ព័ត៌មានជាតិ

ផ្ទុះរាតត្បាតកូវីដខេត្តត្រាត ជាប់ខេត្តកោះកុង អាជ្ញាធរឲ្យពលរដ្ឋឃ្លាំមើលជនចំណូលថ្មី

បានផុស

៤ years មុន

នៅ

ថ្ងៃព្រហស្បតិ៍ ៣១ ធ្នូ ២០២០

ដោយ

រដ្ឋបាលខេត្តកោះកុង បានជូនដំណឹងពីករណីផ្ទុះអ្នកឆ្លងកូវីដនៅខេត្តត្រាតរបស់ថៃ ដែលជាប់ព្រំប្រទល់ខេត្តកោះកុង។ អាជ្ញាធរណែនាំ ពលរដ្ឋទូទាំងខេត្តបង្កើនការប្រុងប្រយ័ត្នចូលរួមទប់ស្កាត់ និងតាមដានអ្នកចំណូលថ្មី អាចមានការលួចឆ្លងដែនដោយខុសច្បាប់តាមច្រករបៀងផ្លូវគោក ឬផ្លូវទឹក។

រដ្ឋបាលខេត្តលើកឡើងពីផលវិបាកធ្ងន់ធ្ងរ បើមិនអាចកាត់ផ្តាច់ខ្សែចម្លងជាយថាហេតុ អាចឲ្យមានការបិទសាលារៀន ឈានទៅបិទភូមិស្រុក ផលិតផលមិនអាចលក់ចេញបាន ភ្ញៀវទេសចរក៏មិនអាចមកលេង ដែលអាចប៉ះពាល់ចំណូលនិងជីវភាពរបស់បងប្អូនប្រជាពលរដ្ឋនៅក្នុងខេត្ត។

នៅព្រឹកនេះដែរ ក្រសួងសុខាភិបាលបានរាយការករណីពលករខ្មែរពីរនាក់ ធ្វើដំណើរមកពីប្រទេសថៃបានឆ្លងកូវីដ ១៩។ តាមការបង្ហាញអត្តសញ្ញាណពលករទាំងពីរនាក់ជាស្រ្តីក្នុងវ័យជាង ៣០ ឆ្នាំ។

ប្រទេសថៃ បានរាយការករណីផ្ទុះឆ្លងកូវីដទ្រង់ទ្រាយធំក្នុងខេត្តសមុទ្រសាខន និងបានរាលដាលទូទាំងប្រទេស។ អាជ្ញាធរថៃបានបញ្ជាឲ្យបិទខេត្តជាប្រភពគ្រឿងសមុទ្រដ៏ធំនេះ ដោយរឹតបន្តឹងការធ្វើដំណើរចេញចូល។

រដ្ឋាភិបាលកម្ពុជាក៏បានបញ្ជាឲ្យអាជ្ញាធរខេត្តជាប់ព្រំដែនថៃ ត្រូវគ្រប់គ្រងលំហូរពលករខ្មែរដែលវិលត្រឡប់ពីថៃ ត្រូវឆែកសុខភាពឲ្យបានហ្មត់ចត់បំផុត ធ្វើតេស្តសំណាក និងត្រូវធ្វើចត្តាឡីស័កឲ្យគ្រប់ ១៤ ថ្ងៃ ជាចាំបាច់ ដើម្បីការពារការឆ្លងរាលដាលក្នុងប្រទេស៕