ខេត្តកណ្ដាលនឹងបើកយុទ្ធនាការចាក់វ៉ាក់សាំងជូនពលរដ្ឋនៅតាមវត្តអារាម និងតំបន់កំសាន្តនានាក្នុងពិធីបុណ្យភ្ជុំបិណ្ឌ

រដ្ឋបាលខេត្តកណ្ដាលនឹងបើកយុទ្ធនាការចាក់វ៉ាក់សាំងជូនប្រជាពលរដ្ឋនៅតាមបណ្ដាវត្តអារាម និងតំបន់កំសាន្តសំខាន់ៗនានានៅក្នុងពិធីបុណ្យភ្ជុំបិណ្ឌចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២២។

នៅក្នុងសេចក្តីជួនដំណឹងចុះថ្ងៃទី២១កញ្ញា លោក គង់ សោភ័ណ្ឌ អភិបាលខេត្តកណ្តាលបានឱ្យដឹងថា ដើម្បីកុំឲ្យមានការធ្លាក់ចុះនៃភាពស៊ាំក្នុងសហគមន៍ពិសេសទប់ស្កាត់ការឆ្លងរាលដាលជំងឺកូវីដ១៩នៅក្នុងកំឡុងពេលពិធីបុណ្យភ្ជុំនេះទើបមន្ទីរសុខាភិបាលខេត្តកណ្តាលបានបើកយុទ្ធនាការចាក់វ៉ាក់សាំងជូនពលរដ្ឋនៅតាមវត្តអារាម និងតំបន់កំសាន្តនានាសរុបចំនួន៦៨កន្លែងនៅក្នុងក្រុងស្រុកទាំង១១នៃខេត្តកណ្ដាល។

លោកអភិបាលខេត្តបានណែនាំថា ដើម្បីបង្ការការចម្លងជំងឺកូវីដ១៩ និងរក្សាបាននូវរបៀបរៀបរយក្នុងយុទ្ធនាការចាក់វ៉ាក់សាំងនេះសូមប្រជាពលរដ្ឋអនុវត្តតាមវិធានការ៣ការពាររួមមានពាក់ម៉ាសលាងដៃញឹកញាប់និងរក្សាគម្លាតសុវត្ថិភាពពីមួយម៉ែត្រកន្លះឡើងទៅនិង ៣កុំក្នុងនោះកុំទៅកន្លែងដែលមានមនុស្សច្រើនកុះករកុំទៅកន្លែងបិទជិតគ្មានខ្យល់ចេញចូលកុំប៉ះពាល់គ្នាកុំចាប់ដៃគ្នានឹងកុំកៀកស្មាគ្នាតាមអនុសាសន៍ដ៏ខ្ពង់ខ្ពស់របស់ប្រមុខរដ្ឋាភិបាល។

ជាមួយគ្នានេះដែរលោកអភិបាលខេត្តក៏បានណែនាំដល់បងប្អូនប្រជាពលរដ្ឋដែលនឹងអញ្ជើញទៅកាន់តំបន់ខាងលើហើយមានបំណងចាក់វ៉ាក់សាំងកូវីដ១៩អាចនឹងទទួលបានវ៉ាក់សាំងបានគ្រប់គ្នាៗដោយភ្ជាប់មកជាមួយនូវប័ណ្ណចាក់វ៉ាក់សាំង៕​

អត្ថបទ៖ សំអឿន