សម្ដេចតេជោ ៖ បក្សនយោបាយទាំងអស់ ពិតជាដើរតួនាទីសំខាន់ចូលរួមធ្វើឲ្យប្រសើរឡើង នូវនិរន្តភាពប​រិស្ថាន និងការអភិវឌ្ឍប្រកបដោយចីរភាព

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានលើកឡើងថា គណបក្សនយោបាយទាំងអស់ ពិតជាដើរតួនាទីយ៉ាងសំខាន់ ក្នុងការចូលរួមធ្វើឲ្យប្រសើរឡើងនូវនិរន្តភាពប​រិស្ថាន និងការអភិវឌ្ឍប្រកបដោយចីរភាព។

សម្ដេចតេជោ ហ៊ុន សែន មានប្រសាសន៍ក្នុងពិធីបើកសន្និសីទគណបក្សអន្តរជាតិ ក្រោមប្រធានបទ «គោលនយោបាយបរិស្ថាន និងការអភិវឌ្ឍប្រកបដោយចីរភាព» ដែលធ្វើឡើងដោយប្រព័ន្ធអនឡាញ នៅរសៀលថ្ងៃទី ៦ ខែតុលានេះថា ក្នុងនាមប្រជាជន និងគណបក្សប្រជាជនកម្ពុជា សម្ដេចសូមថ្លែងនូវការអបអរសាទរយ៉ាងកក់ក្ដៅ ចំពោះគណបក្សរុស្ស៊ីរួបរួម ដែលប្រារព្ធខួបលើទី ២១ និងសូមប្រសិទ្ធពរឲ្យគណបក្សនេះសម្រេចបាននូវបេសកកម្មដ៏ថ្លៃថ្លា ជាប្រវត្តិសាស្រ្ដរបស់ខ្លួន។

នៅក្នុងឱកាសនេះដែរ សម្ដេចតេជោ ហ៊ុន សែន ក៏បានថ្លែងអំណរគុណ និងកោតសរសើរដោយស្មោះចំពោះលោក ឌីមីទ្រី មេដវេដេវ ប្រធានគណបក្សរុស្ស៊ីរួបរួម ដែលបានរៀបចំសន្និសីទដ៏មានសារៈសំខាន់នេះ ដើម្បីផ្លាស់ប្ដូរទស្សនៈ និងបទពិសោធន៍ពាក់ព័ន្ធនឹងបរិស្ថាន និងការអភិវឌ្ឍប្រកបដោយចីរភាព សំដៅរួមគ្នាដោះស្រាយបញ្ហាប្រឈមដ៏ធំរបស់មនុស្សជាតិ។

ជាមួយគ្នានេះដែរ សម្ដេចតេជោ ហ៊ុន សែន បានថ្លែងថា ក្នុងស្ថានភាព ដែលពិភពលោកមានបញ្ហាប្រឈមជាច្រើន គណបក្សនយោបាយទាំងអស់ ពិតជាដើរតួនាទីយ៉ាងសំខាន់ ក្នុងការចូលរួមធ្វើឲ្យប្រសើរឡើងនូវនិរន្តភាពប​រិស្ថាន និងការអភិវឌ្ឍប្រកបដោយចីរភាព ក៏ដូចជាធានាបាននូវការលើកកម្ពស់ជីវភាព សុខុមាលភាព និងវិបុលភាពរបស់ប្រជាពលរដ្ឋ និងភពផែនដីទាំងមូល ផងដែរ៕

អត្ថបទ៖ ឃួន សុភ័ក្រ