រដ្ឋមន្ត្រី​ក្រសួង​កិច្ចការ​នារី ធ្លាប់​ធ្វើ​គ្រូពេទ្យ​នៅ​ប្រទេស​បារាំង​ មាន​ស្វាមីអតីត​អភិបាល​រងក្រុង

លោកស្រី​បណ្ឌិត អ៉ឹ​ង កន្ថាផាវី ទទួលតំណែង​​ជា​រដ្ឋមន្ត្រី​ក្រសួង​កិច្ចការ​នារី​ក្នុង​ខែ​កក្កដា ឆ្នាំ២០០៤។

ជាបញ្ញវន្ត​ដែល​ទទួល​ការ​សិក្សា​នៅ​ក្រៅប្រទេស​ លោក​ស្រីធ្លាប់​​បម្រើការងារ​ជា​វេជ្ជបណ្ឌិត​ជាច្រើន​ឆ្នាំ​នៅ​ប្រទេស​បារាំង មុន​វិលត្រឡប់​មក​ប្រទេស​កម្ពុជា​។ លោក​ស្រី​ក៏​មាន​ស្វាមី​ជា​មន្ត្រី​ជាន់ខ្ពស់​ ជា​អតីត​អភិបាល​រង​រាជធានី​ភ្នំពេញ និង​បច្ចុប្បន្ន​កំពុង​កាន់​តំណែង​ជា​រដ្ឋលេខាធិការ​នៅ​ក្រសួង​សាធារណការ​និង​ដឹក​ជញ្ជូន។

ក្រុម​គ្រួសារ

លោកស្រី អ៉ឹ​ង កន្ថាផាវី ​កើត​នៅ​ថ្ងៃ ១៦ កក្កដា ឆ្នាំ ១៩៦០។ ឪពុកលោក​ស្រី​គឺ​លោក អ៉ឹ​ង គៀត អតីត​ឧ​ត្ត​ម​ប្រឹក្សា​ផ្ទាល់​ព្រះមហា​ក្សត្រ ធ្លាប់​កាន់​តួនាទី​ជា​រដ្ឋមន្ត្រី​សង្គមកិច្ច​​ ក្នុង​សម័យ​សង្គម​រាស្រ្តនិយម​របស់​​ព្រះបរមរតនកោដ្ឋ​សម្តេច ព្រះករុណាព្រះបាទសម្តេចព្រះ នរោត្តម សីហនុ និងក៏​ជា​អតីត​រដ្ឋមន្រ្តីក្រសួង​សាធារណការ​និង​ដឹក​ជញ្ជូនក្រោយ​ការ​បោះឆ្នោត​ឆ្នាំ ១៩៩៣។

ស្វាមី​របស់​លោក​ស្រី​ជា​អតីត​អភិបាល​រង​រាជធានី​ភ្នំពេញ​គឺ​លោក ត្រាក់ ថៃសៀង ដែល​បច្ចុប្បន្ន​ជា​រដ្ឋលេខាធិការ​ក្រសួង​សាធារណការ​និង​ដឹក​ជញ្ជូន។

កាន់​តំណែង​ជា​រដ្ឋមន្ត្រី​ក្រសួង​កិច្ចការ​នារី

មុនពេលទទួល​តំណែង​​ជា​រដ្ឋមន្ត្រី​ក្រសួង​កិច្ចការ​នារី​ក្នុង​ឆ្នាំ២០០៤ លោកស្រី អ៉ឹ​ង កន្ថាផាវី ​បាន​បម្រើការ​រយៈពេល​ប្រាំ​ឆ្នាំ​ជា​រដ្ឋលេខាធិការ​ក្រសួង​កិច្ចការ​នារី និង​អតីត​យុទ្ធជន (បច្ចុប្បន្ន​ក្រសួង​កិច្ចការ​នារី) ដោយ​ទទួល​ខុសត្រូវ​អំពី​គោលនយោបាយ យុទ្ធសាស្ត្រ និង​ផែនការ​សកម្មភាព​ឆ្លើយតប​នឹង​យេនឌ័រ។

តួនាទី​ទទួល​ខុសត្រូវ

ក្រៅ​ពី​ទទួលខុសត្រូវ​លើ​ការ​គ្រប់គ្រង​និង​ការ​ដឹកនាំ​នៅ​ក្រសួង​កិច្ចការ​នារី លោកស្រី​ក៏​ជា​ប្រធាន​ក្រុមប្រឹក្សា​ជាតិ​កម្ពុជា​ដើម្បី​ស្ត្រី​ក្នុង​ឆ្នាំ ២០០៤។

អតីត​គ្រូពេទ្យនៅបារាំង

ក្នុង​ទសវត្សរ៍​ឆ្នាំ ១៩៩០ លោក​ស្រី​​អ៉ឹ​ង កន្ថាផាវី ធ្វើការ​ភាគច្រើន​នៅ​ប្រទេស​បារាំងជា​វេជ្ជបណ្ឌិត​ឯកជន​ពី​ឆ្នាំ ១៩៩០ ដល់​ឆ្នាំ ១៩៩៤ និង​ជា​ប្រធាន​នាយកដ្ឋាន​ស្រាវជ្រាវ​ឱសថ​នៅ ABR (សហគ្រាស​បារាំង​ដែល​ពាក់ព័ន្ធ​ទីផ្សារ​ឱសថ និង​ការស្រាវជ្រាវ​ឱសថ) ពី​ឆ្នាំ ១៩៩៧ ដល់​ឆ្នាំ ១៩៩៨​។

លោក​ស្រីទទួលបានតួនាទី​ជា​អគ្គលេខាធិការ​រង​អង្គការ​​ក្រៅរ​ដ្ឋាភិបាល AMC (Association des Medecins Cambodgiens) សម្រាប់​គម្រោង​ផ្តល់ជំនួយផ្នែកវេជ្ជសាស្រ្ត និងសង្គម​ដល់​ប្រទេស​កម្ពុជា តាមរយៈ​ការបរិច្ចាគ​សម្ភារៈ​បរិក្ខារពេទ្យ និង​ថ្នាំពេទ្យ ព្រមទាំង​បញ្ជូន​ក្រុម​គ្រូពេទ្យ​មក​កម្ពុជា ដើម្បី​ថែទាំ​ប្រជាជន​ក្រីក្រ​នៅ​តាម​ជនបទ និង​លើក​កំពស់​សមត្ថភាព​ក្រុម​គ្រូពេទ្យមូលដ្ឋាន។

ពី​ឆ្នាំ ១៩៩៥ ដល់ ១៩៩៧ លោកស្រី​​​ជាទីប្រឹក្សា​បច្ចេកទេស​របស់​ក្រសួង​អភិវឌ្ឍន៍ជនបទក្នុង​ប្រទេសកម្ពុជា ដោយ​ទទួលខុសត្រូវលើសុខភាពសហគមន៍ (អាហារូបត្ថម្ភ អនាម័យ ព័ត៌មាន​សុខភាព) និង​កម្មវិធីអភិវឌ្ឍន៍​សហគមន៍ រួមទាំង​មីក្រូឥណទាន និង​ការ​គ្រប់គ្រងទឹក ផលិតកម្ម​កសិកម្ម​ខ្នាតតូចប្រកបដោយនិរន្តរភាព។

ការ​សិក្សា

លោក​ស្រី​ទទួល​សញ្ញាប័ត្រ​បណ្ឌិត​ផ្នែក​វេជ្ជសាស្ត្រ​ពី​សាកលវិទ្យាល័យ Saint Antoine ទីក្រុង​ប៉ារីស ដែល​មាន​ឯកទេស​ខាង​អាហារូបត្ថម្ភ និង​ជំងឺត្រូពិកខល (tropical diseases) និង​សញ្ញាប័ត្រ (Brevet) រដ្ឋបាល​សាធារណៈ​ពី​សាលា Ecole Nationale d’Administration (ENA) ប្រទេស​បារាំង​នៅ​ឆ្នាំ ១៩៩៥។

លោក​ស្រី​បាន​ចូលរួម​ក្នុង​កម្មវិធី​ “អ្នកដឹកនាំ​ក្នុង​ការ​អភិវឌ្ឍន៍៖ ការ​គ្រប់គ្រង​កំណែ​ទម្រង់​នយោបាយ និង​សេដ្ឋកិច្ច” នៅ​សាលា John F. Kennedy School of Government នៃ​សាកលវិទ្យាល័យ Harvard នៅ​ឆ្នាំ​២០០៤។

ពានកិត្តិយស

លោកស្រី អ៉ឹ​ង កន្ថាផាវី ទទួល​បានការសរសើរលើស្នាដៃការងារ ក្នុង​ភាព​ជាអ្នកដឹកនាំ​លើ​ការ​ពង្រឹង​ភាពអង់អាច​ដល់ស្រ្តី និង​សមភាព​យេនឌ័រ “Leadership in Women Empowerment and Gender Equality” ពីសាកលវិទ្យាល័យ លីមកុកវីង “Limkokwing University”។

ក្នុងឆ្នាំ ២០១៤ លោកស្រី​គឺជា​អ្នកដឹកនាំម្នាក់ក្នុងចំណោមស្ត្រីទាំងប្រាំបួន ដែលបាន​ទទួល​រង្វាន់​ពី​វេទិកាភាព​ជាអ្នកដឹកនាំ​ស្ត្រីនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ជា “ស្ត្រីឆ្នើមបំផុត”។

ស្នាដៃ

លោក​ស្រី ​អ៉ឹ​ង កន្ថាផាវី ​ជា​ស្ថាបនិកមួយ​រូប​នៃ​មូលនិធិ​ទ្រង់ទ្រង់​មន្ទីរពេទ្យ​នគរទេព​ដែល​ឯកទេស​ព្យាបាល​រោគ​ស្រ្តី ហើយ​​កន្លង​ទៅ​ធ្លាប់​ត្រូវ​ប្រើប្រាស់​ជា​ទីតាំង​​​សម្រាប់​ព្យាបាល​អ្នក​ឆ្លង​កូវីដ ១៩។

ក្រោមការដឹកនាំរបស់លោកស្រី ក្រសួងកិច្ចការនារី​បាន​ទទួល​ជោគជ័យ​ក្នុងការ​ធ្វើសមាហរណកម្ម​វិធានការ​សមភាព​យេនឌ័រ​ទៅក្នុងច្បាប់សំខាន់ៗ​ដូចជា ច្បាប់​ភូមិបាល ច្បាប់​សរីរាង្គវិមជ្ឈការ និង​វិសហមជ្ឈការ ច្បាប់ពាក់ព័ន្ធនឹងការប្រយុទ្ធប្រឆាំងអំពើហិង្សាលើស្ត្រី ដូចជា​ការ​ប្រឆាំង​ការជួញ​ដូរមនុស្ស ច្បាប់​ស្តីពីការ​ធ្វើអាជីវកម្មផ្លូវភេទ ច្បាប់ស្តីពីអំពើហិង្សាក្នុងគ្រួសារ និងការ​ការពារ​ជនរងគ្រោះ។

លោកស្រី​តែងតែ​តស៊ូមតិ​សម្រាប់បញ្ហាយេនឌ័រ​ក្នុងកំណែទម្រង់រដ្ឋ និង​លើក​កម្ពស់​ការពង្រឹង​សេដ្ឋកិច្ច​របស់ស្ត្រី និង​តួនាទី​ធ្វើការសម្រេចចិត្ត។

នៅក្នុងតំបន់​និងជុំវិញពិភពលោក រដ្ឋមន្ត្រី ផាវី បាន​ចូលរួម​ចំណែកក្នុងការ​ជំរុញរបៀបវារៈរបស់ស្ត្រី ជាពិសេស​នៅក្នុងកិច្ចប្រជុំ​ថ្នាក់រដ្ឋមន្ត្រី​សមភាពយេនឌ័រអាស៊ីបូព៌ា វេទិកា​ថ្នាក់​រដ្ឋមន្ត្រី​អាស៊ីបូព៌ា​ស្តីពីគ្រួសារ និង​កិច្ចប្រជុំរដ្ឋមន្ត្រីអាស៊ានស្តីពីស្ត្រី៕