ព័ត៌មានជាតិ

ក្រសួងអប់រំ ផលិតវីដេអូបានជាង២ពាន់ឃ្លីបនិងសន្លឹកកិច្ចការសិស្សជិត១ពាន់សន្លឹកសម្រាប់សិស្សបឋមក្នុងបរិបទកូវីដ១៩

បានផុស

៤ years មុន

នៅ

ថ្ងៃពុធ ៣០ ធ្នូ ២០២០

ដោយ

ភ្នំពេញ ៖ នាយកដ្ឋានបឋមសិក្សានៃក្រសួងអប់រំយុវជននិងកីឡាសហការជាមួយមានមន្ត្រីបច្ចេកទេសលោកគ្រូអ្នកគ្រូបង្រៀនល្អសរុបចំនួន៦៣នាក់ បានផលិតវីដេអូបានចំនួន២០៥៧ឃ្លីបនិងសន្លឹកកិច្ចការសិស្សចំនួន៩៨៨សន្លឹក សម្រាប់ឲ្យសិស្សរៀននៅថ្នាក់កម្រិតបឋមសិក្សាបានសិក្សានៅក្នុងបរិបទកូវីដ១៩។

លោក បណ្ឌិត ចាន់សុភា ប្រធាននាយកដ្ឋានបឋមសិក្សាបានឲ្យដឹងនៅក្នុងពិធីបំពាក់គ្រឿងឥស្សរិយយសនិងមេដាយការងារជូនដល់ក្រុមការងារផលិតវីដេអូកាលពីរសៀលថ្ងៃទី២៩ ខែធ្នូ ថាចាប់ពីថ្ងៃទី៣០ ខែមីនា ឆ្នាំ២០២០ រហូតមកដល់ពេលនេះនាយករដ្ឋានបានសម្របសម្រួលផលិតវីដេអូបានចំនួន២០៥៧ឃ្លីបអាចចែកចេញជាភាសាខ្មែរថ្នាក់ទី១ចំនួន៤១៥ឃ្លីបភាសាខ្មែរថ្នាក់ទី២ ចំនួន៤០៣ឃ្លីបភាសាខ្មែរថ្នាក់ទី៣ចំនួន៣២១ឃ្លីបភាសាខ្មែរថ្នាក់ទី ៤ចំនួន ៦០ឃ្លីបភាសាខ្មែរថ្នាក់ទី៥ចំនួន៤៦ឃ្លីបនិងភាសាខ្មែរថ្នាក់ទី៦ចំនួន៣៩ ឃ្លីប។

លោកបានបន្តថា ចំណែកគណិតវិទ្យាថ្នាក់ទី១ ចំនួន២៣២ឃ្លីបគណិតវិទ្យាថ្នាក់ទី២ចំនួន២១២ឃ្លីបគណិតវិទ្យាថ្នាក់ទី ៣ចំនួន២២៩ឃ្លីបគណិតវិទ្យាថ្នាក់ទី៤ចំនួន៣០ឃ្លីបគណិតវិទ្យាថ្នាក់ទី៥ ចំនួន ៣៣និងគណិតវិទ្យាថ្នាក់ទី៦ចំនួន៣៧ឃ្លីប។

លោកបានឲ្យដឹងទៀតថា ចំណែកការផលិតសន្លឹកកិច្ចការសិស្សសរុបចំនួន៩៨៨កិច្ចការដែលចែកចេញជាភាសាខ្មែរថ្នាក់ទី១ ចំនួន៦៧កិច្ចការភាសាខ្មែរថ្នាក់ទី២ចំនួន២៤៩កិច្ចការ ភាសាខ្មែរថ្នាក់ទី ៣ចំនួន២២៧កិច្ចការភាសាខ្មែរថ្នាក់ទី ៤ចំនួន៤៨កិច្ចការភាសាខ្មែរថ្នាក់ទី ៥ចំនួន ៣៥កិច្ចការនិងភាសាខ្មែរថ្នាក់ទី៦ចំនួន២៨កិច្ចការ។

ចំណែកគណិតវិទ្យាថ្នាក់ទី១ចំនួន៣៦កិច្ចការគណិតវិទ្យាថ្នាក់ទី២ចំនួន១០៧កិច្ចការគណិតវិទ្យាថ្នាក់ទី ៣ចំនួន ១២១កិច្ចការគណិតវិទ្យាថ្នាក់ទី៤ចំនួន ២១កិច្ចការគណិតវិទ្យាថ្នាក់ទី៥ចំនួន ២៥កិច្ចការនិងគណិតវិទ្យាថ្នាក់ទី៦ចំនួន២៧កិច្ចការ។

លោកបានបន្ថែមថា ឃ្លីបវីដេអូនិងសន្លឹកកិច្ចការសិស្សទាំងនេះត្រូវបានផ្សព្វផ្សាយផ្ទាល់លើទំព័រហ្វេសប៊ុកផ្លូវការរបស់ក្រសួងអប់រំតាមបណ្ដាញសង្គមនានានិងការថតទុកសម្រាប់ការចាក់ផ្សាយតាមទូរទស្សន៍ជាតិកម្ពុជានិងតាមប្រព័ន្ធផ្សព្វផ្សាយនានាដើម្បីឲ្យសិស្សបានសិក្សាក្នុងពេលដែលសាលារៀនបានបិទទ្វារដោយសារជំងឺកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់ថា សម្រាប់ទិសដៅបន្តនាយកដ្ឋានបឋមសិក្សានិងបន្តផលិតវីដេអូលើមុខវិជ្ជាវិទ្យាសាស្ត្រនិងសិក្សាសង្គមគ្រប់កម្រិតថ្នាក់បន្តផលិតមុខវិជ្ជាភាសាខ្មែរនិងគណិតវិទ្យាថ្នាក់ទី៤ ដល់ថ្នាក់ទី៦សម្រាប់ឆមាសទី១ និង បន្តផលិតសន្លឹកកិច្ចការសម្រាប់សិស្សទាំងសន្លឹកកិច្ចការជាជំនួយដល់សិស្សរៀននិងសន្លឹកកិច្ចការស្វ័យវាយតម្លៃការសិក្សារបស់សិស្ស។

លោកបណ្ឌិតសភាចារ្យហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថា វីដេអូនិងសន្លឹកកិច្ចការដែលក្រុមការងារផលិតបាននេះពិតជាមានសារៈសំខាន់ណាស់ក្នុងការជួយឲ្យកុមារកម្ពុជានៅតែបន្តទទួលបានការសិក្សាក្នុងអំឡុងពេលដែលសាលារៀនផ្អាកដំណើរការទោះបីជាមានកុមារមួយចំនួនមិនបានទទួលលទ្ធផលក៏ដោយក៏សមិទ្ធផលទាំងនេះជាការបើកទំព័រប្រវត្តិសាស្ត្រឱ្យក្រសួងមានមូលដ្ឋានគ្រប់គ្រាន់ដើម្បីបន្តផលិតនិងផ្ដល់ជូនដល់អ្នកសិក្សានិងអ្នកពាក់ព័ន្ធប្រកបដោយសមធម៌និងបរិយាប័ន្ន។

លោករដ្ឋមន្ត្រីបានបន្តថា វីដេអូនិងសន្លឹកកិច្ចការនឹងត្រូវបានផ្ដល់ជូនដល់មន្ទីរអប់រំយុវជននិងកីឡារាជធានីខេត្តការិយាល័យអប់រំយុវជននិងកីឡានៃរដ្ឋបាលក្រុងស្រុកខណ្ឌនិងសាលារៀនតាមរយៈឧបករណ៍ផ្ទុកទិន្នន័យសាលារៀននីមួយៗនឹងត្រូវណែនាំឲ្យរៀបចំបង្កើតបន្ទប់រៀនឌីជីថលទៅតាមលទ្ធភាពដើម្បីផ្ទុកទិន្នន័យនិងដំណើរការវីដេអូការរៀនពីចម្ងាយដោយត្រូវរៀបចំក្នុងបណ្ណាល័យឬបន្ទប់រៀនណាមួយទៅតាមលទ្ធភាពរបស់សាលា។

លោករដ្ឋមន្ត្រីបានបន្តទៀតថា ក្រសួងសង្ឃឹមយ៉ាងមុតមាំថា មន្ត្រីបច្ចេកទេសនាយកដ្ឋានជំនាញជាពិសេសក្រុមការងារនាយកដ្ឋានបឋមសិក្សាអង្គការដៃគូដែលពាក់ព័ន្ធនឹងលោកគ្រូអ្នកគ្រូបង្រៀននឹងយកអស់នូវបទពិសោធន៍ ដែលមានកន្លងមកដើម្បីជាធាតុចូលបន្ថែមទៀតក្នុងការផលិតវីដេអូនិងសន្លឹកកិច្ចការសិស្សឲ្យកាន់តែមានគុណភាពនិងប្រសិទ្ធភាពថែមទៀត ចំពោះវីដេអូនិងសន្លឹកកិច្ចការទាំងនេះនឹងត្រូវប្រើប្រាស់យ៉ាងយូរអង្វែងបម្រើឲ្យការសិក្សាពីចម្ងាយទាំងក្នុងគ្រឹះស្ថានបណ្ដុះបណ្ដាលគ្រូនិងគ្រឹះស្ថានសិក្សា៕
ដោយ ៖ សំអឿន