រដ្ឋមន្ត្រីក្រសួងកសិកម្មថ្មី មិនមានបំណងផ្លាស់ប្ដូរតំណែងមន្ត្រីនៅក្នុងក្រសួងនោះទេ

ថ្លែងក្នុងសន្និសីទសារព័ត៌មាននៅថ្ងៃទី ១៧ ខែតុលា ឆ្នាំ២០២២ លោក ឌិត ទីណា រដ្ឋមន្ត្រីក្រសួងកសិកម្មថ្មី បានឲ្យដឹងថា ក្រោយចូលកាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រូបលោកមិនមានបំណងតែងតាំង ឬផ្លាស់ប្តូរតំណែងមន្ត្រីនៅក្រសួងនោះទេ។

លោករដ្ឋមន្ត្រីបានថ្លែងដូច្នេះថា៖ «សម្រាប់លោក គឺមិនមានគំនិតអគតិណាមួយចំពោះការតែងតាំង ឬការផ្លាស់ប្ដូរមុខតំណែងមន្ត្រីនៅក្រសួងកសិកម្មនាពេលនេះទេ ដោយហេតុថា លោកទើបតែទទួលបានការតែងតាំង និងចូលកាន់តំណែងជារដ្ឋមន្ត្រីថ្មី ដែលមិនទាន់អាចវាយតម្លៃបានណាយ៉ាងទៅលើមន្ត្រីនៅក្រសួងបាននៅឡើយ»។

សម្រាប់ខុទ្ទកាល័យរដ្ឋមន្ត្រី លោកបានបញ្ជាក់ថា ខុទ្ទកាល័យ គឺមានតួនាទីត្រឹមជាជំនួយការឲ្យរដ្ឋមន្ត្រីតែប៉ុណ្ណោះ មិនមានតួនាទី ឬការងារអ្វីនៅក្រសួងនោះឡើយ។ ដូច្នេះ ខុទ្ទកាល័យ នឹងរំលាយដោយខ្លួនឯងនៅពេលដែលមានការផ្លាស់ប្ដូររដ្ឋមន្ត្រី។

ប៉ុន្តែយ៉ាងណា លោករដ្ឋមន្ត្រី បានគូសបញ្ជាក់ថា នៅពេលជាក់ស្ដែងណាមួយ ដែលជាតម្រូវការចាំបាច់របស់ក្រសួង ការផ្លាស់ប្តូរតំណែងនឹងអាចកើតមាន។

ក្នុងន័យនេះលោកបានសង្កត់ធ្ងន់ថា ការតែងតាំង ឬផ្លាស់ប្តូរថ្នាក់ដឹកនាំ ឬមន្ត្រីរាជការគ្រប់ជាន់ថ្នាក់របស់ក្រសួងកសិកម្ម គឺមិនមែនដើម្បីបង្កើតឲ្យមានបក្ខពួកនិយម ហើយបំផ្លាញដល់សាមគ្គីភាពផ្ទៃក្នុងរបស់ក្រសួងនោះឡើយ។

លោករដ្ឋមន្ត្រីចង់ឲ្យមានការបំពេញការងារដោយការសហការ ប្រកបដោយស្មារតីស្ថាបនា និងសាមគ្គីភាពផ្ទៃក្នុងរបស់ក្រសួងកសិកម្ម រុក្ខាប្រមាញ់ និងនេសាទ ឲ្យមានភាពរឹងមាំ ដើម្បីបន្តដំណើរក្នុងការបម្រើផលប្រយោជន៍ជាតិ និងប្រជាជន ជាពិសេសការរួមគ្នាដោះស្រាយបញ្ហាប្រឈមលើវិស័យកសិកម្ម ដើម្បីធានាលើកកម្ពស់វិស័យកសិកម្មរបស់កម្ពុជាឲ្យកាន់តែរីកចម្រើនថែមទៀត៕

ដោយ៖ ធឿន វ៉ាន់សុង