ស្ថានីយប្រេង ឧស្ម័ន និងថាមពលជាង ៣០០កន្លែង កំពុងដំណើរការ នៅខេត្តព្រៃវែង

បច្ចុប្បន្នខេត្តព្រៃវែង មានស្ថានីយប្រេងឥន្ធនៈ និងឧស្ម័ន កំពុងដំណើរការប្រមាណ ៣៣៧ កន្លែង។

ស្ថានីយទាំងនោះរួមមាន៖ ស្ថានីយប្រេងឥន្ធនៈមានចំនួន៣១៦ ស្ថានីយ, ស្ថានីយឧស្ម័នមានចំនួន០២ ស្ថានីយ, ស្ថានីយរួមប្រេង និងឧស្ម័ន មានចំនួន ១៩ ស្ថានីយ។ ក្នុងនោះស្ថានីយបានដាក់ពាក្យស្នើសុំ វិញ្ញាបនបត្របញ្ជាក់​បច្ចេកទេសសុវត្ថិភាពស្ថានីយអនុញ្ញាតដំណើរការមានចំនួន ២៧០ស្ថានីយ ស្មើនឹង ៨០.១១%។

បើតាមរបាយការណ៍រ​បស់មន្ទីររ៉ែ និងថាមពល ខេត្តព្រៃវែង បានបង្ហាញថា ស្ថិតិអាជីវកម្មហ្គាសខ្នាតតូចដែល​មន្ទីរស្រង់បាន មានចំនួន ៥២មូលដ្ឋាន។  សមិទ្ធផលការងារវិស័យថាមពល ក្រុមហ៊ុនវិនិយោគអគ្គិសនីក្នុង​ខេត្តមានចំនួន ៣០ ក្រុមហ៊ុន/សេវាករ ដែលមានអាជ្ញាបណ្ណគ្របដណ្តប់ចំនួន ៩៩.៩១% នៃភូមិសរុប។

គិតត្រឹមឆ្នាំ ២០២១ ខ្នងផ្ទះប្រជាជន ដែលមានអគ្គិសនីប្រើប្រាស់ មានចំនួន ២២៨,៧៨២ខ្នង ស្មើនឹង៩០.៣% នៃខ្នងផ្ទះសរុប។

ថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការ អគាររដ្ឋបាលថ្មី និងសមិទ្ធផលនានា របស់មន្ទីររ៉ែ និងថាមពល ខេត្តព្រៃវែង លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា វិស័យរ៉ែ និងថាមពល និងប្រេងការ បានចូលរួមចំណែកយ៉ាងសំខាន់ក្នុងការអភិវឌ្ឍប្រទេសជាតិ និងបានផ្ដល់ភាពងាយស្រួលជូន​ប្រជាពលរដ្ឋប្រើប្រាស់ក្នុងជីវភាព ប្រចាំថ្ងៃ។ ជាក់ស្តែង ប្រជាពលរដ្ឋទូទាំងប្រទេសមានអគ្គិសនីប្រើប្រាស់ស្ទើរគ្រប់ផ្ទះ ប្រមាណជាង ៩៥%។

លោករដ្ឋមន្រ្តីបានបន្ថែមទៀតថា មន្ទីររ៉ែ និងថាមពល គឺជាសេនាធិការរបស់រដ្ឋបាលខេត្ត ធ្វើយ៉ាងណាត្រូវត្រួតពិនិត្យ និងចេញអាជ្ញាប័ណ្ណឱ្យបានត្រឹមត្រូវ ដល់ម្ចាស់សហគ្រាស ក្រុមហ៊ុន ដែលទទួល បានអាជ្ញាបណ្ណក្នុងការប្រកបមុខរបរ​អាជីវកម្ម របស់ខ្លួនត្រឹមត្រូវទៅតាមច្បាប់ ដែលបានកំណត់៕ អត្ថបទ៖ សៅគ្រី