​ខេត្តចំនួន ៣ ទៀត​ កំពុងប្រឈម​គ្រោះទឹកជំនន់​ក្រោយឥទ្ធិពលព្យុះទី១៦ ​

​មន្ត្រីអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក សុទ្ធ គឹមកុសលមុនីបាន​ឱ្យ​ដឹង​ថា ខេត្តចំនួន ៣ ទៀត កំពុងរងផលប៉ះពាល់ដោយសារជំនន់ទឹកភ្លៀង​ក្រោយឥទ្ធិពល​ព្យុះណូរុ​ជាច្រើនថ្ងៃ។ ខេត្តដែលប្រឈមជំនន់ទឹកភ្លៀងទាំងនោះរួមមាន ខេត្តពោធិ៍សាត់ បាត់ដំបង និងខេត្តរតនគិរី។ ​

សូមជំរាបថា ផលប៉ះពាល់ខ្លាំង​ដោយគ្រោះទឹកជំនន់ ​កាលពីពេលថ្មីៗនេះមានខេត្តកំពង់ធំ ខេត្ត​សៀម​រាប បន្ទាយមានជ័យ​ ខេត្តទាំងនេះ កំពុងតែរងផលប៉ះពាល់ និងខូចខាតលើដំណាំស្រូវ​ច្រើន។

គិតត្រឹមថ្ងៃទី ២៨ ខែកញ្ញា ប្រជាពលរដ្ឋជាង ១ ម៉ឺនគ្រួសារ និងដំណាំស្រូវ និងដំណាំរួមផ្សំប្រមាណ ៣ ម៉ឺនហិកតា រងផលប៉ះពាល់ និងខូចខាត ដោយសារបរិមាណទឹកភ្លៀងច្រើនលើសលប់បង្កឱ្យជន់លិច ខេត្តបន្ទាយមានជ័យ ខេត្តកំពង់ធំ និងខេត្ត​សៀម​រាប ខណៈពលរដ្ឋប្រមាណ ៥ ពាន់គ្រួសារត្រូវបានជម្លៀសរកទីទួលសុវត្ថិភាព៕