រដ្ឋាភិបាលនឹងប្រារព្ធពិធីផ្ទេរតំណែងរដ្ឋមន្ត្រីកសិកម្មថ្មី នៅរសៀលថ្ងៃទី១៧តុលាស្អែកនេះ

រាជរដ្ឋាភិបាលនឹងប្រារព្វពិធីផ្ទេរតំណែងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថ្មីនៅរសៀល ថ្ងៃទី​១៧តុលាឆ្នាំ២០២២ស្អែកនេះ ក្រោមអធិបតីភាពអគ្គបណ្ឌិតសភាចារ្យ អូនព័ន្ធ មុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាតំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

យោងតាមសេចក្តីប្រកាសកម្មវិធីផ្ទេរតំណែងបានឱ្យដឹងថា លោក ឌិត ទីណា ត្រូវបានរាជរដ្ឋាភិបាលតាំងតាំងជា​រដ្ឋមន្ត្រីថ្មី នៃក្រសួងកសិកម្ម រុក្ខាប្រមាញ់ និងនេសាទជំនួសលោក វេងសាខុន ដែលត្រូវបានតែងតាំង​ជារដ្ឋមន្ត្រីប្រតិភូ​អមនាយករដ្ឋមន្ត្រី។

លោក ឌិត ទីណា ជាអតីតរដ្ឋលេខាធិការក្រសួងរ៉ែ និងថាមពល ត្រូវបានរាជរដ្ឋាភិបាលស្នើសុំរដ្ឋសភា បោះឆ្នោតផ្តល់​សេចក្តីទុកចិត្តជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជំនួសលោក វេង សាខុន ដែលត្រូវបានបញ្ចប់​មុខតំណែង ហើយត្រូវបានតែងតាំងរដ្ឋមន្ត្រីប្រតិភូអមនាយករដ្ឋមន្ត្រីកាលពីព្រឹកថ្ងៃទី ១៤ ខែ តុលា ឆ្នាំ២០២២។ នៅរសៀលថ្ងៃទី ១៤ ខែតុលា ឆ្នាំ២០២២ ព្រះករុណា​ ព្រះបាទសម្តេច នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យត្រាស់បង្គាប់តែងតាំងលោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

គួរបញ្ជាក់ថា លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ត្រូវបានព្រះមហាក្សត្រចេញ​ព្រះរាជក្រឹត្យបញ្ចប់មុខដំណែងនៅថ្ងៃទី ៨ ខែតុលា ឆ្នាំ ២០២២៕

អត្ថបទ៖ សំអឿន