អាជ្ញាធរខេត្តកណ្តាល ចាប់ផ្តើមពង្រឹងការគ្រប់គ្រងការបើកអាជីវកម្មទូកដរចម្លងគ្រប់ប្រភេទឡើងវិញ

អាជ្ញាធរខេត្តកណ្តាលបានចាប់ផ្តើមពង្រឹងការគ្រប់គ្រងការបើកអាជីវកម្មទូកដរចម្លងគ្រប់ប្រភេទឡើងវិញ ក្រោយមានឧបទ្ទេវហេតុលិចទូកដរចម្លងកាលពីពេលថ្មីៗនេះបណ្តាលឱ្យសិស្សសាលាស្លាប់បាត់បង់ជីវិតចំនួន១១នាក់រួចមក។

នៅក្នុងកិច្ចប្រជុំពិនិត្យ ពង្រឹងទូកដរចម្លងនៅក្នុងភូមិសាស្ត្រខេត្តកណ្ដាល កាលពីរសៀលថ្ងៃទី១៩ ខែតុលា លោក​ ណុប ដារ៉ា អភិបាលរងខេត្តកណ្តាល បានណែនាំដល់រដ្ឋបាលក្រុង ស្រុក មន្ទីរការិយាល័យជំនាញពាក់ព័ន្ធទាំងអស់ ត្រូវចុះពង្រឹង និងពិនិត្យរាល់ទីតាំងកំពង់ចម្លងនៅតាមភូមិសាស្ត្ររៀងៗខ្លួន អំពីសុវត្ថិភាព និងស្ថានភាពទូកដរដើម្បីឱ្យស្របទៅនឹងស្ដង់ដា ដោយគោរពច្បាប់ និងលិខិតបទដ្ឋាននានាជាធរមានជាដាច់ខាត ។

លោកអភិបាលរងខេត្ត ក៏បានណែនាំដល់រដ្ឋបាលក្រុង ស្រុក មន្ទីរ ការិយាល័យជំនាញពាក់ព័ន្ធទាំងអស់ចុះពិនិត្យរាល់ឯកសារដែលទាក់ទង់ទៅនឹងការបើកអាជីវកម្មចម្លងគ្រប់ប្រភេទ និងមិនអនុញ្ញតឱ្យមានការបង្កើតអាជីវកម្ម ដោយគ្មានលក្ខណៈស្ដង់ដា ជាពិសេសត្រូវមានការល្បាតជាប្រចាំ ដើម្បីពិនិត្យបង្ការគ្រោះថ្នាក់ដោយយថាហេតុ ឬការធ្វេសប្រហែសហើយចំពោះការិយាល័យជំនាញ ត្រូវធ្វើតេស្តអ្នកបើកបរទាំងអស់ ហើយត្រូវមានអាយុចាប់ពី១៨ឆ្នាំឡើងទៅ ដោយមិនមានសាធាតុញៀនជាដាច់ខាត។

គួរបញ្ជាក់ថា កាលពីយប់ថ្ងៃទី១៣ ខែតុលា ឆ្នាំ២០២២ថ្មីៗនេះ មានករណីលិចទូកដរចម្លងដឹកសិស្សសាលា ស្ថិតនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាលបណ្តាល ឱ្យសិស្សស្លាប់បាត់បង់ជីវិតទាំងនៅវ័យក្មេងចំនួន១១​នាក់ដោយសារម្ចាស់ទូកដមិនមានបំពាក់ពោងសុវត្ថិភាព និងស្ថានភាពទូកមិនមានលក្ខណៈបច្ចេកទេសត្រឹមត្រូវ៕

អត្ថបទ៖ សំអឿន