ព័ត៌មានជាតិ

ចងចាំស្នាដៃធំៗលោក ឃឹម ហ្វីណង់ ជិត ៣ ឆ្នាំដឹកនាំស្រុកបន្ទាយស្រី

បានផុស

៣ years មុន

នៅ

ថ្ងៃសុក្រ ២៣ កញ្ញា ២០២២

ដោយ

ជិត ៣ ឆ្នាំ ក្នុងមុខតំណែង លោក ឃឹម ហ្វីណង់ បានដឹកនាំស្រុកបន្ទាយស្រីក្លាយជាស្រុកគំរូមួយក្នុងខេត្តសៀមរាប។
យុវជនវ័យក្មេងនិងជាបញ្ញវន្តវ័យបញ្ចប់ការសិក្សាពីអាមេរិក សាធារណជននិងប្រជាពលរដ្ឋទូទៅចាប់ផ្តើមស្គាល់លោក ឃឹម ហ្វីណង់ តាមរយៈការគម្រោងអភិវឌ្ឍឥតឈប់ឈរនៅស្រុកបន្ទាយស្រី។

តើសមិទ្ធផលអីខ្លះដែលមន្រ្តីវ័យក្មេងលោក ឃឹម ហ្វីណង់ សម្រេចបានក្នុងពេលជិត ៣ ឆ្នាំ ក្នុងការដឹកនាំក្នុងស្រុកបន្ទាយស្រី?

បើកយុទ្ធនាការផ្ទះមួយអំពូលមួយ

ក្រោមគំនិតផ្តួចផ្តើម លោក ឃឹម ហ្វីណង់ បានបើកយុទ្ធនាការ “ផ្ទះ១ អំពូល១” នៅចុងឆ្នាំ ២០១៩ ដោយបំពាក់អំពូលសូឡាជូនប្រជាពលរដ្ឋតាមមូលដ្ឋាន។ យុទ្ធនាការនេះបានអនុវត្តមុនគេនៅភូមិព្រះដាក់ ដែលជាភូមិធំជាងគេនៅក្នុងស្រុកបន្ទាយស្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុទ្ធនាការ «ផ្ទះ១អំពូល១» បានបង្កើតការចាប់អារម្មណ៍ពីមហាជន ហើយទទួលបានការចូលរួមគាំទ្រយ៉ាងផុលផុស។ តាំងពីបើកយុទ្ធនាការ« ផ្ទះ១អំពូល១» អនុវត្តបានជិត ២០ ភូមិ លើ ០៦ ឃុំ និងកំពុងបន្តរៀបចំនៅតាមបណ្តាភូមិផ្សេងទៀតទូទាំងស្រុក។

កែប្រែមុខមាត់រង្វង់មូលបន្ទាយស្រី

ធ្លាប់ជាទីវាលស្មៅសោះកក្រោះបោះបង់ចោល ដោយពុំមានការថែទាំដិតដល់ រង្វង់មូលបន្ទាយស្រីបានក្លាយជាតំបន់ទេសចរណ៍ថ្មីដ៏ទាក់ទាញនៅស្រុកបន្ទាយស្រី។

រង្វង់មូលបន្ទាយស្រី គឺជារង្វង់មូលមួយធំជាគេនៅកម្ពុជា មានទំហំជិត ២ ហិកតា ស្ថិតនៅតំបន់ផ្លូវប្រសព្វឡើងទៅភ្នំគូលែន។

រដ្ឋបាលស្រុកបន្ទាយស្រី បានក្រែប្រែទីតាំងដែលធ្លាប់ជាកន្លែងចងគោក្របីរបស់អ្នកស្រុក ហើយដែលទេសចរភាគច្រើនជិះហួសទៅហួសប្រែក្លាយទៅជាសួនផ្កាដ៏ស្រស់ស្អាត និងក្រោយមកកែប្រែទៅជារង្វង់មូលវាលស្រែធ្វើឲ្យមានភាពទាក់ទាញបន្ថែមទៀត។

រៀបចំ «សហគមន៍ស្វ័យគ្រប់គ្រង»

លោក ឃឹម ហ្វីណង់ បានជំរុញចលនា «សហគមន៍ស្វ័យគ្រប់គ្រង» ដើម្បីឱ្យពលរដ្ឋម្ចាស់ការលើការគ្រប់គ្រងសំរាមក្នុងមូលដ្ឋាន។

«សហគមន៍ស្វ័យគ្រប់គ្រង» បង្កើតឡើងដើម្បីឲ្យពលរដ្ឋអាចស្វ័យគ្រប់គ្រងសំរាម តាមរយៈបំផុសចលនាតាមផ្ទះពលរដ្ឋនីមួយៗ គ្មានសំរាម ឬកាកសំណល់ នៅក្រៅធុងសំរាម។ គម្រោងនេះបានអនុវត្តយ៉ាងជោគជ័យនៅភូមិព្រះដាក់ និងបានបន្តអនុវត្តនៅឃុំគោលដៅមួយចំនួនទៀតនៅស្រុកបន្ទាយស្រី។

បើកយុទ្ធនាការគ្មានថង់បា្លស្ទិក

រដ្ឋបាលស្រុកបន្ទាយស្រីដែលមានលោក ឃឹម ហ្វីណង់ ជាអភិបាលស្រុក បានបើកយុទ្ធនាការ “គ្មានថង់ប្លាស្ទិក” ដោយបង្វែរឱ្យអាជីវករលក់ដូរ ងាកមកប្រើស្លឹកឈូក និងស្លឹកចេក សម្រាប់ការវេចខ្ចប់ ដើម្បីចូលរួមកាត់បន្ថយប្លាស្ទិក និងលើកកម្ពស់បរិស្ថាន។

យុទ្ធនាការរយៈពេលពេញ ១ សប្តាហ៍ គិតចាប់ពីថ្ងៃទី ១១ រហូតដល់ថ្ងៃទី ១៧ ខែមេសា ពោលគឺក្នុងអំឡុងពេលបុណ្យចូលឆ្នាំថ្មីតែម្តង។

ការសម្រេចជ្រើសយកឱកាសបុណ្យចូលឆ្នាំខ្មែរ ដោយសារសង្កេតឃើញថា សំរាមតែងតែមានការកើនឡើងយ៉ាងគំហុកនៅរៀងរាល់ពេលមានបុណ្យទានធំៗ ជាពិសេសគឺប្រភេទសម្បកវេចខ្ចប់ប្លាស្ទិកនេះតែម្តង ដែលភាគច្រើនត្រូវបានបោះចោលរាយប៉ាយយ៉ាងឥតសណ្តាប់ធ្នាប់នៅតាមដងផ្លូវសាធារណៈនានា។

បង្កើតឡដុតសំរាម

ឡដុតសំរាម បានរៀបចំជាលើកដំបូងនៅស្រុកបន្ទាយស្រី។ សំរាមជាច្រើនតោនមកពីគ្រប់ទិសទីនៅក្នុងស្រុកបន្ទាយស្រី ត្រូវបានប្រមូលយកមកដុតនៅក្នុងទីលានឡដុតសំរាមដែលរៀបចំដោយអាជ្ញាធរ។

តាមរយៈឡដុតសំរាមនេះ ប្រជាពលរដ្ឋមិនចាំបាច់ដុតសំរាមនៅតាមផ្ទះរៀងៗខ្លួន ឬដឹកយកទៅចាក់ចោលតាមដីទំនេរជាអនាធិបតេយ្យទៀតទេ គឺអាចយកមកដាក់នៅ ”កន្លែងរក្សាទុកសំរាមបណ្តោះអាសន្ន” នៅតាមភូមិរបស់ខ្លួននីមួយៗ រង់ចាំក្រុមការងាររបស់ឃុំនិងស្រុកធ្វើការប្រមូលបន្តមកកាន់ទីលានឡដុតសំរាមជាប្រចាំ។

បង្កើតគម្រោង «ស្រែសង្គម»

«ស្រែសង្គម» គឺជាគម្រោងស្រែរួមមួយដែលផ្ដួចផ្ដើមគំនិតឡើងដោយរដ្ឋបាលខេត្តបន្ទាយស្រី ដែលមានផ្ទៃដីស្រែប្រមាណ ៤០ហិចតា វាជាស្រែ ដែលប្រជាពលរដ្ឋម្ចាស់ដី ចំនួន៨៧គ្រួសារ បានយល់ព្រមផ្តល់អោយរដ្ឋបាលស្រុកបន្ទាយស្រីប្រើប្រាស់ក្នុងការធ្វើស្រែចំនួន ២ដង ក្នុងគោលបំណង យកស្រូវអង្ករទាំងនេះសម្រាប់ជួយទៅដល់ប្រជាពលរដ្ឋដែលកំពុងទទួលរងគ្រោះក្នុងវិបត្តិនៃជំងឺកូវីត១៩ ។

”ស្រែសង្គម” ខុសប្លែកពីសហគមន៍កសិកម្មបន្តិចត្រង់ថា វាមិនមែនដើម្បីប្រាក់ចំណេញ ធ្វើឡើងក្នុងគោលដៅសង្គម និងមនុស្សធម៌។ ចំណែកឯការចំណាយទៅលើគម្រោងនេះទាំងមូល ទទួលបានការចូលរួមឧបត្ថម្ភពីសំណាក់សប្បុរសជនទាំងស្រុង ក្រោមការសម្របសម្រួលរបស់រដ្ឋបាលស្រុកបន្ទាយស្រី។

លោក ឃឹម ហ្វីណង់ អភិបាលស្រុកបន្ទាយស្រីបញ្ជាក់ថា គម្រោង“ ស្រែសង្គម” មិនមែនដើម្បីប្រាក់ចំណេញនោះឡើយ ប៉ុន្តែដើម្បីគោលដៅសង្គម និងមនុស្សធម៌ទាំងស្រុង។ ហេតុផលចម្បង គឺការបង្កើតលទ្ធភាពរួមចំណែកឲ្យរដ្ឋបាលស្រុក អាចជួយទៅដល់ប្រជាពលរដ្ឋងាយរងគ្រោះពីកូវីដ-១៩។

បិទអាជីវកម្មទិញ-លក់ សាច់សុនខ

ការធ្វើអាជីវកម្មសាច់ឆ្កែគ្រប់រូបភាពនៅក្នុងស្រុកបន្ទាយស្រី ត្រូវបានហាមឃាត់។ ស្រុកបន្ទាយស្រីត្រូវបានរកឃើញថាជាកន្លែងជួញដូរធំជាងគេនៅក្នុងខេត្តសៀមរាប។ ការហាមឃាត់ការជួញដូរសាច់ឆ្កែនេះ ដើម្បីលើកកម្ពស់សុខមាលភាពសត្វផង និងសុខភាពសាធារណៈរបស់ប្រជាពលរដ្ឋទូទៅផង ជៀសវាងការឆ្លងរាលដាលជម្ងឺផេ្សងៗ។

ប្រែក្លាយផ្លូវដីតាមភូមិទៅជាផ្លូវបេតុង ក្រោមយុទ្ធនាការ «បេតុង+បៃតង»

ក្នុងរយៈពេលជិត ៣ ឆ្នាំក្នុងតំណែង លោកឃឹម ហ្វីណង់ បានខិតខំអភិវឌ្ឍហេដ្ឋារចនាសម្ព័ន្ធផ្លូវតូចធំក្នុងមូលដ្ឋានជាផ្លូវបេតុងក្រោមយុទ្ធនាការ «បេតុង+បៃតង»។ កន្លែងដែលធ្លាប់តែមានដីហុយ ពិបាកសូម្បីតែដកដង្ហើមនោះ បានប្រែក្លាយទៅជាផ្លូវដ៏ស្រស់ស្អាត។

លោក ឃឹម ហ្វីណង់ ដាក់ក្តីរំពឹងទុកថា ដោយសារល្បឿននៃការអភិវឌ្ឍមិនដល់ ៥ ឆ្នាំទៀតទេគ្រប់ទីប្រជុំជនភូមិសំខាន់ៗដែលមានមនុស្សរស់នៅច្រើន និងមានអ្នកទេសចរណ៍ឆ្លងកាត់ញឹកញាប់ក្នុងស្រុកបន្ទាយស្រី នឹងត្រូវបានគ្របដណ្តប់ទៅដោយផ្លូវបេតុងនិងផ្លូវកៅស៊ូទាំងអស់។

រៀបចំឯកសណ្ឋានថ្មីដល់មន្រ្តីរដ្ឋបាលស្រុក

ក្រោមទិសស្លោក ឯកសណ្ឋានតំណាងឲ្យ វិន័យ ភាពម៉ឺងមាត់ លោក ឃឹម ហ្វីណង់ បានរៀបចំឯកសណ្ឋានថ្មីជូនមន្ត្រីរដ្ឋបាលស្រុកបន្ទាយស្រី។

ការប្រើប្រាស់ឯកសណ្ឋានថ្មីនេះ ឆ្លុះបញ្ចាំងពីក្រមសីលធម៌វិជ្ជាជីវៈក្នុងពេលបំពេញការងារ និងឯកសណ្ឋានតំណាងឲ្យភាពស្មើគ្នានិងសេចក្តីថ្លៃថ្នូរនៅក្នុងកន្លែងធ្វើការ។

លោកឃឹម ហ្វីណង់បានអះអាង នឹងស្លៀកពាក់ឯកសណ្ឋានថ្មីនេះមិនថានៅកន្លែងបំពេញតួនាទី និងពេលចុះទៅបម្រើសេវាជូនប្រជាពលរដ្ឋក្នុងមូលដ្ឋាន។

បញ្ចប់ការបន្ទោរបង់ពាសវាលពាសកាល

ស្រុកបន្ទាយស្រីនឹងបញ្ចប់ការបន្ទោរបង់ពាសវាលពាសកាល ហើយមានបង្គន់អនាម័យប្រើប្រាស់គ្រប់ខ្នងផ្ទះ។

អត្រាមានបង្គន់អនាម័យប្រើប្រាស់នៅក្នុងស្រុកបន្ទាយស្រីនឹងកើនឡើងពីក្រោម ៧០% ទៅដល់ ១០០% ក្នុងរយៈពេលដ៏ខ្លីខាងមុខ ដោយមានការគាំទ្រពីក្រសួងអភិវឌ្ឍន៍ជនបទ និងអង្គការដៃគូ ជាពិសេសការចូលរួមទូលំទូលាយពីអាជ្ញាធរមូលដ្ឋាន និងប្រជាពលរដ្ឋនៅក្នុងស្រុកទាំងមូល។

ជួយដោះស្រាយបញ្ហាទឹក នៅភូមិក្រីក្រជាងគេនៅស្រុកបន្ទាយស្រី

ត្រពាំងថ្មជាភូមិក្រីក្រជាងគេមួយក្នុងស្រុកបន្ទាយស្រី។ តំបន់នេះគ្មានប្រភពទឹកទាល់តែសោះក្រៅពីទឹកភ្លៀង ហើយការខ្វះខាតទឹក ធ្លាប់មានដល់កម្រិតធ្ងន់ធ្ងរខ្លាំង រហូតត្រូវដឹកជញ្ជូនទឹកជូនកាលពីឆ្នាំ២០១៥។ ចាប់ពីឆ្នាំ ២០២០ ដោយសារមានស្វះស្វែងរកជំនួយពីសប្បុរសជន បានជីកអណ្តូងទឹក និងជីកស្រះទឹកជូនប្រជាពលរដ្ឋ ឆ្លើយតបការលំបាករបស់ប្រជាពលរដ្ឋមួយកម្រិតធំ។

ឃុំរំចេកទាំងមូល នឹងលែងមានផ្ទះស្លឹកទៀតហើយ

ផ្ទះដំបូលស្លឹកឬផ្ទះប្រក់ស្បូវទាំងអស់នៅក្នុងឃុំរំចេកក្នុងស្រុកបន្ទាយស្រី នឹងត្រូវជំនួសដោយសង្កសី រឹងមាំប្រើប្រាស់

ឃុំរំចេកក្នុងស្រុកបន្ទាយស្រីនៅមានផ្ទះចំនួន៧០ខ្នង ដែលនៅប្រក់ស្លឹក ឬស្បូវនៅឡើយ ភាគច្រើនគឺជាគ្រួសារទីទ័លក្រ និងមានជីវភាពលំបាក។ យ៉ាងណាតាមការអំពាវនាវរបស់រដ្ឋបាលស្រុកបន្ទាយស្រី បាននទទួលការគាំទ្រពីក្រុមការងារចុះជួយស្រុកបន្ទាយស្រី ក្នុងការជួយកែប្រែលំនៅដ្ឋានជូនប្រជាពលរដ្ឋនឹងប្រែក្លាយឲ្យទៅជាផ្ទះប្រក់ស័ង្កសីទាំងអស់។

ដាក់គោលដៅស្រុកបន្ទាយស្រី ជាតំបន់នាំបន្លែទៅផ្គត់ផ្គង់ក្នុងខេត្តសៀមរាប

ក្នុងមួយឆ្នាំៗ ខេត្តសៀមរាបបាននាំចូលបន្លែសាច់ផ្លែឈើប្រហែល ៨០% ពីខេត្តដទៃឬប្រទេសដទៃ។ ស្រុកបន្ទាយស្រីដែលនៅកៀកនឹងក្រុងសៀមរាប លោក ឃឹម ហ្វីណង់ ដាក់គោលដៅយកមូលដ្ឋានស្រុកបន្ទាយស្រីជាប្រភពក្នុងការផលិតបន្លែសាច់ផ្គត់ផ្គង់ដល់ខេត្តសៀមរាប។

ប្រែក្លាយស្រុកបន្ទាយស្រីជាក្រុងទេសចរណ៍ទី ២ បន្ទាប់ពីក្រុងសៀមរាប

គោលដៅដ៏ធំរបស់លោកឃឹម ហ្វីណង់ ចង់ប្រែក្លាយស្រុកបន្ទាយស្រីឱ្យទៅជាក្រុងទេសចរណ៍ទី ២ បន្ទាប់ពីក្រុងសៀមរាប។ លោកមើលឃើញគឺវិស័យទេសចរណ៍ ជាសក្ដានុពលធំជាងគេរបស់ស្រុកបន្ទាយស្រី ហើយស្រុកបន្ទាយស្រីមានចំណុចពិសេសច្រើនពាកព័ន្ធដោយក្នុងនោះមានប្រាសាទដ៏ល្អវិសេស និងតំបន់ទេសចរណ៍បែបវប្បធម៌សម្បូរបែប រួមទាំងតំបន់ទេសចរណ៍បែបសហគមន៍ជាច្រើនទៀត ដែលកំពុងស្រូបទាក់ទាញភ្ញៀវទេសចរទៅទស្សនា។

គួរបញ្ជាក់ថា លោក ឃឹម ហ្វីណង់ ត្រូវបានរាជរដ្ឋាភិបាលកម្ពុជា សម្រេចដំឡើងតំណែងជាអភិបាលរងខេត្តសៀមរាប តាមរយៈអនុក្រឹត្យតែងតែមន្រ្តីរាជការរបស់រាជរដ្ឋាភិបាលកម្ពុជា នាថ្ងៃ៣០ សីហា ២០២២។

លោក ឃឹម ហ្វីណង់ ជាកូនប្រុស លោក ឃឹម ប៊ុនសុង បានទទួលការតែងតាំងជាអភិបាលស្រុកបន្ទាយស្រី ខេត្តសៀមរាប កាលពីអំឡុងឆ្នាំ២០១៩។ បន្ទាប់ពីក្លាយជាអភិបាលស្រុកដែលស្ថិតក្នុងភាពជាយុវជននោះ លោកត្រូវបានស្វាគមន៍យ៉ាងកក់ក្តៅពីពលរដ្ឋក្នុងមូលដ្ឋានដោយសារតែប្រជាប្រិយភាពរបស់លោកក្នុងការបម្រើពលរដ្ឋ៕