ទោះបីកូវីដ-១៩ មិនទាន់ស្ងប់ស្ងាត់ ប្រជាពលរដ្ឋនៅតែសម្រុកចេញទៅស្រុកកំណើតយ៉ាងកុះករក្នុងថ្ងៃឆ្លងឆ្នាំ

ឆ្នាំនេះប្រជាពលរដ្ឋក្នុងក្រុងចេញដំណើចេញទៅស្រុកកំណើតយ៉ាងណែនតាន់តាប់ខុសប្លែកពីថ្ងៃធម្មតា ខណៈសម័យកាលជំងឺកូវីដ-១៩ មិនទាន់ស្ងប់ស្ងាត់។

យោងតាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅទទួលបន្ទុកសណ្តាប់ធ្នាប់ចរាចរណ៍បានឲ្យដឹងថា នារសៀលថ្ងៃទី ៣១ ខែធ្នូនេះ នៅតាមដងផ្លូវជាតិលេខ ១ចាប់តាំងពីគល់ស្ពានព្រះមុនីវង្សចាស់ថ្មីរហូតដល់សង្កាត់ព្រែកឯងគឺចរាចរណ៍ណែនណាន់តាន់តាប់ខុសប្លែកពីថ្ងៃធម្មតា។ តាមប្រភពពីអ្នកធ្វើដំណើដែលបានឆ្លងកាត់ច្បារអំពៅប្រាប់ថា ពួកគាត់ចេញដំណើទៅស្រុកកំណើតដើម្បីទៅជួបជុំក្រុមគ្រួសារក្នុងថ្ងៃឆ្លងឆ្នាំសកលនាយប់ថ្ងៃទី ៣១ ខែធ្នូឈានចូលថ្ងៃទី ១ ខែមករា ឆ្នាំ២០២១។

ដោយឡែកនៅប៉ែកក្បាលថ្នល់វិញគឺចរាចរណ៍កកស្ទះ បើទោះជាកម្លាំងកងរាជអាវុធហត្ថរាជធានីភ្នំពេញ សហការណ៍ជាមួយកម្លាំងនគរបាលចរាចរណ៍ចុះសម្រួលចរាចរណ៍យ៉ាងណាក៏នៅតែកកស្ទះ។

ទាក់ទិនការកកស្ទះចរាចរណ៍ខាងលើនេះ លោក ឡុង ង៉ែត អភិបាលរងខណ្ឌមានជ័យបានបញ្ជាក់ថា នៅថ្ងៃទី ៣១ ខែធ្នូនេះនៅតាមដងផ្លូវក្នុងមូលដ្ឋានខណ្ឌមានជ័យ រាជធានីភ្នំពេញ ពិតជាមានប្រជាពលរដ្ឋធ្វើដំណើចេញទៅស្រុកកំណើតយ៉ាងច្រើនកុះករប្រាកដមែន ខុសប្លែករាល់ថ្ងៃដែលចរាចរណ៍មិនសូវមមាញឹកនោះទេ។

ទោះជាយ៉ាងណាក៏សមត្ថកិច្ចនិងអាជ្ញាធរបានជួយសម្រួលចរាចរណ៍ដើម្បីកុំឲ្យអ្នកដំណើមានការត្អូញត្អែ។ ប៉ុន្តែសំណូមពរដ៏ទទូចរបស់លោកឡុង ង៉ែត គឺសុំឲ្យបងប្អូនអ្នកដំណើកុំបើកបរលឿនហួសការកំណត់ព្រោះងាយនឹងគ្រោះថ្នាក់ ដោយសារអ្នកបើកបរមិនគោរពច្បាប់ចរាចរណ៍៕

អត្ថបទ៖ នរា

ចុចអាន៖ កុមារាអាយុថ្លៃពីគ្រោះថ្នាក់ចរាចរណ៍ដ៏រន្ធត់នៅ​ស្រុកថ្មគោល បានទទួលថវិកាឧបត្ថម្ភ ១ លានរៀល

ចុចអាន៖ អាជ្ញាធរ​ក្រុង​ប៉ោយប៉ែត បួងសួង​ ដើម្បី​បញ្ចៀស​គ្រោះថ្នាក់​ចរាចរណ៍នៅ​ឆ្នាំ​២០២១