សម្ដេចតេជោ ហ៊ុន សែន ​បន្តអំពាវនាវ​ដល់ពលរដ្ឋមិនទាន់​ចាកចេញពីតំបន់អង្គរ​គួរប្រកាន់យកជម្រើសវ័យឆ្លាត​

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានបន្តអំពាវនាវទៅកាន់ប្រជាពលរដ្ឋ​ដែលមិនទាន់ចាកចេញពីតំបន់អង្គរគួរតែជ្រើសរើសនូវជម្រើសវ័យឆ្លាត​ ខណៈដែលអ្នកបន្តនៅទីនោះ​មិនមានអនាគតនោះទេ​ ដោយគ្មានលទ្ធភាពកសាងអ្វីបន្ថែមទេ ខណៈកម្មសិទ្ធិក៏មិនបាន​ទទួលនោះដែរ​។

សម្ដេចតេជោ ហ៊ុន សែន មានប្រសាសន៍​នៅក្នុងពិធីជួបសំណេះសំណាល​ជាមួយប្រជាពលរដ្ឋ ៣ ២០០ គ្រួសារ បន្ថែមទៀត ដែលស្ម័គ្រចិត្តរើលំនៅឋានចេញពីរមណីយដ្ឋានអង្គរនៅតំបន់ពាក់ស្នែង។

សម្ដេចតេជោ ហ៊ុន សែន មានប្រសាសន៍ថា «ឃុំព្រះដាក់ជាឃុំចាស់ យើងអត់រើភូមិនោះចេញទេ ​ក៏ប៉ុន្តែ​ក៏មិនអនុញ្ញាតឲ្យសាងសង់សំណង់អ្វីផ្សេងទៀតដែរ​ ចឹងបាននៅទីនេះ នឹងត្រៀមរៀបចំកន្លែងមួយចំនួន​ដើម្បីត្រៀមអ្នកដែលបំបែកគ្រួសារ ព្រោះមិនអាចឲ្យមានសាងសង់ផ្ទះឡើងទៀតទេ អាហ្នឹងជាបទដ្ឋានកំណត់របស់អង្គការយូនីស្កូ»៕