ព័ត៌មានជាតិ

ទំនប់ស្ទាក់ទឹក ៤ កន្លែង ក្លាយជាគោលដៅទេសចរណ៍ថ្មីនៅខេត្តបាត់ដំបង

បានផុស

២ years មុន

នៅ

ថ្ងៃចន្ទ ១០ តុលា ២០២២

ដោយ

មន្ត្រីអាជ្ញាធរខេត្តបានអះអាងថា ខេត្តបាត់ដំបងនឹងមានកំណើនភ្ញៀវទេសចរ តាមរយៈការអភិវឌ្ឍទំនប់ស្ទាក់ទឹកជាបន្តបន្ទាប់ ដែលបានក្លាយជាគោលដៅទេសចរណ៍ថ្មីនៅលើទឹកដីខេត្តបាត់ដំបង។

ក្រៅពីទំនប់អាងកំពីងពួយដ៏ពេញនិយម បើតាមលោក ហម អារុណ ប្រធានការិយាល័យ ឧស្សាហកម្ម ទេសចរណ៍ខេត្តបាត់ដំបងបានឲ្យដឹងថា បច្ចុប្បន្នទំនប់ទាំង៤ទីតាំងនៅខេត្តបាត់ដំបង តែងតែមានភ្ញៀវមកលេងកម្សាន្តជាបន្តបន្ទាប់ហើយខាងមន្ទីរគ្រោងដាក់បញ្ជូលជាតំបន់ទេសចរណ៍ជាផ្លូវការតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឲ្យដឹងទៀតថា ទីតាំងទំនប់ទាំង ៤ នោះមាន៖

១-ទំនប់បាសាក់មានទីតាំងក្នុងឃុំបាសាក់ ស្រុករុក្ខគិរី ដែលមានចម្ងាយ ៧៨គ.មពីទីរួមខេត្ត។ សក្តានុពលកន្លែងនេះគឺទេសភាពដងស្ទឹង កន្លែងងូតទឹកកម្សាន្ត ទស្សនាផ្ទាំងថ្មធំៗជាដើម។

២-ទំនប់កង្ហត មានទីតាំងភូមិកង្ហត ឃុំកន្ទឺ១ ស្រុកបាណន់ មានចំងាយ ៣៥ គ.មពីទីរួមខេត្ត មានកន្លែងជិះទូកលំហែរ និងមានសេវាកម្មម្ហូបអាហារ និងភេសជ្ជៈ និងតូបជួលអង្គុយលម្ហែផងដែរ ។

៣-ទំនប់អាងភាស ស្ថិតនៅភូមិគោកដូង ឃុំពាមឯក ស្រុកឯកភ្នំ មានចំងាយ ២០ គ.មពីទីរួមខេត្ត មានអាងទឹកប្រវត្តិសាស្ត្រ ប៉ុល ពត កន្លែងលេងទឹក តំបន់នេសាទ កន្លែងចិញ្ចឹមសត្វក្រពើ ត្រី និង អាងស្តុកទឹក ដែលមានសេវាម្ហូបអាហារ និងភេសជ្ជៈ សេវាដឹកភ្ញៀវតាមទូក តួបជួលអង្គុយលម្ហែ។

៤-ទំនប់ពហុបំណង “ទំនប់សេកសក” ជាប្រភេទធម្មជាតិកែច្នៃមានទីតាំងភូមិសេកសក ឃុំផ្លូវមាស ស្រុករតនមណ្ឌលមានចំងាយ ៤៥ គ.មពីទីរួមខេត្ត។ ភ្ញៀវទេសចរអាចគយគន់ទេសភាពលើទំនប់ កន្លែងលេងទឹក តំបន់នេសាទ វាលស្រែ ដែលមានសេវាកម្ម ម្ហូបអាហារ និងភេសជ្ជៈ សេវាដឹកភ្ញៀវតាមទូក តូបជួលអង្គុយលម្ហែរជាដើម៕

អត្ថបទ៖ សៅ សារិទ្ធ