សាលារៀន៦កន្លែងនៅស្រុកត្បូងឃ្មុំត្រូវបានផ្អាក ខណៈទឹកទន្លេមេគង្គជន់លិច

យោងតាមរបាយការណ៍របស់មន្ទីរអប់រំខេត្តត្បូងឃ្មុំ បានបញ្ជាក់ទៀតថា សាលារៀនចំនួន៦កន្លែង ក្នុងស្រុកត្បូងឃ្មុំ ត្រូវបានផ្អាកការសិក្សារបស់សិស្សដោយសារទឹកជំនន់ទន្លេមេគង្គបានជន់លិចផ្លូវ និងលិចបន្ទប់រៀន។

បេីតាមការបញ្ជាក់ពីលោក អ៉ិន ពៅសម្បត្តិ ប្រធានមន្ទីរអប់រំ យុវជន និងកីឡា ខេត្តត្បូងឃ្មុំ បានប្រាប់ឲ្យដឹងថា សាលារៀនចំនួន៦កន្លែង ដែលស្ថិតក្នុងកម្រិតបឋមសិក្សាត្រូវបានជន់លិចដោយសារទឹកជំនន់ទន្លេមេគង្គ និងមានភ្លៀងធ្លាក់ប៉ុន្មានថ្ងៃនេះ។ លោកប្រធានមន្ទីរ បញ្ជាក់ទៀតថា សាលាបឋមសិក្សាទាំង៦កន្លែងនេះ គឺស្ថិតក្នុងឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ ហើយដែលធ្វើឲ្យសិស្សានុសិស្សផ្អាកសិក្សាទាំងស្រុងរង់ចាំទឹកស្រកវិញនោះមានចំនួន១៨៨៥នាក់។

យោងតាមរបាយការណ៍របស់មន្ទីរអប់រំ ខេត្តត្បូងឃ្មុំ បានបញ្ជាក់ទៀតថា សាលាដែលផ្អាកការបង្រៀន និងសិក្សារួមមាន៖ សាលាបឋមសិក្សាបឹងព្រះ សាលាបឋមសិក្សាបឹងទន្សោង សាលាបឋមសិក្សារកាធំ សាលាបឋមសិក្សា ឈេីទាល សាលាបឋមសិក្សាកំពុងឬស្សី និងសាលាបឋមសិក្សាជីរោទ៍កណ្តាល ក្នុងស្រុកត្បូងឃ្មុំ ៕

អត្ថបទ៖ ឡេក ចាន់ពេជ្រ