ព័ត៌មានជាតិ

ខេត្តបន្ទាយមានជ័យ ជាខេត្តមួយក្នុងចំណោម ៤ ដែលរងគ្រោះដោយសារជំនន់ទឹកភ្លៀងធ្ងន់ធ្ងរជាងគេ

បានផុស

២ years មុន

នៅ

ថ្ងៃព្រហស្បតិ៍ ២៩ កញ្ញា ២០២២

ដោយ

លោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា ខេត្តបន្ទាយមានជ័យជាខេត្តមួយក្នុងចំណោមខេត្តចំនួន ៤ ដែលរងគ្រោះដោយសារជំនន់ទឹកភ្លៀងធ្ងន់ធ្ងរជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសចុះពិនិត្យនិងនាំស្បៀង និងសួរទុក្ខពលរដ្ឋ រងការជន់លិចប៉ះពាល់ដល់ប្រជា ពលរដ្ឋជាង ៧ ពាន់គ្រួសារនៅខេត្តបន្ទាយមានជ័យ កាលពីថ្ងៃទី ២៨ ខែកញ្ញា លោក ទេសរដ្ឋមន្ត្រី គន់ គីមបានបន្តថាខេត្តចំនួន ៤ រងគ្រោះដោយជំនន់ទឹកភ្លៀងរួមមានខេត្តសៀមរាប កំពង់ធំ ឧត្តរមានជ័យ និងបន្ទាយមានជ័យ។

យោងតាមរបាយការណ៍ខេត្តបន្ទាយមានជ័យ បានឱ្យដឹងថា ជំនន់ទឹកភ្លៀងបានប៉ះពាល់ដល់ក្រុង-ស្រុកទាំង ៥ រួមមាន មានស្រុកសិរីសោភ័ណ ស្រុកមង្គលបូរី ស្រុកភ្នំស្រុក ស្រុកព្រះនេត្រព្រះ និងស្រុកម៉ាឡៃ ដោយបានប៉ះពាល់ពលរដ្ឋសរុបចំនួន ៧,៤៩១ គ្រួសារ ស្មើនឹងប្រមាណ ៣៣,០០០នាក់ និងបានជម្លៀសទៅទីទួលសុវត្ថិភាពចំនួន ២៩៧ គ្រួសារ ស្លាប់មនុស្ស ៤ នាក់ ដោយសារលង់ទឹកនិងប៉ះពាល់ស្រូវជាង ២៦,០០០ ហិតា, ដំឡូងមីជាង ៩០០ ហិតា, វត្តអារាមចំនួន ២២, សាលារៀន ៤១, មណ្ឌលសុខភាពចំនួន ៣ និងផ្លូវចំនួន ២៧៣ កន្លែង ស្មើនឹងប្រវែង ១៧២,២៣៣ម៉ែត្រ។

លោកទេសរដ្ឋមន្ត្រី បានចូលរួមសម្តែងការសោកស្តាយចំពោះផលប៉ះពាល់ ក៏ដូចជាការខូចខាតផលដំណាំរបស់ប្រជាពលរដ្ឋពីគ្រោះទឹកជំនន់នាពេលនេះ។ ដោយលោកទេសរដ្ឋមន្ត្រីបានបញ្ជាក់ថា អ្វីដែលត្រូវយកចិត្តទុកដាក់នៅពេលនេះ គឺត្រូវរក្សាសុខភាព រក្សាអាយុជីវិតពីគ្រោះទឹកជំនន់។ លោកទេសរដ្ឋមន្ត្រីបានជំរុញមន្ត្រីលេខាធិការដ្ឋានគ្រប់គ្រងគ្រោះមហន្តរាយខេត្ត ត្រូវត្រៀមជានិច្ច ក្នុងការចុះជួយសង្គ្រោះពលរដ្ឋពីគ្រោះទឹកជំនន់ រួមទាំងបញ្ជូនពលរដ្ឋទៅកាន់ទីទួលសុវត្ថិភាពឱ្យបានទាន់ពេលវេលា៕