មន្ត្រីជាន់ខ្ពស់ក្រសួងសង្គមកិច្ច អរគុណរដ្ឋាភិបាលអូស្រ្តាលី ដែលបានអនុញ្ញាតឲ្យកុមារ​ខ្មែរមួយរូប បាន​ព្យាបាលជំងឺ​ និងរៀនសូត្រ​

លោកអគ្គនាយកសេវាសង្គមកិច្ច បានថ្លែងអំណរគុណដល់រដ្ឋាភិបាលអូស្រ្តាលី​ ដែលបានអនុញ្ញាតឲ្យកុមារ​ខ្មែរមួយរូប បានរស់នៅ​ដើម្បីព្យាបាលជំងឺ​ និងរៀនសូត្រ​ នៅប្រទេសអូស្ត្រាលី​ ដែលកាយវិការនេះ​ ជាការគិតគូរឧត្តមប្រយោជន៍ដល់កុមារ​ ដោយមិនប្រកាន់ពូជសាសន៍​ ពណ៌សម្បុរ ​និងនិន្នាការ​អ្វីឡើយ។  

លោក តូច ចាន់នី អគ្គនាយកសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទាថ្លែងបែបនេះ ខណៈបានជួបគ្រួសារធម៌​របស់កុមារា​ ទូច​ សំបូរ​ នៅព្រឹកថ្ងៃទី ៤ ខែតុលា ឆ្នាំ ២០២២ នាទីស្ដីការក្រសួង។ កុមារា​ ទូច​ សំបូរ ត្រូវបានលោកស្រី Tonya Hooper និងលោក Michael Hooper បានយកទៅព្យាបាលភ្នែក និងព្យាបាលជើង នៅប្រទេសអូស្ត្រាលី និងបន្ទាប់មកត្រូវបានគ្រួសារទំនុកបម្រុងឲ្យនៅរៀនសូត្រ ចាប់តាំងពីឆ្នាំ ២០១៦មក។ បច្ចុប្បន្ននេះ កុមារា​ ទូច​ សំបូរ​ រៀនចប់ថ្នាក់ទី ៦ហើយនឹងបន្តចូលរៀនថ្នាក់អនុវិទ្យាល័យនៅឆ្នាំក្រោយ។

ដោយឡែក​ ស្ថានភាពជំងឺភ្នែក​ និងជើងរបស់កុមារា​ ទូច​ សំបូរ​ បានល្អប្រសើរ​ នឹងឈានទៅរកការជាសះស្បើយ​ ក្រោយ ពីការព្យាបាលយ៉ាងយកចិត្តពីក្រុមគ្រូពេទ្យ​ និងការថែទាំយ៉ាងយកចិត្តទុកដាក់ពីក្រុមគ្រួសារធម៌។ ជារៀងរាល់ឆ្នាំ នៅក្នុងឱកាសបុណ្យភ្ជុំបិណ្ឌ និងចូលឆ្នាំខ្មែរ គ្រួសារ Michael Hooper និងលោកស្រី Tonya Hooper បាននាំកុមារារូបនេះ មកលេងប្រទេសកម្ពុជា។

ក្នុងឱកាសភ្ជុំបិណ្ឌឆ្នាំនេះផងដែរ Chloe ដែលជាកូនស្រីគ្រួសារធម៌​ បាននាំកុមារា ទូច សំបូរ មកលេងស្រុកកំណើត និងបាននាំទៅជួបថ្នាក់ដឹកនាំ ដែលមានលោក តូច ចាន់នី អគ្គនាយក នៃអគ្គនាយកដ្ឋានសេវាសង្គមកិច្ច​ តំណាងរដ្ឋមន្ត្រី​ ដើម្បីជម្រាបអំពីស្ថានភាពរបស់កុមារា​ ទូច​ សំបូរ​ ដែលរស់នៅប្រទេសអូស្ត្រាលី។

លោកអគ្គនាយក ​ក្នុងនាមក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ បានថ្លែងអំណរគុណដល់គ្រួសារលោក​ Michael Hooper និងលោកស្រី Tonya Hooper ដែលបានថែទាំបីបាច់កុមារារូបនេះបានល្អ ផ្តល់ក្តីស្រឡាញ់​ និងភាពកក់ក្តៅ​ ដល់កុមារា​ ទូច​ សំបូរ​ ដូចកូន​បង្កើត។ លោកអគ្គនាយក ក៏បានថ្លែងអំណរគុណដល់រដ្ឋាភិបាលអូស្រ្តាលី​ ដែលបានអនុញ្ញាតឲ្យកុមារ​រូបនេះ​ បានរស់នៅ​ព្យាបាល​ និងរៀនសូត្រ​ នៅប្រទេសអូស្ត្រាលី​ ដែលកាយវិការនេះ​ ជាការគិតគូរឧត្តមប្រយោជន៍ដល់កុមារ​ ដោយមិនប្រកាន់ពូជសាសន៍​ ពណ៌សម្បុរ ​និងនិន្នាការ​អ្វីឡើយ។

សូមជម្រាបថា​ កុមារា​ ទូច​ សំបូរ​ ជាកុមារមានពិការភាព​ និងត្រូវបានបោះបង់ចោល​ ហើយត្រូវយកមករស់នៅ​ និងចិញ្ចឹមបីបាច់ថែរក្សានៅក្នុងបុរីទារក​ និងកុមារជាតិ​ មុននឹងទទួលបានការអនុញ្ញាតពីរាជរដ្ឋាភិបាលកម្ពុជា​ ឲ្យទៅរស់នៅជាមួយគ្រួសារធម៌ នៅប្រទេសអូស្ត្រាលី ​កាលពីឆ្នាំ ២០១៦៕

អត្ថបទ៖ វិមាន