ភ្ញៀវទេសចរបរទេសម្នាក់ ចាយនៅស្រុកខ្មែរជាមធ្យមអស់ប៉ុន្មាន?

លោក គង់ សុភារក្ស ប្រធាននាយកដ្ឋានស្ថិតិទេសចរណ៍ នៃក្រសួងទេសចរណ៍ បានឱ្យដឹងថា សម្រាប់ភ្ញៀវទេសចរអន្តរជាតិដែលបានមកកម្សាន្តនៅកម្ពុជា មានចំណាយជាមធ្យម ៧០០ដុល្លារ/១នាក់ ដោយមិនរាប់បញ្ចូល ការចំណាយ លើសំបុត្រយន្តហោះឡើយ។ លោកអះអាងបែបនេះ នៅក្នុងសន្និសីទសារព័ត៌មាន រៀបចំឡើងដោយអង្គភាព អ្នកនាំពាក្យរាជរដ្ឋាភិបាលកម្ពុជា នាពេលថ្មីៗនេះ។

ការគណនាលើចំណាយជាធម្យមនេះ គឺផ្អែកលើទិន្នន័យអង្កេតការណ៍លើភ្ញៀវទេសចរអន្តរជាតិ មុនវិបត្តិកូវីដ១៩ ដែលធ្វើឡើងដោយក្រសួងពាក់ព័ន្ធ នៅតាមច្រកព្រំដែនអន្តរជាតិសំខាន់ៗ ក្នុងចំណោម ២៦ច្រក ដោយយក ច្រក១០ ជាគំរូ និងប្រើពេល ៣-៤ខែ ដើម្បីចេញជាទិន្នន័យនេះមកបាន។

លោកគូសបញ្ជាក់ សម្រាប់ការស្នាក់នៅជាមធ្យមរបស់ទេសចរអន្តរជាតិ ទិន្នន័យបង្ហាញថា មានចំនួន ៦.៣០ថ្ងៃ ពោល គឺមានការកើនឡើង។ ដោយឡែកសម្រាប់រយៈពេល ២ឆ្នាំចុងក្រោយនៃវិបត្តិកូវីដ១៩ បើទោះបីជា កម្ពុជា អាក់ខានការអង្កេតការណ៍ក៏ពិតមែន តែការចំណាយរបស់ទេសចរអន្តរជាតិ ឃើញថា នៅតែមានការកើនឡើង ព្រោះអំឡុងពេលនោះ ការស្នាក់នៅមានការឡើងថ្លៃជាងមុន ទាំងសំបុត្រយន្តហោះ និងចំណាយផ្សេងៗជាដើម។

លោកពន្យល់ថា ការចំណាយរបស់ទេសចរអន្តរជាតិ ដែលអាចរាប់បញ្ជូលជាចំណូលជាតិ គឺបូករួមការចំណាយលើ មធ្យោបាយធ្វើដំណើរក្នុងស្រុក ការស្នាក់នៅ សំបុត្រកម្សាន្ត -ល- ដោយលើកលែងតែការចំណាយលើ សំបុត្រយន្តហោះធ្វើដំណើរពីក្រៅប្រទេស ឬពីក្នុងប្រទេសទៅក្រៅប្រទេស ព្រោះនេះជាចំណូលចូលទៅអន្តរជាតិ។

គួរបញ្ជាក់ថា ចំពោះការគណនាភ្ញៀវទេសចរអន្តរជាតិ គឺជាការធ្វើឡើងដោយក្រសួងទេសចរណ៍ សហការជាមួយ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ទទួលបន្ទុកលើការប្រមូលរបាយការណ៍ប្រចាំខែ ពី ២៦ ច្រកទ្វារអន្តរជាតិ (ផ្លូវគោក ផ្លូវទឹក ផ្លូវអាកាស)។

តាមរបាយការណ៍របស់ក្រសួងទេសចរណ៍ បង្ហាញថា រយៈពេល ៨ខែ នៃឆ្នាំ២០២២ ព្រះរាជាណាចក្រកម្ពុជា ទទួលបានភ្ញៀវទេសចរអន្តរជាតិ ជិត១លាននាក់ (កើនឡើង ៧២០,២% ធៀបនឹងរយៈពេលដូចគ្នា ក្នុងឆ្នាំ២០២១) និងទេសចរក្នុងស្រុកជាង ៨,៦លាននាក់ (កើនឡើង ២៥៥,៧% បើធៀបនឹងរយៈពេលដូចគ្នា ក្នុងឆ្នាំ២០២១) ៕

អត្ថបទ ៖ សុធាវី