សម្ដេចតេជោ ហ៊ុន សែន ៖ មន្ត្រីគណបក្សប្រជាជន តែងតែបង្ហាញមុខនៅពេលពលរដ្ឋ ជួបការលំបាក

សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានអះអាងថា មន្ត្រីគណបក្សប្រជាជនកម្ពុជា តែងតែបង្ហាញមុខនៅពេលប្រជាពលរដ្ឋ ជួបប្រទះការលំបាកណាមួយ ដោយមិនដែលមើលរំលងទុក្ខលំបាករបស់ប្រជាពលរដ្ឋ ម្ដងណាឡើយ។

សម្តេចតេជោ ហ៊ុន សែន បានថ្លែងក្នុងពីធីសំណេះសំណាល និងផ្តល់ស្រូវពូជជូនដល់ប្រជាកសិករជាង ៣ពាន់គ្រួសារ ដែលរងគ្រោះដោយសារគ្រោះទឹកជំនន់ ក្នុងខេត្តកំពង់ឆ្នាំង នាព្រឹកថ្ងៃទី ២៦​ ខែតុលានេះថា រាជរដ្ឋាភិបាល ដឹកនាំដោយគណបក្សប្រជាជនកម្ពុជា មិនដែលមើលរំលងទុក្ខលំបាករបស់ប្រជាពលរដ្ឋម្ដងណាឡើយ ដោយមន្ត្រីគណបក្សប្រជាជនកម្ពុជា តែងតែចុះជាប់ជាមួយប្រជាពលរដ្ឋ គ្រប់កាលៈទេសៈ។

សម្ដេចតេជោ ហ៊ុន​ សែន បានថ្លែងបន្ថែមថា «នៅពេលប្រជាពលរដ្ឋជួបប្រទះការលំបាក ច្បាស់ណាស់ គឺឃើញមុខគណបក្សប្រជាជន មិនមែនឃើញសមាជិកគណបក្សប្រជាជន តែពេលឃោសនាបោះឆ្នោតនោះទេ ចំណុចនេះបងប្អូនអាចដឹងបានហើយថា យើងរស់នៅជាមួយគ្នារយៈពេល ៤៣ឆ្នាំរួចមកហើយ ជិត ៤៤ឆ្នាំ»។

សម្ដេចតេជោ ហ៊ុន សែន បានថ្លែងទៀតថា មន្ត្រីគណបក្សប្រជាជនកម្ពុជា តែងតែបង្ហាញមុខនៅពេលដែលប្រជាពលរដ្ឋជួបការលំបាកណាមួយ ដែលផ្ទុយពីមន្ត្រីគណបក្សដទៃ ទាល់តែដល់រដូវកាលបោះឆ្នោតទើបចុះជួបប្រជាពលរដ្ឋ ហើយឃោសនាបែបរិះគន់ជេរអ្នកដែលផ្ដល់អំណោយ និងដោះស្រាយបញ្ហាទុក្ខលំបាកប្រជាពលរដ្ឋ ទៅវិញ៕