ព័ត៌មានជាតិ

កោះគោលដៅទេសចរណ៍ជាង ៦០ ភាគរយ ទទួលការវិនិយោគប្រែក្លាយជាឋានសួគ៌ទេសចរ

បានផុស

២ years មុន

នៅ

ថ្ងៃសុក្រ ៣០ កញ្ញា ២០២២

ដោយ

Dy Bunnara

កោះគោលដៅទេសចរណ៍សំខាន់ៗក្នុងដែនសមុទ្រកម្ពុជា បានទទួលកាវិនិយោគដើម្បីអភិវឌ្ឍជាទីសម្រាកលំហែកម្សាន្តដ៏ទាក់ទាញ។

ថ្លែងក្នុងសន្និសីទនៅព្រឹកនេះ លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍បានឲ្យដឹងថា ទេសចរណ៍កម្ពុជាផ្តោតលើវប្បធម៌ និងធម្មជាតិ។ ជាមួយគ្នានេះកោះមួយចំនួនក៏ត្រូវបានយកចិត្តទុកដាក់អភិវឌ្ឍជាគោលដៅទេសចរណ៍ ដើម្បីជំរុញកំណើនសេដ្ឋកិច្ចជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា កម្ពុជាមានកោះជាង ៦០។ ក្នុងនោះ កោះជាគោលដៅទេសចរណ៍សំខាន់ៗជាង ៦០ ភាគរយ បានទទួលការវិនិយោគជាកន្លែងសម្រាកលំហែរកាយសម្រាប់ភ្ញៀវទេសចរជាតិនិងអន្តរជាតិ។

លោក តុប សុភ័ក បានលើកគំរូពីការអភិវឌ្ឍនៅលើកោះរ៉ុង កោះរ៉ុងសន្លឹង កោះសង្សារ កោះឫស្សី និងបណ្តាប្រជុំកោះផ្សេងទៀត ដែលបានអភិវឌ្ឍនិងបានក្លាយជាផ្នែកមួយបានទាក់ទាញភ្ញៀវទេសចរមកកម្សាន្តនៅក្នុងប្រទេសកម្ពុជា។

ក្រុមប្រឹក្សាអភិវឌ្ឍកម្ពុជាថ្មីៗនេះ បានផ្តល់សិទ្ធិវិនិយោគកោះមួយចំនួននៅក្នុងដែនសមុទ្រខេត្តកែប។ ក្រុមហ៊ុន SAMANEA CO., LTD បានទទួលភ្លើងខៀវពីក្រុមប្រឹក្សាអភិវឌ្ឍកម្ពុជា វិនិយោគនៅលើកោះស្វាយ កោះម្ទេស និងកោះកុក ក្នុងទុនវិនិយោគប្រមាណ ១៨.២ លាន ដុល្លារ អាមេរិក។

លោក តុប សុភ័ក រដ្ឋលេខាធិការ និងអ្នកនាំពាក្យក្រសួងទេសចរណ៍

ដោយឡែកក្រុមហ៊ុនអ្នកឧកញ៉ា ទ្រី ភាព ក៏ទទួលបានគម្រោងវិនិយោគពីរដ្ឋាភិបាលអភិវឌ្ឍនៅលើកោះទន្សាយ និងកោះត្បាល់ ដើម្បីប្រែក្លាយទៅជាតំបន់រមណីយដ្ឋានទេសចរណ៍បែបធម្មជាតិនៅថ្ងៃអនាគត។

នៅខេត្តព្រះសីហនុ រដ្ឋាភិបាលបានចុះកិច្ចសន្យាប្រគល់កោះនិងឆ្នេរចំនួន ១៩ ទីតាំងក្នុងចំណោមកោះទាំង ៣២ ឱ្យក្រុមហ៊ុនឯកជនវិនិយោគអភិវឌ្ឍន៍ទៅជារមណីយដ្ឋានទាក់ទាញទេសចរកាន់តែច្រើនថែមទៀត។

បើតាមលោក ឡុង ឌីម៉ង់ អភិបាលរងខេត្តព្រះសីហនុ ការដែលរដ្ឋាភិបាលចុះកិច្ចសន្យាជួលកោះនិងឆ្នេរទាំង ១៩ ទៅឱ្យក្រុមហ៊ុនអភិវឌ្ឍន៍ ដើម្បីជំរុញកំណើនសេដ្ឋកិច្ចជាតិ ក៏ដូចជាជួយទាក់ទាញវិនិយោគិន និងភ្ញៀវទេសចរ និងជួយឱ្យភ្ញៀវស្នាក់នៅបានកាន់តែយូរផងដែរ៕