ជំនន់ទឹកអូរជាប់ព្រំដែនថៃបន្តហក់ឡើង អាជ្ញាធរ​​ដាក់កម្លាំងដើម្បីជួយសង្គ្រោះ

តំបន់ទំនាបមួយចំនួននៅក្នុងខេត្តបាត់ដំបង ជាប់ព្រំដែនប្រទេសថៃ ត្រូវបានទឹកជំនន់ដែលជន់ជោរពីអូរព្រំដែន​លិច​លង់​ជាបណ្តើរៗហើយ ដែលបច្ចុប្បន្នកំពុងត្រូវបានអាជ្ញាធរ និងកម្លាំងវរ:ព្រំដែនប្រើមធ្យោបាយមួយចំនួនដើម្បីជួយសង្គ្រោះ។

គួរបញ្ជាក់ថា កាលពីថ្ងៃទី១១ ខែតុលា ឆ្នាំ២០២២ ទឹកអូរព្រំដែនថៃបានហក់ឡើងយ៉ាងខ្លាំងដែលធ្វើអោយច្រកអន្តរជាតិដូង ត្រូវបានផ្អាកការធ្វើចរាចរដោយសារតែខ្លាចជួបនឹងគ្រោះថ្នាក់ណាមួយជាយថាហេតុ ព្រោះកម្លាំងទឹកហូរខ្លាំង។

រហូតមកដល់ព្រឹកថ្ងៃទី១២ ខែតុលា នេះ ផ្លូវមួយខ្សែក្នុងភូមិលំផាត់ ឃុំអូរដា ស្រុកកំរៀង ដែលស្ថិតនៅក្បែរព្រំដែនថៃ ត្រូវបានអាជ្ញាធរចុះផ្អាកមិនអោយធ្វើចរាចរឆ្លងកាត់ឡើយ ដោយសារតែទឹកជំនន់បានហក់ឡើងខ្លាំងបណ្តាលអោយលិចដល់ជាងពាក់កណ្តាលនៃបង្កាន់ដៃស្ពាន។

ចាប់តាំងពីល្ងាចមុិញមក ទាំងអាជ្ញាធរស្រុក ក៏ដូចជាកម្លាំងវរ:ការពារព្រំដែនលេខ៨១៩ បានដាក់កាណូតស្មាច់ដើម្បីជួយអន្តរាគមន៍ដល់ប្រជាពលរដ្ឋដែលត្រូវធ្វើដំណើរឆ្លងកាត់តាមផ្លូវមួយខ្សែ លើកំណាត់ផ្លូវស្ពានលំផាត់នេះ ដោយសារតែផ្លូវនេះ ជាផ្លូវដ៏មានសារ:សំខាន់ក្នុងការផ្សាភ្ជាប់ទៅកាន់ភូមិសំរោង និងភូមិតាំងយូរ ជាដើម ដើម្បីដឹកនាំកសិផលរបស់ប្រជាពលរដ្ឋមកកាន់ផ្លូវជាតិ និងទីផ្សារព្រំដែន។

មកដល់ព្រឹកនេះ បើតាមប្រភពពីប្រជាពលរដ្ឋបានបញ្ជាក់ថា កម្ពស់ទឹកមិនទាន់មានការស្រកចុះនៅឡើយទេ ដោយឡែកក្បាលស្ពានទាំងសងខាង អាចមានការខូចខាតយ៉ាងធ្ងន់ធ្ងរផងដែរ ដោយសារកម្លាំងទឹកច្រោះ ដោយនាំយកដីក្បាលស្ពានទៅជាមួយ ព្រមទាំងមានការលិចដល់ផលដំណាំ និងលំនៅឋានមួយចំនួនផងដែរ ៕

អត្ថបទ៖ សោ និយមរ័ត្ន