អាជ្ញាធរប្រាប់ម្ចាស់អាងចិញ្ចឹមក្រពើ២កន្លែងព័ទ្ធសំណាញ់លួសឱ្យរឹងមាំខណៈទឹកកំពុងលិច

កំពង់ឆ្នាំង៖ អាជ្ញាធរស្រុកបរិបូរណ៌ និងមន្ត្រីជំនាញបានចុះទៅណែនាំដល់អ្នកចិញ្ចឹមក្រពើនៅក្នុងឃុំឆ្នុកទ្រូក ឱ្យព័ទ្ធរបាំងលួសសំណាញ់ ដើម្បីការពារសត្វក្រពើកុំឱ្យចេញពីអាង ខណៈដែលទឹកទន្លេឡើងលិចអាងចិញ្ចឹមក្រពើ។

លោក ផល សុភាព អភិបាលរងស្រុកបរិបូរណ៌ បានឱ្យដឹងនៅថ្ងៃទី ០៩ ខែតុលាថា ក្រោយទទួលដំណឹងថា មានអាង​ចិញ្ចឹម​ក្រពើចំនួន ២កន្លែងប្រឈមនឹងសត្វក្រពើរួចចេញពីរអាង ព្រោះតែទឹកទន្លេជន់ឡើង លោកក៏បានដឹកនាំ​មន្ត្រីជំនាញ និងសមត្ថកិច្ចចុះទៅណែនាំដល់ម្ចាស់អាងចិញ្ចឹមក្រពើ ត្រូវយករបាំងលួសសំណាញ់​ព័ទ្ធបន្ថែមពីលើ​របាំងសាច់អួន ដែលម្ចាស់ អាងចញ្ចឹមក្រពើព័ទ្ធពីមុន ដើម្បីឲ្យមានសុវត្ថិភាព កុំឲ្យសត្វក្រពើចេញពីអាងបង្កគ្រោះ​ថ្នាក់ដល់ពលរដ្ឋ ដោយសារក្រពើមានទំហំធំៗព្រោះបានចិញ្ចឹមច្រើនឆ្នាំមកហើយ។

អាជ្ញាធរ ស្រុកបរិបូរណ៌បានបញ្ជាក់ថា ក្នុងឃុំឆ្នុកទ្រូ មានកន្លែងចិញ្ចឹមក្រពើចំនួន ០៩ កន្លែង ប៉ុន្តែ ២កន្លែងបានប្រឈម​នឹងគ្រោះថ្នាក់ បើក្រពើរួចចេញពីអាង និង០៦ កន្លែងទៀតទឹកលិចមិនទាន់ដល់នៅឡើយ។ ទោះយ៉ាងណា អាជ្ញាធរ មូលដ្ឋានក្រើនរំលឹកដល់អ្នកចិញ្ចឹមក្រពើទាំងអស់ ត្រូវតែប្រុងប្រយ័ត្នខ្ពស់ ដើម្បីការពារសុវត្ថិភាពទាំងអស់៕ អត្ថបទ៖ ឈៀង ថារិទ្ធ