ទំនប់អាងទឹកកំពីងពួយ ប្រេះបាក់ជាច្រើនម៉ែត្រដោយសារទឹករលកបោកច្រោះ

ខ្នងទំនប់អាងទឹកកំពីងពួយ កំពុងមានការប្រេះបាក់ច្រាំងដោយអន្លើ បន្ទាប់ពីមានទឹកជំនន់ដ៏ធំផង និងដោយសារកម្លាំងទឹករលកផង ដែលបានបោកខ្ទប់ខ្នងទំនប់ បណ្តាលអោយជើងទេទំនប់ទទួលរងនូវការប្រេះបាក់អស់ជាច្រើនម៉ែត្រ។

កាលពីថ្ងៃ​ទី១១​ ខែ​តុលា​ ឆ្នាំ​២០២២ ឯកឧត្តម​ សុខ​ លូ​ អភិបាលនៃគណអភិបាលខេត្តបាត់ដំបង​ អមដំណើរដោយឯកឧត្តម​អភិបាល​រង​នៃគណៈអភិបាល​ខេត្ត​ លោ​ក​ប្រធានស្តីទីមន្ទីរ​ធនធានទឹក​ និងឧតុនិយម​ខេត្តបាត់ដំបង​ និងសហការី ​ មន្ទីរជំនាញពាក់ព័ន្ធ អាជ្ញាធរស្រុកបាណន់ និងកងកម្លាំងប្រដាប់អាវុធ​ ​បានចុះពិនិត្យស្ថានភាពរលកបោកបក់ធ្វេីឲ្យដាច់ជេីងទេទំនប់អាងទី២​ នៃអាងទឹកកំពីងពួយ​ ។

នៅក្នុងនោះដែរ ជាក់ស្តែងតំបន់ដែលមានការពាក់ព័ន្ធ ពិសេសគឺស្ថានភាពទំនប់អាងទី២​ ពុំទាន់រងនូវផលប៉ះពាល់ធ្ងន់ធ្ងរទេ​ ប៉ុន្តែទោះបីជាយ៉ាងណា ចំពោះកិច្ចការងារ​នេះមន្ទីរតែងតែធ្វើជារៀងរាល់​ឆ្នាំនាពេលចុង​រដូវវស្សា។

ក្រោយពីការចុះពិនិត្យរួចមក ឯកឧត្តមអភិបាលខេត្ត បានបញ្ជាក់ទៅក្រុមការងារនៃមន្ទីរ​ធនធានទឹក​ និងឧតុនិយម​ខេត្ត ធ្វើយ៉ាងណា ត្រូវរៀបចំផែនការជួសជុលឡើងវិញ ក្រោយពីផុតរដូវភ្លៀង ពិសេសគឺរដូវប្រាំងនាពេលខាងមុខ ដើម្បីសុវត្ថិភាពដល់ប្រជាពលរដ្ឋ អំពីបញ្ហាបាក់ទំនប់ដូចកាលពីប៉ុន្មានឆ្នាំមុន៕

អត្ថបទ៖ សោ និយមរ័ត្ន