ព័ត៌មានជាតិ

នគរបាលព្រំដែន ត្រូវគ្រប់គ្រងឲ្យបានជាដាច់ខាតពលករខ្មែរចំណាកស្រុកពីប្រទេសថៃ ចៀសវាងការឆ្លងកូវីដក្នុងសហគមន៍

បានផុស

៤ years មុន

នៅ

ថ្ងៃសៅរ៍ ២ មករា ២០២១

ដោយ

អភិបាលខេត្តកោះកុងបានដាក់បទបញ្ជាដល់កងកម្លាំងនគរបាលនៅច្រករបៀងសំខាន់ៗមិនថាផ្លូវគោក ឬផ្លូវទឹកជាប់ព្រំដែនថៃត្រូវគ្រប់គ្រងឲ្យបានជាដាច់ខាត ពលករខ្មែរចំណាកស្រុកពីប្រទេសថៃនិងធ្វើចត្តាឡីស័កឲ្យបានហ្មតចត់ជាទីបំផុត ដើម្បីចៀសវាងការចម្លងជំងឺនេះចូលទៅក្នុងសហគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី មិថុនា ភូថង អភិបាលនៃគណៈអភិបាលខេត្តកោះកុងបានលើកឡើងបែបនេ ខណៈពេលដែលលោកស្រីបានដឹកនាំស្នងការនគរបាល មន្ទីរជំនាញ ប្រធានទីស្នាក់ការចុះត្រួតពិនិត្យច្រកទ្វារព្រំដែនអន្តរជាតិចាំយាម កាលពីថ្ងៃទី០១ខែមករា ឆ្នាំ២០២០។

លោកស្រីបានមានប្រសាសន៍ថា បច្ចុប្បន្នជំងឺកូវីដ-១៩បាននឹងកំពុងរីករាលដាលក្នុងប្រទេសថៃ ដែលជាប្រទេសជាប់ព្រំដែនជាមួយកម្ពុជាហើយថ្មីៗនេះ មានការរកឃើញនូវជំងឺកូវីដ-១៩ លើពលករមកពីប្រទេសថៃ ដែលជាកត្តាមួយធ្វើឲ្យយើងមានការព្រួយបារម្ភ និងយកចិត្តទុកដាក់ខ្ពស់បំផុតដើម្បីការពារ និងគ្រប់គ្រងឲ្យបានជាដាច់ខាតអំពីពលករចំណាកស្រុកពីប្រទេសថៃ និងធ្វើចត្តាឡីស័កឱ្យបានហ្មតចត់បំផុត។

លោកស្រីអភិបាលខេត្តកោះកុងបានគូសបញ្ជាក់ពីផលវិបាកធ្ងន់ធ្ងរថា «ប្រសិនបើមិនអាចកាត់ផ្តាច់ខ្សែចម្លងជំងឺកូវីដ-១៩ ជាយថាហេតុ អាចឲ្យមានការបិទសាលារៀន ឈានទៅបិទភូមិស្រុកផលិតផលមិនអាចលក់ចេញបាន ភ្ញៀវទេសចរ ក៏មិនអាចមកលេង ដែលអាចប៉ះពាល់ចំណូលសេដ្ឋកិច្ចនិងជីវភាពរបស់បងប្អូនប្រជាពលរដ្ឋនៅក្នុងខេត្ត»។

ថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា ក៏បានដាក់បទបញ្ជាឲ្យអាជ្ញាធរខេត្តជាប់ព្រំដែនថៃត្រូវគ្រប់គ្រងលំហូរពលករខ្មែរដែលវិលត្រឡប់ពីថៃ ត្រូវឆែកសុខភាពឲ្យបានហ្មត់ចត់បំផុត ធ្វើតេស្តសំណាក និងត្រូវធ្វើចត្តាឡីស័កឲ្យគ្រប់១៤ថ្ងៃ ជាចាំបាច់ ដើម្បីការពារការឆ្លងរាលដាលក្នុងប្រទេស។

គួរបញ្ជាក់ថា គិតត្រឹមម៉ោង៧ព្រឹកថ្ងៃទី០២ ខែមករា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ចំនួន៣៧៩នាក់ ក្នុងចំណោមនោះមាន១៤នាក់ ជាពលករខ្មែរមកពីប្រទេសថៃ ក្នុងនោះមានអ្នកជាសះស្បើយចំនួន៣៦២នាក់ និងអ្នកជំងឺកំពុងសម្រាកនៅមន្ទីរពេទ្យចំនួន១៧នាក់៕

អត្ថបទ ៖ សំអឿន

Related Topics:ខេត្តកោះកុង