ព័ត៌មានជាតិ
ក្រសួងអប់រំ ចេញវិធានការទប់ស្កាត់គ្រោះថ្នាក់ពេលធ្វើដំណើរទៅមកសាលារៀន អំឡុងទឹកជំនន់
ក្រសួងអប់រំ យុវជន និងកីឡា បានដាក់ចេញវិធានការបង្ការ និងទប់ស្កាត់គ្រោះថ្នាក់ពេលធ្វើដំណើរទៅមកសាលាសម្រាប់បុគ្គលិកអប់រំ និងសិស្ស នៅក្នុងរដូវវស្សា ពិសេសអំឡុងពេលទឹកជំនន់។
ការដាក់ចេញវិធានការនេះបានធ្វើឡើងបន្ទាប់ពីមានឧបទ្ទវហេតុលិចទូកដចម្លងកាលពីពេលថ្មីៗនេះនៅខេត្តកណ្ដាល បណ្ដាលឲ្យសិស្សសាលាស្លាប់បាត់បង់ជីវិតចំនួន ១១ នាក់រួចមក។
នៅក្នុងសេចក្ដីណែនាំរបស់ក្រសួងអប់រំ យុវជន និងកីឡា ចុះកាលពីយប់ថ្ងៃទី ២០ តុលា បានឲ្យដឹងថា ជារៀងរាល់ឆ្នាំ សិស្សានុសិស្ស និងបុគ្គលិកអប់រំមួយចំនួនតូច បានរងគ្រោះក្នុងអំឡុងពេលធ្វើដំណើរទៅសាលារៀន ឬមកបំពេញការងារ ទាំងតាមផ្លូវគោក និងផ្លូវទឹក ជាពិសេសនៅរដូវវស្សា និងអំឡុងពេលទឹកជំនន់។
ក្រសួងបានបន្តថា គ្រឹះស្ថានសិក្សាភាគច្រើននៅតាមដងទន្លេ ជុំវិញបឹងទន្លេសាប និងទីទំនាបផ្សេងទៀត តែងរងនូវការជន់លិច និងខូចខាតបរិស្ថាន ហេដ្ឋារចនាសម្ព័ន្ធសម្ភារៈ និងឯកសារជាដើម។
ម្យ៉ាងវិញទៀត បុគ្គលិកអប់រំ និងសិស្សានុសិស្ស តែងតែទទួលរងគ្រោះថ្នាក់ជាយថាហេតុ។
ក្រសួងបានលើកឡើងថា ដើម្បីកាត់បន្ថយជាអតិបរមានូវផលប៉ះពាល់ និងគ្រោះថ្នាក់ដែលអាចកើតមានក្នុងអំឡុងពេលធ្វើដំណើរទៅមកសាលារៀន កន្លែងបំពេញការងារ របស់សិស្សានុសិស្ស និងបុគ្គលិកអប់រំ ក្រសួងសូមធ្វើការណែនាំដល់មន្ទីរអប់រំ យុវជន និងកីឡារាជធានី ខេត្ត, ការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ត្រូវតាមដានរាល់សេចក្ដីជូនដំណឹងស្ដីពីការព្យាករណ៍អាកាសធាតុ និងជូនដំណឹងទៅគ្រប់សាលារៀនពាក់ព័ន្ធ។ ត្រូវពិនិត្យមើលកម្រិតហានិភ័យ ដែលនឹងអាចកើតមាន ដូចជា ស្ថានភាពផ្លូវ ខ្យល់ព្យុះ ជំនន់ទឹកភ្លៀង ឬ ទឹកស្ទឹង បឹង ទន្លេ ។ល។
ជាមួយគ្នានេះ ត្រូវសហការជាមួយអង្គភាពពាក់ព័ន្ធចុះត្រួតពិនិត្យលក្ខណៈបច្ចេកទេសមធ្យោបាយដឹកជញ្ជូន (រួម) ដូចជា យានយន្ត ឬទូក កាណូត ដែលសិស្សានុសិស្ស និងបុគ្គលិកអប់រំប្រើប្រាស់រួមគ្នា និងក្នុងករណីដែលមធ្យោបាយដឹកជញ្ជូនទាំងនោះអាចបង្កជាយថាហេតុណាមួយ ត្រូវណែនាំឲ្យកែលម្អដល់ម្ចាស់អាជីវកម្ម និងអ្នកបញ្ជាមធ្យោបាយដឹកជញ្ជូនសិស្សានុសិស្ស និងបុគ្គលិកអប់រំឲ្យមានការប្រុងប្រយ័ត្នខ្ពស់ គោរពច្បាប់ចរាចរណ៍ និងមានការទទួលខុសត្រូវខ្ពស់ បំពាក់ឧបករណ៍សុវត្ថិភាព ឬអាវពោងសុវត្ថិភាពនៅលើមធ្យោបាយដឹកជញ្ជូន និងកុំឲ្យដឹកលើសចំណុះ ឬបញ្ជាយានយន្តលើសល្បឿន។
ក្រសួងបានបន្តទៀតថា ចំណែកគណៈគ្រប់គ្រងសាលា ត្រូវសហការរវាងគណៈគ្រប់គ្រងគ្រឹះស្ថានសិក្សាជាមួយអាជ្ញាធរអប់រំ អាជ្ញាធរដែនដី និងកម្លាំងមានសមត្ថកិច្ច ចុះពិនិត្យមើលទីតាំង, លិខិត ឬគោលការណ៍អនុញ្ញាតឲ្យប្រកបអាជីវកម្មលើមធ្យោបាយដឹកជញ្ជូន ជាពិសេសមធ្យោបាយដឹកជញ្ជូន ដែលសិស្សានុសិស្ស ឬបុគ្គលិកអប់រំប្រើប្រាស់រួម។ ត្រូវអប់រំណែនាំដោយផ្ទាល់ពី លោកគ្រូ-អ្នកគ្រូ ដល់សិស្សានុសិស្សជាប់ជាប្រចាំអំពីហានិភ័យដែលនឹងកើតមានឡើងក្នុងអំឡុងពេលធ្វើដំណើរជាពិសេសត្រូវណែនាំសិស្សានុសិស្ស ឲ្យចេះគ្រប់គ្រងអារម្មណ៍ គ្រប់គ្រងស្ថានការណ៍ និងវិធីរំដោះខ្លួនចេញពីគ្រោះថ្នាក់ ក្នុងករណីមានហេតុការណ៍កើតឡើង។ សម្របសម្រួល ផ្ដល់ និងទទួលព័ត៌មានរវាងសាលារៀន និងសហគមន៍ និងជំរុញការចូលរួម រាល់សកម្មភាពពាក់ព័ន្ធនឹងការបង្ការទប់ស្កាត់គ្រោះថ្នាក់នានា ជាពិសេសគ្រោះថ្នាក់ដែលពាក់ព័ន្ធនឹងការធ្វើដំណើរ ឬមធ្យោបាយដឹកជញ្ជូន និងសម្របសម្រួលជាមួយម្ចាស់អាជីវកម្មមធ្យោបាយដឹកជញ្ជូនដើម្បីសម្រួលដល់ការធ្វើដំណើររបស់សិស្សានុសិស្ស និងបុគ្គលិកអប់រំ។
លើសពីនេះទៀត ត្រូវចេះ កៀរគរ ឬចលនាធនធាន ដើម្បីឧបត្ថម្ភគាំទ្រដល់ការរៀបចំមធ្យោបាយធ្វើដំណើរ និងទិញសម្ភារៈ សម្រាប់ការធ្វើដំណើរទៅមកសាលារៀន ដូចជា យានយន្ត ទូក កាណូត ពោងហែលទឹក, ប៊ីដុងជ័រ អាវពោងសុវត្ថិភាព អ្នកការពារសុវត្ថិភាព។ល។ ត្រូវដាក់ផ្លាកសញ្ញា ឬផ្ទាំងរូបភាពអប់រំ ស្ដីពីសុវត្ថិភាពចរាចរណ៍ផ្លូវគោក ផ្លូវទឹក នៅក្នុងទីធ្លាសាលារៀន ឬតាមមធ្យោបាយធ្វើដំណើរ រួមទាំងសារអប់រំផ្សេងៗ។
រីឯមាតាបិតា អ្នកអាណាព្យាបាល ត្រូវណែនាំកូនចៅជាប់ជាប្រចាំឲ្យមានការប្រុងប្រយ័ត្ន និងជ្រើសរើសការប្រើប្រាស់មធ្យោបាយធ្វើដំណើរដែលមានសុវត្ថិភាពនៅតាមផ្លូវពីផ្ទះទៅមកសាលារៀន
ពិនិត្យលទ្ធភាពទិញសម្ភារៈ និងឧបករណ៍ការពារសុវត្ថិភាពផ្សេងទៀត ឲ្យកូនចៅនៅពេលធ្វើដំណើរ ទៅសាលារៀន។ ត្រូវចេះសហការជាមួយអាជ្ញាធរពាក់ព័ន្ធ ដូចជា ការផ្ដល់ព័ត៌មានអំពីម្ចាស់អាជីវកម្ម ឬមធ្យោបាយដឹកជញ្ជូនដែលប្រឈមនឹងហានិភ័យ ឬមិនគោរពតាមលក្ខខ័ណ្ឌ និងគោលការណ៍ច្បាប់បានកំណត់។ ត្រូវដឹកជញ្ជូនកូនចៅទៅសាលារៀនដោយផ្ទាល់ ក្នុងករណីចាំបាច់ ដោយកុំបណ្តោយឲ្យពួកគេធ្វើដំណើរដោយខ្លួនឯង និងត្រូវចូលវិភាគទានជាមួយសាលារៀន ដើម្បីរៀបចំមធ្យោបាយដឹកជញ្ជូនកូនធ្វើដំណើរទៅសាលារៀន។
គួរបញ្ជាក់ថា កាលពីយប់ថ្ងៃទី ១៣ ខែតុលា ឆ្នាំ ២០២២ ថ្មីៗនេះ មានករណីលិចទូកដចម្លងដឹកសិស្សសាលា ស្ថិតនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បណ្តាលឲ្យសិស្សស្លាប់បាត់បង់ជីវិតទាំងនៅវ័យក្មេងចំនួន ១១ នាក់ ដោយសារម្ចាស់ទូកដមិនមានបំពាក់អាវពោងសុវត្ថិភាព និងស្ថានភាពទូកមានលក្ខណៈបច្ចេកទេសមិនត្រឹមត្រូវឡើយ៕
អត្ថបទ ៖ សំអឿន
Song Hye Kyo និង Gong Yoo ប៉ះគ្នាក្នុងរឿងភាគថ្មី ចាយទុនផលិត ៤៧.៧លានដុល្លារ
រដ្ឋបាលសង្កាត់ស្ទឹងមានជ័យទី ១ បើកយុទ្ធនាការបាញ់ថ្នាំសម្លាប់សត្វមូស ក្នុងភូមិទាំង ៨
ពលរដ្ឋតាមផ្លូវទៅភ្នំសំពៅ ស្នើមគ្គុទេសជួយនាំទេសចរបរទេស បានស្គាល់អំពីតម្លៃផ្លែត្នោតនិងគ្រាប់ត្នោតរបស់ខ្មែរ
រដ្ឋាភិបាលប្ដេជ្ញាបន្តការពារឧស្សាហកម្មផលិតស៊ីម៉ងត៍ គ្រាដែលតម្រូវការសំណង់ធ្លាក់ចុះ
បុរសម្នាក់ សង្ស័យងងុយដេក ងោកមួយភាំង រេចង្កូតឡើងខឿន បុកបង្គោលភ្លើង បង្កការខូចខាត
ព្រាប សុវត្ថិ ប្រកាសលក់ដីជាង ៨ហិកតានៅមណ្ឌលគិរីក្នុងតម្លៃពិសេស ជាឱកាសសម្រាប់ការវិនិយោគ
គម្រោងកែលម្អសួនច្បារមាត់ទន្លេ ចំណាយថវិកាជិត ២០០ លានរៀល ផ្លាស់ប្តូរមុខមាត់ថ្មីស្រុកសំបូរទាក់ទាញទេសចរបន្ថែមទៀត
ពលរដ្ឋនៅបាត់ដំបងតវ៉ាបិទផ្លូវទាមទារឲ្យដោះបញ្ហាស្រូវធ្លាក់ថ្លៃ ក្រសួងកសិកម្មតបថា ថាមិនបានព្រងើយបញ្ហានេះឡើយ
រដ្ឋ Johor ភាគខាងត្បូងម៉ាឡេស៊ីប្រឈមទឹកជំនន់ ខណៈអ្នកប៉ះពាល់កើនជិត៤០០០នាក់
អ្នកនាំពាក្យ៖ ក្រសួងយុត្តិធម៌ មិនឱ្យមាន«ករណីបុកគេស្លាប់ហើយជនបង្កបង់លុយយករួចខ្លួន»កើតមានទៀតទេ
-
ព័ត៌មានជាតិ៥ ថ្ងៃ agoមេសិទ្ធិមនុស្សកម្ពុជា ឆ្លៀតសួរសុខទុក្ខកញ្ញា សេង ធារី កំពុងជាប់ឃុំ និងមើលឃើញថាមានសុខភាពល្អធម្មតា
-
ចរាចរណ៍៣ ថ្ងៃ agoករណីគ្រោះថ្នាក់ចរាចរណ៍រវាងរថយន្ត និងម៉ូតូ បណ្ដាលឱ្យឪពុក និងកូន២នាក់ស្លាប់បាត់បង់ជីវិត
-
ព័ត៌មានជាតិ៦ ថ្ងៃ agoជនសង្ស័យដែលបាញ់សម្លាប់លោក លិម គិមយ៉ា ត្រូវបានសមត្ថកិច្ចឃាត់ខ្លួននៅខេត្តបាត់ដំបង
-
ចរាចរណ៍១ ថ្ងៃ agoជិះម៉ូតូបញ្ច្រាសផ្លូវ បុកម៉ូតូមួយគ្រឿងទៀតស្លាប់ម្នាក់ និងរបួសធ្ងន់ស្រាល៣នាក់
-
ជីវិតកម្សាន្ដ៣ ថ្ងៃ agoក្រោយរួចខ្លួន តួសម្ដែងរឿង «Ip Man» ប្រាប់ដើមចមធ្លាយដល់កន្លែងចាប់ជំរិត កៀកព្រំដែនថៃ-មីយ៉ានម៉ា
-
ព័ត៌មានជាតិ៤ ថ្ងៃ agoអ្នកនាំពាក្យថារថយន្តដែលបើកផ្លូវឱ្យអ្នកលក់ឡេមិនមែនជារបស់អាវុធហត្ថទេ
-
ព័ត៌មានជាតិ៦ ថ្ងៃ agoសមត្ថកិច្ចកម្ពុជា នឹងបញ្ជូនជនដៃដល់បាញ់លោក លិម គិមយ៉ា ទៅឱ្យថៃវិញ តាមសំណើររបស់នគរបាលថៃ ស្របតាមច្បាប់ បន្ទាប់ពីបញ្ចប់នីតិវិធី
-
ព័ត៌មានជាតិ៤ ថ្ងៃ agoក្រសួងការពារជាតិកំពុងពិនិត្យករណីអ្នកលក់អនឡាញយកឡានសារ៉ែនបើកផ្លូវទៅចូលរួមមង្គលការ