ព័ត៌មានជាតិ

ទឹកអូរព្រំដែនកម្ពុជាថៃ កំពុងហក់ឡើងខ្លាំង បណ្តាលឲ្យជន់លិច លំនៅឋានជាង ១០០ គ្រួសារ ក្នុងក្រុងប៉ោយប៉ែត

បានផុស

២ years មុន

នៅ

ថ្ងៃសៅរ៍ ១ តុលា ២០២២

ដោយ

ត្រឹមរសៀលថ្ងៃទី ០១ ខែតុលា ឆ្នាំ ២០២២ នេះ ទឹកជំនន់អូរព្រំដែនកម្ពុជាថៃ បានហក់ឡើងខ្លាំជាបន្តបន្ទាប់ ធ្វើឲ្យជន់លិចលំនៅឋានប្រជាពលរដ្ឋ ជាង ១០០ គ្រួសារ ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ និងត្រូវជម្លៀសពលរដ្ឋមកទីទួលសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គាត ហ៊ុល អភិបាលក្រុងប៉ោយប៉ែត បានឲ្យដឹងថា មកទល់ពេលនេះ ទឹកជំនន់បានជន់លិចលំនៅឋាន ប្រជាពលរដ្ឋ ក្នុងភូមិប៉ោយប៉ែត និងភូមិក្បាលកោះ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ សរុបចំនួន ១៤០ គ្រួសារ ក្នុងនោះពលរដ្ឋចំនួន ៧៧ គ្រួសារ ត្រូវបានជម្លៀសមកទីទួលសុវត្ថិភាព និង ៦៣ គ្រួសារទៀត គាត់មិនបានជម្លៀសមកទីទួលសុវត្ថិភាពនោះទេ។

លោកបន្តថា ដើម្បីចូលរួមចំណែកជួយរំលែកទុក្ខលំបាករបស់បងប្អូនប្រជាពលរដ្ឋ លោកបានដឹកនាំក្រុមការងារ និងកងកម្លាំងនគរបាល នាំយកសម្ភារៈ ស្បៀងអាហារមួយចំនួន ដែលអំណោយដ៏ថ្លៃថ្លារបស់ឯកឧត្តមនាយឧត្តមសេនីយ៍ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តបន្ទាយមានជ័យ និងលោកជំទាវ ចែកជូនប្រជាពលរដ្ឋ កំពុងរងគ្រោះដោយសារទឹកជំនន់នេះ ដល់ខ្នងផ្ទះតែម្តង៕