ភ្ជុំបិណ្ឌ ៣ថ្ងៃ ខេត្តសៀមរាប ទទួលបានភ្ញៀវទេសចរ​ជាង ១៤ម៉ឺននាក់

រយៈពេលសម្រាកក្នុងពិធីបុណ្យភ្ជុំបិណ្ឌ ៣ថ្ងៃ ខេត្តសៀមរាប ទទួលបានភ្ញៀវទេសចរជាតិ និងអន្តរជាតិចំនួនជាង ១៤ម៉ឺន ៣ពាន់នាក់ ដែលដើរកម្សាន្តនៅតាមរមណីយដ្ឋាននានា។ នេះយោងតាមរបាយការណ៍មន្ទីរទេសចរណ៍។

របាយការណ៍ បានបង្ហាញថា ទេសចរ ១៤ ម៉ឺននាក់ គឺជាភ្ញៀវជាតិដែលមកពីតាមបណ្តាខេត្ត និង ស្ថិតក្នុង​ខេត្តសៀមរាប​ផ្ទាល់ ដែលស្មើនឹង ៥៥-៦០ភាគរយ ខណៈភ្ញៀវមកកម្សាន្តលក្ខណៈគ្រួសារមាន រហូតដល់ជិត ៨ម៉ឺននាក់។ ចំណែកភ្ញៀវទេសចរបរទេសផ្ទៃក្នុង មានចំនួនតែ ៣,៤៧០នាក់ប៉ុណ្ណោះ។

ក្នុងចំណោមរមនីយដ្ឋានល្បីៗ ដួចជា រមណីយដ្ឋានអង្គរ មានភ្ញៀវទៅកម្សាន្តប្រមាណ ៨៥,០០០នាក់  រមណីយដ្ឋានឧទ្យាន​ជាតិភ្នំគូលែន មានចំនួនប្រមាណ ៤,៦០០នាក់  តំបន់ទន្លេសាប ១,៥០០០នាក់ សហគមន៍ទេសចរណ៍-អេកូទេសចរណ៍ និងតំបន់ផ្សេងៗមានចំនួនប្រមាណ ៣៥,៤០០នាក់។

រដ្ឋបាលខេត្តសៀមរាប បានគូសបញ្ជាក់ថា សម្រាប់ដំណើរកម្សាន្តនេះ ភ្ញៀវទេសចរជាច្រើនមានការលើកសរសើរ​អំពីការរៀបចំសណ្តាប់ធ្នាប់នៅតាម រមណីយដ្ឋាននានា ដែលមានលក្ខណៈល្អប្រសើរ ជាពិសេសនៅរមណីយដ្ឋានអង្គរ ដែលមានកំណើនទេសចរគួរឱ្យកត់សម្គាល់៕

អត្ថបទ៖ នាង រតនៈ