សពជនរងគ្រោះចុងក្រោយក្នុងឧបទ្ទវហេតុលិចទូកនៅភូមិកោះចំរើនបានរកឃើញហើយនៅព្រឹកថ្ងៃទី១៥តុលានេះ

ស្នងការនគរបាលខេត្តកណ្ដាល នៅព្រឹកថ្ងៃទី១៥ ខែតុលា ឆ្នាំ២០២២នេះ បានឲ្យដឹងថា សពក្មេងប្រុងសិស្សសាលាចុងក្រោយក្នុងឧបទ្ទវហេតុលិចទូកដចម្លងនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល ត្រូវបានកម្លាំងរុករកបានរកឃើញហើយនៅវេលា​ម៉ោង​៦:១៥នាទី​ព្រឹកនេះ។ ជនរងគ្រោះចុងដែលកងកម្លាំងទើបរកឃើញមានឈ្មោះ មាស សុវណ្ណរាជ ភេទប្រុស អាយុ១២ឆ្នាំ មុខរបរសិស្ស។

សូមបញ្ចាក់ថា ក្នុងឧបទ្ទវហេតុលិចទូកចម្លងសិស្សសាលានៅភូមិកោះចំរើន ឃុំកំពង់ភ្នំ ស្រុកលើកដែក នេះ កងកម្លាំងរុករកបានរកឃើញជនរងគ្រោះសរុប១៥នាក់ ក្នុងនោះស្លាប់១១នាក់ (ស្រី៣នាក់) និងជួយសង្គ្រោះទាន់ពេល៤នាក់ ហើយសពក្មេងប្រុសឈ្មោះ មាស សុវណ្ណរាជ អាយុ១២ឆ្នាំ គឺជាសពចុងក្រោយគេដែលកម្លាំងរុករកទើបតែរកឃើញនៅព្រឹកថ្ងៃទី១៥ ខែតុលានេះ។

គួរំលឹកថា កាលពីព្រលប់ថ្ងៃទី១៣ ខែតុលា ឆ្នាំ២០២២ មានករណីលិចទូកដចម្លងសិស្សសាលាមួយបណ្ដាលឲ្យជនរងគ្រោះចំនួន១៥នាក់បានបាត់ខ្លួន និងរកឃើញជាបន្តបន្ទាប់ភ្លាមៗចំនួន៣នាក់។ ករណីនេះបានកើតឡើងនៅចំនុចភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល៕