សម្ដេចតេជោ ហ៊ុន សែន ៖ បើគណបក្សណា ផ្សាភ្ជាប់ខ្លួនជាមួយទណ្ឌិត សម រង្ស៊ី នឹងត្រូវទទួលបានការប្ដឹងទៅតុលាការ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា ប្រសិនបើគណបក្សនយោបាយណាមួយ ផ្សាភ្ជាប់ខ្លួនជាមួយទណ្ឌិត សម រង្ស៊ី អតីតមេបក្សប្រឆាំងនោះ នឹងត្រូវទទួលបាននូវការប្ដឹងផ្ដល់ទៅកាន់តុលាការ។

សម្ដេចតេជោ ហ៊ុន សែន បានថ្លែងក្នុងពិធីប្រគល់សញ្ញាបត្រដល់និស្សិត នៃសាកលវិទ្យាល័យជាតិគ្រប់គ្រងជាង ៦ពាន់នាក់ នាព្រឹកថ្ងៃទី ១៧ ខែតុលានេះថា នៅព្រឹកមិញនេះ សម្ដេចបានឃើញព័ត៌​មានមួយ ដែលអតីតមេបក្សប្រឆាំង បានចេញសេចក្ដីថ្លែងការណ៍មួយ ដោយថា នៅឆ្នាំ ២០២៣ខាងមុខផ្ដួលរំលំសម្ដេចឲ្យបាន រួមទាំងឲ្យកងកម្លាំងប្រដាប់អាវុធក្រោកឈរ ប្រឆាំងរាជរដ្ឋាភិបាលផងដែរ។

សម្ដេចតេជោ ហ៊ុន សែន បានថ្លែងបន្តថា «ឆ្នាំ ២០២៣ គឺជាឆ្នាំបោះឆ្នោត តើអ្នកឯងចង់ប្រើកម្លាំងប្រដាប់អាវុធ? តើអ្នកឯងចេញដំណើរតាមបែបហិង្សា ផ្ដួលរំលំ ក្រៅប្រព័ន្ធប្រជាធិបតេយ្យ ចាំឲ្យបានគណបក្សណាក៏ដោយ ដែលផ្សាភ្ជាប់ខ្លួនជាមួយទណ្ឌិតនេះ នឹងត្រូវទទួលបាននូវការប្ដឹងផ្ដល់ទៅកាន់តុលាការ ចាំឲ្យច្បាស់ទណ្ឌិតរត់ចោលគុក»៕