សម្ដេចតេជោ អំពាវនាវដល់កងកម្លាំង និងអ្នកគាំទ្របក្សប្រជាជន ត្រៀមខ្លួនចូលរួមការពាររបបរាជានិយម និងព្រះមហាក្សត្រ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់បណ្ដាកងកម្លាំងប្រដាប់អាវុធគ្រប់ប្រភេទ រួមទាំងអ្នកគាំទ្រគណបក្សប្រជាជនកម្ពុជា និងគណបក្សដទៃទៀត ត្រូវត្រៀមខ្លួនចូលរួមសកម្ម​ភាពការពាររបបរាជានិយម ការពាររាជបល្ល័ង្ក ការពារព្រះមហាក្សត្រ ហើយប្រឆាំងនឹងទណ្ឌិត សម រង្ស៊ី ដែលចង់ផ្ដួលរំលំរាជរដ្ឋាភិបាលស្របច្បាប់ និងប្រមាថព្រះចេស្ដា ព្រះមហាក្សត្រ។

នៅក្នុងពីធីសំណេះសំណាល និងផ្តល់ស្រូវពូជជូនដល់ប្រជាកសិករជាង ៣ពាន់គ្រួសារ ដែលរងគ្រោះដោយសារគ្រោះទឹកជំនន់ ក្នុងខេត្តកំពង់ឆ្នាំង នាព្រឹកថ្ងៃទី ២៦ ខែតុលានេះ សម្ដេចតេជោ ហ៊ុន សែន បានអំពាវនាវដល់កងកម្លាំងប្រដាប់អាវុធ និងអ្នកគាំទ្រគណបក្សប្រជាជនកម្ពុជា រួមទាំងគណបក្សដទៃទៀត ត្រៀមខ្លួនចូលរួមសកម្មភាពការពាររបបរាជានិយម ការពាររាជបល្ល័ង្ក ការពារព្រះមហាក្សត្រ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ខ្ញុំអំពាវនាវឲ្យកម្លាំងប្រដាប់អាវុធទាំងអស់ ប្រុងប្រៀបជាមួយនឹងសភាពការណ៍ទាំងឡាយ ដែលអាចកើតមាន ហើយអំពាវនាវឲ្យអ្នកគាំទ្រគណបក្សប្រជាជន និងគណបក្សដទៃ ដែលប្រឆាំងនឹងបុគ្គលរូបនេះ ត្រៀមខ្លួនដើម្បីចូលរួមសកម្មភាពការពាររបបរាជានិយម ការពាររាជបល្ល័ង្ក ការពារព្រះមហាក្សត្ររបស់យើង»៕

អត្ថបទ៖ ឃួន សុភ័ក្រ