​ក្រសួងកិច្ចការនារីអនុវត្តយុទ្ធសាស្ត្រ​សមភាពយេនឌ័រ​ ដើម្បីឲ្យតួនាទី​ស្ត្រីចេះបត់បែន​ក្នុងសង្គម​

​លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានថ្លែង​ក្នុងសន្និសីទសារព័ត៌មាន​រយៈពេល ៥ ឆ្នាំ របស់ក្រសួងកិច្ចការនារី នៅថ្ងៃទី ២១ ខែកញ្ញា ឆ្នាំ ២០២២ នេះថា ​យុទ្ធសាស្ត្រសមភាពយេនឌ័រ​មិនអាចពឹងផ្អែកទៅលើតែ​ប្រពៃណី​និងទំនៀមទម្លាប់ដែលសង្គមមួយ​ធ្លាប់ធ្វើនោះទេ។

លោកស្រី អ៊ឹង កន្ថាផាវី បានបញ្ជាក់ថា​ យុទ្ធសាស្ត្រនេះវិវត្តជាមួយសង្គម​ ពេលណាសង្គមវិវត្តទៅមុខ យុទ្ធសាស្ត្រត្រូវវិវត្ត​ទៅមុខ​ដូចសង្គម​ ដើម្បីឱ្យស៊ីសង្វាក់ជាមួយសង្គម។​

​បើតាមរដ្ឋមន្ត្រីរូបនេះ សង្គមខ្មែរ និងនៅលើពិភពលោក តួនាទីរបស់ស្ត្រីបានវិវត្ត ហើយស្ត្រី​បត់បែន​ទៅតាមកាលៈ​ទេសៈនៃសង្គម ដូច្នេះបុរសក៏ផ្លាស់ប្ដូរតួនាទីដែរ ដើម្បីឱ្យអ្នកទាំងពីរ​ចាប់ដៃគ្នា​ ដើម្បី​ឱ្យសង្គមរីកចម្រើន។

លោកស្រី អ៊ឹង កន្ថាផាវី ​បន្តថា យុទ្ធសាស្ត្រសមភាពយេនឌ័រ​គឺចង់ប្រែក្លាយ​ស្ត្រី​ដែលគេធ្លាប់​ប្រៀបធៀបទៅក្រណាត់ស ​ចង់ឱ្យគាត់​ក្លាយទៅជាធនធាន​ដែលនៅតែមាន​តម្លៃនៅក្នុងសង្គម។ ដោយបានរៀបចំយុទ្ធសាស្ត្រនារីរតនៈថា ស្ត្រីជាត្បូង ​ដោយចង់ប្រែនិយមន័យពីក្រណាត់ស​ទៅជាត្បូងដែលមានតម្លៃ ខណៈបុរសជាមាស។

លោកស្រី អ៊ឹង កន្ថាផាវី «យើងចង់ឱ្យស្ត្រី និងបុរសមានតម្លៃដូចគ្នា​ ដើរជាមួយគ្នាទៅមុខ ​ជាដៃគូដែលស្មើភាព អញ្ចឹង​ដើម្បីឈានទៅគោលដៅហ្នឹង អ្វីដែលយើងខ្ញុំបានធ្វើកន្លងមក​មានការងារបញ្ជ្រាបយេនឌ័រទៅក្នុងគោលនយោបាយ​របស់រាជរដ្ឋាភិបាល និងគោលនយោបាយ​តាមវិស័យ»។

​ម្យ៉ាងទៀត​ការទប់ស្កាត់អំពើហិង្សាលើស្ត្រី និងអភិបាលកិច្ច​នារី ព្រមទាំងសេដ្ឋកិច្ចដែលជាអំណាច​មួយ​ដែលស្ត្រី​ក្លាយជាអ្នកមានឯករាជ្យភាព ខណៈក្រសួងកិច្ចការនារីកំពុងពង្រឹងលើចំណុចនេះ​។

លោកស្រី គឹម ស៊ីផាត់ ​រដ្ឋលេខាធិការក្រសួងកិច្ចការនារី បញ្ជាក់ថា ក្រសួងបានរៀបចំគោលនយោបាយសមភាព​យេនឌ័រ​សម្រាប់អនុវត្តទូទាំងប្រទេស ខណៈគោលនយោបាយនេះ បានដល់សេចក្ដីព្រៀងចុងក្រោយ ហើយត្រៀមសុំការអនុម័តពីថ្នាក់ដឹកនាំរាជរដ្ឋាភិបាលនៅដើមឆ្នាំក្រោយ៕