពលរដ្ឋផងដែរ»។

ចំពោះមុខដើម្បីទប់ស្កាត់ការនាំចេញជ័រកៅស៊ូ និងឈើកៅស៊ូ មិនទាន់កែច្នៃទៅបរទេស ដើម្បីជួយដល់សមគមកៅស៊ូ រោងចក្រ និងសិប្បកម្មកែច្នៃកៅស៊ូក្នុងស្រុក ព្រមទាំងបង្កើត​ការងារដល់ប្រជាពលរដ្ឋ និងបង្កើនចំណូលដល់ថវិកាជាតិ ក្រសួងកសិកម្ម ស្នើសម្ដេចក្រឡាហោម ស ខេង ជួយអន្តរាគមន៍ទៅរដ្ឋបាលខេត្ត និងកងកម្លាំងមានសមត្ថកិច្ច ពង្រឹងវិធានការទប់​ស្កាត់ការ​នាំចេញជ័រកៅស៊ូ និងឈើកៅស៊ូមិនទាន់កែច្នៃទៅបរទេស៕

លិខិតស្នើសុំទៅសម្ដេចក្រឡាហោម ស ខេង ខាងក្រោម៖

អត្ថបទ៖ ឡេង ដេត