រដ្ឋបាលខេត្តកំពង់ធំ ដាក់វិធានការឱ្យអាហារដ្ឋាន និងហាងកាហ្វេបញ្ឈប់ល្បែងស៊ីសងជាបន្ទាន់

បើតាមសេចក្ដីជូនដំណឹង របស់រដ្ឋបាលខេត្តកំពង់ធំ ស្ដីពីវិធានការបង្ក្រាបការលេងល្បែងស៊ីសង ដែលចេញផ្សាយនាថ្ងៃទី២១ ខែកញ្ញា ឆ្នាំ២០២២។ រដ្ឋបាលខេត្តកំពង់ធំ ស្នើឱ្យប្រជាពលរដ្ឋ និងម្ចាស់អាជីវកម្មអាហារដ្ឋាន និងហាងកាហ្វេដែលមានបង្កប់នូវល្បែងស៊ីសងគ្រប់ប្រភេទត្រូវបញ្ឈប់សកម្មភាពនេះជាបន្ទាន់។

រដ្ឋបាលខេត្តនឹងចាត់វិធានការបង្ក្រាបលើទីតាំងអាជីវកម្មអាហារដ្ឋាន ហាងកាហ្វេ និងទីតាំទាំងឡាយណា ដែលមានបង្កប់នូវការលេងល្បែងស៊ីសងគ្រប់ប្រភេទ ដោយត្រូវបិទមិនឱ្យប្រកបអាជីវកម្មបន្តទៀតទេ និងត្រូវចាត់វិធានការតាមផ្លូវច្បាប់។

រដ្ឋបាលខេត្តកំពង់ធំ ក៏បានបញ្ជាឱ្យសមត្ថកិច្ចពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ត្រូវចាត់វិធានការបង្ក្រាបការលេងល្បែងស៊ីសងគ្រប់ប្រភេទនៅតាមមូលដ្ឋានរបស់ខ្លួនឱ្យបានម៉ឺងម៉ាត់បំផុត៕

អត្ថបទ៖ ឈាង មករា