សម្ដេចតេជោ ប្រាប់ត្រង់ៗទៅសមាជិក-សមាជិកា បក្សភ្លើងទៀនថា គួរផ្ដាច់ខ្លួនចេញពីបក្សនេះឲ្យបានស្រូតបំផុត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសប្រាប់ដោយត្រង់ៗថា សូមសមាជិក-សមាជិកា នៃគណបក្សភ្លើងទៀន សូមផ្ដាច់ខ្លួនចេញពីគណបក្សនេះឲ្យបានលឿន តាមដែលអាចធ្វើទៅបាន​ ដើម្បីជៀសវាងមានបញ្ហាផ្លូវច្បាប់ណាមួយ ដោយសម្ដេចបង្ហើបថា មានតម្រុយមួយចំនួនហើយ ពាក់ព័ន្ធនឹងគណបក្សនេះ។

សម្ដេចតេជោ ហ៊ុន សែន បានថ្លែងក្នុងពីធីសំណេះសំណាល និងផ្តល់ស្រូវពូជជូនដល់ប្រជាកសិករជាង ៣ពាន់គ្រួសារ ដែលរងគ្រោះដោយសារគ្រោះទឹកជំនន់ ក្នុងខេត្តកំពង់ឆ្នាំង នាព្រឹកថ្ងៃទី ២៦ ខែតុលានេះថា សមាជិកា-សមាជិកា នៃគណបក្សភ្លើងទៀន គួរតែផ្ដាច់ខ្លួនចេញពីគណបក្សនេះជាបន្ទាន់ ដើម្បីជៀសវាងបញ្ហាណាមួយកើតឡើង។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «សមាជិក-សមាជិកា នៃគណបក្សភ្លើងទៀន គួរតែត្រូវផ្ដាច់ខ្លួនឲ្យបានស្រូតបំផុត តាមដែលអាចធ្វើទៅបាន ដើម្បីជៀសវាងបញ្ហាណាមួយកើតឡើង ព្រោះនេះជាមុខសញ្ញា ជាគោលដៅ ព្រោះជាកម្លាំងម្ខាង គឺគេសម្រាប់ការផ្ដួលរំលំរាជរដ្ឋាភិបាល ប៉ុន្តែវាទៅជាមួយគ្នា ក្នុងការផ្ដួលរំលំរបបរាជានិយមអាស្រ័យធម្មនុញ្ញ»។

ជាមួយគ្នានេះ សម្ដេចតេជោ ហ៊ុន សែន ក៏បានថ្លែងប្រាប់ទៅមេដឹកនាំគណបក្សភ្លើងទៀន អំពីខ្សែអាតសំឡេងនៃកិច្ចប្រជុំរបស់ពួកគេ ដែលមាននៅក្នុងដៃរបស់សម្ដេចផងដែរ។

សម្ដេចតេជោ ហ៊ុន សែន បានឲ្យដឹងយ៉ាងដូច្នេះថា «ហើយខ្ញុំ ក៏សូមជម្រាបជូនឯកឧត្ដម ថាច់ សេដ្ឋា ឯកឧត្ដម សុន ឆ័យ ឯកឧត្ដម ទាវ វណ្ណុលថា ខ្សែអាតទាំងប៉ុន្មាន បានឋិតនៅក្នុងដៃរបស់ខ្ញុំរួចស្រេចទៅហើយ ជាពិសេសការប្រជុំតាមអនឡាញ ដែលមាន​អង្គប្រជុំនៅអាមេរិក មានការប្រជុំបារាំង ហើយអ្នកនៅក្នុងស្រុកខ្មែរ ឥឡូវហ្នឹងខ្ញុំដឹងអស់លោកទៀត ថា អស់លោកកំពុងមានការសង្ស័យ​ទៅលើឈ្មោះ តុប វ៉ាន់ចាន់ ដែលជាអតីតតំណាងរាស្រ្ដថា ជាអ្នកថតសំឡេង អស់លោកសង្ស័យគ្នា ក៏សង្ស័យទៅរឿងរបស់អស់លោកទេ»។

សម្ដេចតេជោ ហ៊ុន សែន លើកឡើងទៀតថា ច្បាប់ ស្ដីពី គណបក្សនយោបាយ គឺចែងមិនឲ្យមានទំនាក់ទំនងជាមួយទណ្ឌិតនោះទេ។ សម្ដេចតេជោ ហ៊ុន សែន បន្ថែមទៀតថា «ដូច្នេះចំណុចនេះ គ្រាន់តែប្រាប់អ្នកឯងឲ្យបានដឹងថា តម្រុយឆ្ពោះទៅរកនៃដំណាក់កាលមួយ កំពុងប្រឈមសម្រាប់អ្នកឯង»៕

អត្ថបទ៖ ឃួន សុភ័ក្រ