អ៊ីអនម៉ល មានជ័យ‍ ដាំកូនឈើក្រោមប្រធានបទ «ការបង្កើតព្រៃឈើក្នុងមាតុភូមិកំណើតជាមួយ អ៊ីអន»

​​ក្រុមហ៊ុន អ៊ីអន ម៉ល (ខេមបូឌា) ខូអិលធីឌី បានប្រារព្ធពិធីដាំកូនឈើក្រោមប្រធានបទ «ការបង្កើតព្រៃឈើក្នុងមាតុភូមិកំណើតជាមួយនឹងអ៊ីអន» កាលពីថ្ងៃទី៨ ខែតុលា ឆ្នាំ២០២២ ដែលបានប្រព្រឹត្តទៅនៅមុនពេលបើកសម្ពោធផ្សារទំនើប ទី៣ គឺ «ផ្សារទំនើប អ៊ីអនម៉ល មានជ័យ»​ នៅក្នុងប្រទេសកម្ពុជា។

​ពិធីដាំកូនឈើ «ការបង្កើតព្រៃឈើក្នុងមាតុភូមិកំណើតជាមួយនឹងអ៊ីអន» មានគោលបំណងបង្កើតផ្សារទំនើបដែលហ៊ុំព័ទ្ធដោយរុក្ខជាតិពណ៌បៃតងនៅក្នុងសហគមន៍មូលដ្ឋាននៃបរិវេណផ្សារទំនើបសាងសង់ថ្មីជាមួយប្រជាពលរដ្ឋក្នុងសហគមន៍តំបន់នោះ​ និងយកចិត្តទុកដាក់ថែទាំ​ ដើម្បីក្លាយជាផ្សារទំនើបដែល​បណ្តុះស្មារតីសហគមន៍បៃតង។

ពិធីដាំកូនឈើនេះ​ បានធ្វើឡើងក្រោមអធិបតីភាពរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជា ព្រមទាំងការចូលរួមពីសំណាក់ប្រជាពលរដ្ឋ សិស្សានុ សិស្សខ្មែរ និងជប៉ុន​ប្រមាណជាង ១ពាន់នាក់។ ក្នុងពិធីដាំកូនឈើនេះ គឺមានកូនឈើ ១៣​​​ប្រភេទ ដូចជា ៖ Crinum Lily, Spider Lily , Western Sword Fern​ ជាដើម ដែលជាពូជកូនឈើដុះនៅក្នុងតំបន់ ហើយមានចំនួនសរុបប្រហែល ៨ពាន់ដើម។

គួរជម្រាបថា កន្លងមកនេះ ក្រុមហ៊ុន អ៊ីអនម៉ល (ខេមបូឌា) ខូអិលធីឌី បានដាំកូនឈើប្រហែល ២២ ០០០ដើម នៅមុនពេលបើកសម្ពោធផ្សារទំនើប អ៊ីអនម៉ល ភ្នំពេញ​ និង​ផ្សារទំនើប អ៊ីអនម៉ល សែនសុខស៊ីធី។ ក្រុមហ៊ុន អ៊ីអនម៉ល និងប្រទេសកម្ពុជា ធ្លាប់បានផ្សារភ្ជាប់នូវទំនាក់ទំនងយ៉ាងល្អជាមួយគ្នា តាមរយៈអង្គការមូលនិធិបរិស្ថានអ៊ីអន និង​AEON 1% CLUB ក្នុងការគាំទ្រ និងជួយឧបត្ថម្ភដល់កម្មវិធីសម្ពោធសាលារៀនក្នុងព្រះរាជាណាចក្រកម្ពុជា និងការដាំដើមឈើនៅជុំវិញបរិវេណប្រាសាទអង្គរវត្ត ដែលជាបេតិកភណ្ឌពិភពលោក និងនៅតំបន់ប្រាសាទចៅស្រីវិបុល រួមទាំងក្នុងតំបន់មជ្ឈមណ្ឌលគាំពារសត្វព្រៃភ្នំតាម៉ៅ ផងដែរ៕

ដោយ៖ ធឿន វ៉ាន់សុង