ភ្ញៀវទេសចរជិត ១៦ម៉ឺននាក់ ទៅកម្សាន្តក្រុងព្រះសីហនុ នាចុងសប្តាហ៍នេះ

នៅចុងសប្តាហ៍នេះ ពោលនៅថ្ងៃសៅរ៍ និងថ្ងៃអាទិត្យ ថ្ងៃទី៨ និង៩ ខែតុលា ឆ្នាំ២០២២នេះ មានភ្ញៀវទេសចរជាតិ និង អន្តរជាតិ មកលេងកម្សាន្តនៅក្នុងក្រុងព្រះសីហនុប្រមាណជិត ១៦ម៉ឺននាក់ មានការកើនឡើងក្រោយមានការដាក់ឱ្យដំណើរការសាកល្បងផ្លូវល្បឿនលឿន ភ្នំពេញ-ព្រះសីហនុ រួចមក។

បើតាមរដ្ឋបាលខេត្តព្រះសីហនុបានឱ្យដឹងថា ក្នុងចំណោមភ្ញៀវទេសចរជាតិ និងអន្តរជាតិប្រមាណជិត ១៦ម៉ឺននាក់ ក្នុងនោះមកលេងកម្សាន្តនៅថ្ងៃទី៨ ខែតុលា ឆ្នាំ២០២២ សរុបប្រមាណជិត ៥ម៉ឺននាក់ និងថ្ងៃទី៩ ខែតុលា ឆ្នាំ២០២២មានចំនួនសរុប ១១ម៉ឺននាក់។

រដ្ឋបាលខេត្តព្រះសីហនុបានបញ្ជាក់ថា មូលហេតុដែលបណ្តាលឱ្យមានកំណើនភ្ញៀវទេសចរកើនឡើង គឺក្រោយមានការដាក់ឱ្យដំណើរការសាកល្បងផ្លូវល្បឿនលឿន ភ្នំពេញ-ព្រះសីហនុ រយៈពេល ១ខែ ចាប់ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២ ដោយមិនមានការបង់ប្រាក់ និងការអភិវឌ្ឍហេដ្ឋារចនាសម្ព័ន្ធ ការរៀបចំការពារសន្តិសុខ សណ្តាប់ធ្នាប់ អនាម័យ បរិស្ថានបានយ៉ាងល្អប្រសើរ ដែលជាការទាក់ទាញភ្ញៀវទេសចរជាតិ និងអន្តរជាតិ ចង់មកកម្សាន្តក្នុងខេត្តព្រះសីហនុ៕

អត្ថបទ៖ សំអឿន