បែក​ឆ្នាំ ១៩៧៩ លោក ខៀវ កាញារីទ្ធ ផ្តើម​​អាជីព​ពី​​​អ្នក​កាសែត​​​ក្លាយជា​រដ្ឋមន្ត្រីក្រសួង​ព័ត៌មាន​

ក្រោយ​បែក​របប​ប៉ុលពត នៅ​ឆ្នាំ ១៩៧៩ លោក ខៀវ កាញារីទ្ធ ចាប់ផ្តើមអាជីពការងារ​ជានិពន្ធ​នាយកកាសែត។ ​ជាច្រើន​ឆ្នាំ​ បាន​​ក្លាយជាទីប្រឹក្សានាយករដ្ឋមន្រ្តី មន្រ្តីក្រសួងព័ត៌មាន និង​ទទួល​តំណែង​ជា​រដ្ឋមន្រ្តី​នៅ​ឆ្នាំ ២០០៤។

ជា​រដ្ឋមន្រ្តី​ដ៏​លេចធ្លោ​មួយ​រូប ក្រៅ​ពី​ក្នុងឆាកនយោយបាយ លោកក៏ជា​រដ្ឋមន្រ្តី​សកម្មនៅលើ​បណ្តាញ​សង្គម​ ​​ដែល​លោក​តែងតែ​ចែករំលែក​ព័ត៌មាន​ពី​សង្គម និង​ការ​កម្សាន្តផ្សេងៗ។

ក្រុម​គ្រួសារ

លោក ខៀវ កាញារីទ្ធ កើត​នៅ​ថៃ្ងទី ១៣ កញ្ញា ឆ្នាំ ១៩៥១ នៅ​សង្កាត់​លេខ ២ ក្រុង​ភ្នំពេញ ជា​កូន​ទី​ពីរ​ក្នុង​ចំណោម​បង​ប្អូន ៩ នាក់ ដែល​មាន​បិតា​នាម​ខៀវ ថន ជា​អតីត​មន្រ្តី​គយ​និង​រដ្ឋាករ ហើយ​មាតា​ក៏​ជា​អតីត​មន្រ្តី​គយ​និង​រដ្ឋាករ​ផង​ដែរ។

លោក​បាន​រៀប​អាពាហ៍ពិពាហ៍​ជាមួយ​លោក​ស្រី ទេព រង្ស៉ី ជា​ឱសថការី​នៅ​មន្ទីរពេទ្យ​កាល់ម៉ែត​ភ្នំពេញ ហើយ​មាន​បុត្រី​ឈ្មោះ ខៀវ ទេពសត្យា ជា​អនុប្រធាន​នាយកដ្ឋាន​បច្ចេកវិទ្យា​ព័ត៌មាន​និងគមនាគមន៍​នៃ​ក្រសួង​ព័ត៌មាន។

ជា​រដ្ឋមន្រ្តី​ក្រសួង​ព័ត៌មាន លោក​ក៏​ជា​សមាជិក​បណ្ឌិត​សភា​វិទ្យាសាស្រ្ត​នយោយបាយ​នៃ​ទីក្រុង​ញូយ៉កសហរដ្ឋ​អាមេរិក។

ការសិក្សា

លោក​បាន​ចូល​សិក្សា​នៅ​សាលាបឋមសិក្សា​មជ្ឍឹម​ខេត្ត​បាត់ដំបង និង​ផ្លាស់​មក​សាលា​បឋម​សិក្សា​ពៅអ៊ុំ​ភ្នំពេញ។ ពី​ឆ្នាំ ១៩៧០ ដល់ ១៩៧៥ លោក​បាន​ចូល​សិក្សា​នៅ​មហាវិទ្យាល័យ​នីតិសាស្រ្ត​និង​វិទ្យាសាស្រ្ត​សេដ្ឋកិច្ច និង​ពី​ឆ្នាំ ១៩៧២ ដល់ ១៩៧៥​ ជា​សិស្ស​មន្រ្តី​ជាន់ខ្ពស់​ខាងការ​ទូត​នៃ​សាលា​ជាតិ​រដ្ឋបាល​ជំនាន់​ទីពីរ។

បទ​ពិសោធន៍​ការងារ

ការងារក្នុងនីតិបញ្ញត្តិ៖

-ឆ្នាំ ១៩៨១ ដល់ ១៩៩៣ ជាតំណាងរាស្រ្តប្រចាំខេត្តកណ្តាល
-ឆ្នាំ ១៩៩៣ ដល់ ១៩៩៨ ជាតំណាងរាស្រ្តប្រចាំរាជធានីភ្នំពេញ
-ឆ្នាំ ១៩៩៨ ដល់បច្ចុប្បន្ន ជាតំណាងរាស្រ្តប្រចាំខេត្តកំពង់ចាម

ការងារក្នុងនីតិប្រតិបត្តិ៖

-ពីឆ្នាំ ១៩៧៩ ដល់ ១៩៩០៖ ជានិពន្ធនាយកកាសែតកម្ពុជា
-ពីឆ្នាំ ១៩៩១ ដល់ ១៩៩៣៖ ជាទីប្រឹក្សានាយករដ្ឋមន្រ្តី
-ពីឆ្នាំ ១៩៩១ ដល់ ១៩៩៣៖ ជាប្រធានក្រុមលេខាធិការរបស់រដ្ឋកម្ពុជា នៅក្នុងឧត្តមក្រុមប្រឹក្សាជាតិ :
-ពីឆ្នាំ ១៩៩៣ ដល់ ២០០៤៖ ជារដ្ឋលេខាធិការក្រសួងព័ត៌មាន
-ពីឆ្នាំ ២០០៤ ដល់បច្ចុប្បន្ន៖ ជារដ្ឋមន្រ្តីក្រសួងព័ត៌មាន

ស្នាដៃ​ការងារ

​ក្រោមការ​ដឹកនាំជា​រដ្ឋមន្រ្តី​​ក្រសួង​ព័ត៌មាន លោក​បាន​សម្រច​​ការងារ​ធំៗ​ដូចជា៖

ក/ពង្រឹង និងពង្រីកអង្គភាពផ្សព្វផ្សាយជាតិ (ទាំងថ្នាក់ជាតិ និងថ្នាក់ក្រោមជាតិ)

ឈរលើទិសស្លោក​ “ប្លែក លឿន ទុកចិត្តបាន ពេលណា ទីណាក៏បាន” លោក​រដ្ឋមន្រ្តី​បាន​ធ្វើទំនើបកម្ម ហេដ្ឋារចនាសម្ព័ន្ធអង្គភាពផ្សព្វផ្សាយដែលមានស្រាប់ និងបង្កើតបន្ថែមនូវមធ្យោបាយផ្សព្វផ្សាយបែបទំនើប​រួមមាន៖

១). បង្កើនម៉ោងផ្សាយស្ថានីយ៍ទូរទស្សន៍ជាតិ​ពី ១២ ម៉ោង ទៅ ២៤ម៉ោងក្នុងមួយថ្ងៃ ដោយផ្សាយតាមស្ថានីយ​លើដី ​(Terrestrial) តាមខ្សែកាប តាមផ្កាយរណប និងផ្សាយតាមប្រព័ន្ធអ៊ីនធឺណិត។ វិទ្យុជាតិបានបង្កើនកម្លាំងផ្សាយ​ពី២០០​ KW ទៅ៦០០​ KW សម្រាប់វិទ្យុ AM ៩១៨ KHz  វិទ្យុ FM វត្តភ្នំ ១០៥.៧០MHz មានកម្លាំងផ្សាយ៣០KW​ និងវិទ្យុ FM ជាតិ ៩៦ MHz អនុភាពផ្សាយ ២០ KWនិង ផ្សាយតាមប្រព័ន្ធអ៊ីនធឺណិតផងដែរ។
២). តម្លើងស្ថានីយ៍ទូរទស្សន៍ជាតិកម្ពុជា២ (ទទក២) និងស្ថានីយ៍ទូរទស្សន៍ជាតិកម្ពុជាតាមបណ្តាខេត្ត បានចំនួន ៩ ស្ថានីយន៏ និងស្ថានីយ៍វិទ្យុ FM ជាតិ តាមបណ្តាខេត្តបានចំនួន២៣ ខេត្ត។
៣). តម្លើង App ក្រសួងព័ត៌មាន និងបណ្តាញផ្សព្វផ្សាយសង្គមដូចជា Website YouTube Facebook Telegram Tik Tok និង​Twitter ដើម្បីផ្សព្វផ្សាយបន្តពីទូរទស្សន៍ជាតិ វិទ្យុជាតិ ទីភ្នាក់ងារសារព័ត៌មានកម្ពុជា (AKP) មន្ទីរព័ត៌មានរាជធានី-ខេត្ត និងអង្គភាពផ្សព្វផ្សាយឯកជនមួយចំនួន។  បន្ថែមពីនេះ គ្រប់មន្ទីរព័ត៌មានទាំង ២៥ រាជធានី-ខេត្ត សុទ្ធតែមានគេហទំព័រ Facebook Page និងTV Online​របស់ខ្លួនផងដែរ។
៤). ពង្រីកការផ្សាយជាភាសាអង់គ្លេស បារាំង ចិន វៀតណាម ចាម និងអារ៉ាប់។

ខ/ កសាងឯកសារគតិយុត្តិ និងស្ថានភាព និងការកសាងសមត្ថភាពមន្ត្រីរាជការក្រសួង

-ផ្តល់សិទ្ធិពេញលេញជូនគ្រប់មន្ទីរព័ត៌មាន រាជធានី-ខេត្ត ក្នុងការចេញលិខិតបន្តអាជ្ញាបណ្ណជូនគ្រប់ស្ថានីយវិទ្យុ ទូរទស្សន៍ អង្គភាពសារព័ត៌មានក្នុងស្រុក និងអង្គភាពបោះពុម្ពផ្សាយនានា ដែលស្ថិតក្រោមសមត្ថកិច្ចក្រសួងព័ត៌មាន ក្នុងក្របខណ្ឌដែនដីរាជធានី-ខេត្តរៀងៗខ្លូន។
-ធ្វើប្រតិភូកម្មផ្ទេរមុខងារ ក្នុងការផ្តល់សេវារដ្ឋបាលលើវិស័យ ព័ត៌មានជូនរាជធានី-ខេត្ត។
-សហការជាមួយក្រសួងសេដ្ឋកិច្ច និងហិរញ្ញវត្ថុ ក្រសួងប្រៃសណីយ៍ និងទូរគមនាគមន៍ និងក្រុមសម្ព័ន្ធទូរទស្សន៍កម្ពុជា ក្នុងការបង្កើតថ្នាលទូរទស្សន៍ Digital ដែលនឹងដាក់ឱ្យដំណើរការពេញលេញ ១០០% នៅឆ្នាំ ២០២៣ ដើម្បី​ឈាន​ទៅសម្រេចបាននូវការផ្លាស់ប្តូរប្រព័ន្ធផ្សាយទូរទស្សន៏ទាំងអស់នៅកម្ពុជា ពីប្រព័ន្ធអាណាឡូក(Analogue) ទៅជាប្រព័ន្ធឌីជីថល (Digital) នៅត្រឹមឆ្នាំ២០២៥។
-ចេញ​ប្រកាសអន្តរក្រសួង រវាងក្រសួងព័ត៌មាន ក្រសួងមហាផ្ទៃ និងក្រសួងប្រៃសណីយ៏ និងទូរគមនាគមន៏ស្តីពីការគ្រប់គ្រងការផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមប្រព័ន្ធអ៊ីនធឺណិតនៅព្រះរាជាណាចក្រកម្ពុជា។
-បង្កើតគណៈកម្មការតាមដាន វាយតម្លៃ និងលើកសរសើរការអនុវត្តក្រមសីលធម៌ វិជ្ជាជីវៈសារព័ត៌មាន។
-បានចេញប្រកាសអន្តរក្រសួង រវាងក្រសួងព័ត៌មាន និងក្រសួងពាណិជ្ជកម្មស្តីពីការគ្រប់គ្រងការចុះបញ្ជីពាណិជ្ជកម្ម និងកិច្ចការពារម៉ាកនិងពាណិជ្ជនាម សម្រាប់អាជ្ញា បណ្ណលើវិស័យព័ត៌មាន និងសោតទស្សន៏
-បានចេញប្រកាសអន្តរក្រសួង រវាងក្រសួងព័ត៌មាន ក្រសួងប្រៃសនីយ៍និងទូរគមនាគមន៍ និងរដ្ឋលេខាធិការដ្ឋានអាកាសចរណ៍ស៊ីវិល ស្តីពីវិធានការទប់ស្កាត់ និងលុបបំបាត់ការឆ្លងរំខានចូលហ្រ្វេកង់ប្រព័ន្ធឧបការណ៍វិទ្យុនាំផ្លូវអាកាស ក្នុងដែនអាកាស នៃព្រះរាជាណាចក្រកម្ពុជា។
-ពន្លឿនការបញ្ចប់កិច្ចពីគ្រោះយោបល់ជាមួយក្រសួង-ស្ថាប័នពាក់ព័ន្ធ លើសេចក្តីព្រាងច្បាប់ស្តីពីសិទ្ធិទទួលព័ត៌មាន និងបានបង្កើតគណៈកម្មការរៀបចំធ្វើវិសោធនកម្មច្បាប់របបសារព័ត៌មាន ឆ្នាំ១៩៩៥ ជាដើម។

លោក​ក៏​បាន​ចងក្រង​និង​បោះពុម្ភ​ផ្សាយ​សៀវភៅមួយ​ចំនួន​​ដូចជា៖

១-ញញឹមចុងក្រោយ
២-ឆ្ងាយហួសពីជើងមេឃ ‹បកប្រែ›
៣-អប្សរានៃអង្គរ ‹បកប្រែ›
៤-អ្នកដែលឃ្លាតឆ្ងាយ
៥-ការហិនហោចព្រៃឈើ ‹បកប្រែ›
៦-អគ្គមហាសេនា ‹បកប្រែ›

ទទួលបាន​សញ្ញាបត្រ​បណ្ឌិត​កិត្តិយសពី​ព្រះអង្គ​ម្ចាស់ក្សត្រី​ថៃ

កាលពី​ខែមីនា ឆ្នាំ ២០២២ លោក ខៀវ កាញារីទ្ធ ទទួលបាន​សញ្ញាបត្រ​បណ្ឌិត​កិត្តិយស​គរុកោសល្យ​សារព័ត៌មាន មនុស្សសាស្ត្រ និង​សង្គមសាស្ត្រ​ពី​សកលវិទ្យាល័យ រ៉ាច្ចមុងឃុន តិចណូឡូជី ប្រាណាខន ប្រទេសថៃ ក្នុង​ស្នាដៃ​ដែល​លោក​បាន​ចូលរួម​យ៉ាងសកម្ម​ក្នុង​វិស័យ​ព័ត៌មាន និង​ផ្សព្វផ្សាយ ដើម្បី​ផ្ដល់​ប្រយោជន៍​ដល់​ប្រទេសជាតិ និង​សង្គមជាតិ​។

សញ្ញាបត្រ​បណ្ឌិត​កិត្តិយស​នេះ​ត្រូវ​បានប្រគល់​ដោយផ្ទាល់​ពី​ព្រះអង្គ​ម្ចាស់ក្សត្រី​មហាចក្រី សិរិនថន ដែលមើល​លើ​លក្ខណៈសម្បត្តិ​ដែល​លោក​បាន​ចូលរួម​ពាំនាំ​យក​សន្តិភាព ការផ្សះផ្សា​ជាតិ និង​ស្ថិរភាព​នយោបាយ តាមរយៈ​ការប្រើប្រាស់​សិល្បៈ​នៃ​ការផ្សព្វផ្សាយ​ព័ត៌មាន និង​ទំនាក់ទំនង​នយោបាយ ព្រមទាំង​សមិទ្ធផល​ជាច្រើន​ទៀត​នៅ​ប្រទេស​កម្ពុជា​។

សារសំខាន់ៗ

​ក្នុង​វេទិកា​ផ្សេងៗ លោក ខៀវ កាញារីទ្ធ​ បាន​លើក​​ពាក់ព័ន្ធការងារ​​​វិជ្ជាជីវៈសារព័ត៌មាន។

-កិច្ច​ការងារ​ដំបូង​របស់​អ្នកសារព័ត៌មាន គឺ​ត្រូវ​យល់​ច្បាស់​ពី​វិជ្ជាជីវៈ យល់​ពី​សិទ្ធិ​ខ្លួន​ឯង និង​សិទ្ធិ​អ្នកដទៃ។
-អ្នកកាសែត​ដែល​ពូកែ ត្រូវ​ហ៊ាន​ហែល​បញ្ច្រាស​ទឹក​អាច​សរសេរ​ព័ត៌មាន​ដែល​គេ​មិន​យល់ ឲ្យ​គេ​យល់​បាន។
-សីលធម៌​គឺ​ជា​អាវក្រោះ​សម្រាប់​អ្នកសារព័ត៌មាន។
-ព័ត៌មាន​មាន​វិជ្ជាជីវៈ​ធ្វើឲ្យ​សង្គម​មានសុខដុម មាន​ភាព​រីកចម្រើន។
-សង្គមប្រជាធិបតេយ្យ សារ​ព័ត៌មាន​មាន​ត្រូវតែ​មានការ​ចូលរួម​ពី​ប្រជាជន។
-កុំ​ខ្វល់​បញ្ហា​ព័ត៌មាន​ក្លែងក្លាយ (Fake News) សំខាន់​បំផុត​ស្ថាប័ន​ដែល​រង​ព័ត៌មាន​មិន​ពិត​មិន​ត្រូវ​ដេកលក់ និង​ត្រូវ​បំភ្លឺ​ដោយ​ព័ត៌មាន​ពិត​ឲ្យ​បាន​ឆាប់​រហ័ស។
-មិន​ត្រូវ​មាន​ទស្សនៈ​ថា​អ្នក​សរសេរ​អត្ថបទ​អវិជ្ជមាន​សរសេរ​អាក្រក់​​ សុទ្ធ​តែ​អ្នកប្រឆាំង៕