ព័ត៌មានជាតិ

អាជ្ញាធរខេត្តកំពង់ស្ពឺ ប្រាប់ឲ្យប្រជាពលរដ្ឋរស់នៅតាមបណ្តោយស្ទឹងព្រែកត្នោត បង្កើនការប្រុងប្រយ័ត្នខ្ពស់ចំពោះទឹកជំនន់

បានផុស

២ years មុន

នៅ

ថ្ងៃពុធ ២៨ កញ្ញា ២០២២

ដោយ

អាជ្ញាធរខេត្តកំពង់ស្ពឺ បានក្រើនរំលឹក និងជូនដំណឹងដល់ប្រជាពលរដ្ឋដែលរស់នៅតាមបណ្តោយស្ទឹងព្រែកត្នោត ត្រូវប្រុងប្រយ័ត្នខ្ពស់ត្រៀមខ្លួនរកទីទួលមានសុវត្ថិភាព ដើម្បីការពារគ្រោះផ្សេងៗជាយថាហេតុ ព្រោះភ្លៀងកំពុងធ្លាក់ច្រើននៅតំបន់ខាងលើ ដូច្នេះទឹកនឹងហក់ឡើងលឿនខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រលប់ថ្ងៃអង្គារ ទី ២៧ ខែកញ្ញា ឆ្នាំ ២០២២ នេះ រដ្ឋបាលខេត្តកំពង់ស្ពឺ បានចេញសេចក្តីជួនដំណឹងពិសេសមួយជម្រាបជួនប្រជាពលរដ្ឋ ដែលរស់នៅតាមបណ្តោយដងស្ទឹងព្រែកត្នោត ជាពិសេសអ្នកនៅតាមតំបន់ទំនាបផ្នែកខាងក្រោមស្ទឹងព្រែកត្នោត ក្នុងពេលប៉ុន្មានថ្ងៃកន្លងមកនេះ នៅផ្នែកខាងលើមានភ្លៀងធ្លាក់ខ្លាំងវាបង្កឲ្យទឹកស្ទឹងព្រែកត្នោតហក់ឡើងលឿនអាចបង្កឲ្យមានការលិចលង់តំបន់ខ្លះជាយថាហេតុ ដែលនាំឲ្យប៉ះពាល់ដំណាំកសិកម្ម សត្វពាហនៈ មាន់ ទា ផ្ទះសម្បែង និងហេដ្ឋានរចនាសម្ព័ន្ធនានា ជាពិសេសអាចបង្កគ្រោះថ្នាក់ដល់អាយុជីវិតតែម្តង។

ដើម្បីធានាសុវត្ថិភាព បង្ការគ្រោះថ្នាក់ទាំងអស់នេះទាន់ពេលវេលា សូមបងប្អូនប្រជាពលរដ្ឋដែលរស់នៅផ្នែកខាងលើ និងខាងក្រោមទ្វាទឹករលាំងជ្រៃបណ្តោយស្ទឹងព្រែកត្នោតជាពិសេសតំបន់ងាយរងគ្រោះ ត្រូវត្រៀមលក្ខណៈឲ្យរួចជាស្រេច ត្រូវបង្កើនការប្រុងប្រយ័ត្នខ្ពស់ និងស្វែងរកទីទួលមានសុវត្ថិភាព ដើម្បីជៀសវាងកើតមានគ្រោះថ្នាក់ផ្សេង ព្រោះស្ថានភាពទឹកកំពុងហក់ឡើងជាបន្តបន្ទាប់ ។

ក្រុមការងារបច្ចេកទេស នៃមន្ទីរធនធានទឹក និងឧតុនិយម ខេត្តកំពង់ស្ពឺ ដែលចុះប្រចាំការ និងត្រួតពិនិត្យស្ថានភាពទឹកតាមទំនប់អាងសំខាន់ៗក្នុងខេត្តកំពង់ស្ពឺ បានប្រាប់ឲ្យដឹងថា ស្ថានភាពទឹកស្ទឹងព្រែកត្នោតមានការហក់ឡើងលឿនខ្លាំង ប៉ុន្តែមិនទាន់ដល់ចំណុចប្រកាសអាសន្នទេ ដូច្នេះបងប្អូនប្រជាពលរដ្ឋរសនៅតាមបណ្តោយស្ទឹងព្រែកត្នោតជាពិសេសអ្នកខាងក្រោមទ្វារទឹករលាំងជ្រៃមេត្តាជ្រាប និងបង្កើនការប្រុងប្រយ័ត្នខ្ពស់។

ឯកឧត្តម វ៉ី សំណាង អភិបាលខេត្តកំពង់ស្ពឺ បានអំពាវនាវដល់ពុកម៉ែមាមីងបងប្អូនប្រជាពលរដ្ឋត្រូវត្រៀមលក្ខណៈជាស្រេច និងប្រុងប្រយ័ត្នខ្ពស់ចំពោះទឹកជំនន់។ បើតាមការព្យាករណ៍ធាតុអាកាសរបស់ក្រសួងធនធានទឹក បានឲ្យដឹងថា ខេត្តកំពង់ស្ពឺនឹងទទួលរងឥទ្ធិពលព្យុះទី ១៦ ដូចបណ្ដាខេត្តដទៃផ្សេងទៀតដែរ។

ឯកឧត្តមអភិបាល បានបន្ថែមថា អាស្រ័យហេតុនេះ សូមពុកម៉ែមីងបងប្អូនមេត្តាយកចិត្តទុកដាក់ធ្វើយ៉ាងណាត្រូវផ្ដល់ព័ត៌មានដល់អាជ្ញាធរភូមិ ឃុំ ឬប៉ុស្តិ៍រដ្ឋបាលដែលនៅជិតកន្លែងកើតហេតុឲ្យបានទាន់ពេលវេលា ដើម្បីក្រុមការងារចុះជួយសង្គ្រោះបងប្អូនដែលមានលំនៅឋាន ត្រូវជន់លិចដោយសារឥទ្ធិពលនៃព្យុះនេះជៀសវាងកើតមានគ្រោះថ្នាក់ដោយប្រការណាមួយ៕

អត្ថបទ៖ ភួង រដ្ឋា