ទេសចរកើនឡើងដល់ជាង ៥៣ ម៉ឺននាក់ចេញកម្សាន្ត​ទូទាំងប្រទេស​ក្នុងសប្តាហ៍ទី៣ខែនេះ

ភ្ញៀវទេសចរក្នុងសប្តាហ៍ទី៣ (ចាប់ពីថ្ងៃទី១៧-២៣ ខែតុលា ២០២២) មានចំនួន៥៣២,៤៥៥នាក់ ក្នុងនោះភ្ញៀវជាតិ៥០៥,១១៧នាក់ និងភ្ញៀវបរទេសផ្ទៃក្នុង២៧,៣៣៨នាក់ បានចេញកម្សាន្តនៅទូទាំងប្រទេស។

ចំណែកគោលដៅទេសចរណ៍ដែលមានភ្ញៀវទៅកម្សាន្តច្រើនជាង គឺខេត្តពោធិ៍សាត់  មានចំនួន ១៣៧,៧៣៧នាក់ បន្ទាប់មកខេត្តព្រះសីហនុ ១២៩,១៤៧នាក់, ខេត្តក្រចេះ ១២២,៥៣៩នាក់, ខេត្តសៀមរាប ២៧,២៨៣នាក់, រាជធានីភ្នំពេញ ២០,៨៩៨នាក់ និងខេត្តកំពតចំនួន ១៩,៦៩៤នាក់។

ក្រសួងទេសចរណ៍បានគូសបញ្ជាក់ថា មូលហេតុដែលខេត្តពោធិ៍សាត់ មានចំនួនភ្ញៀវទេសចរទៅកម្សាន្តច្រើន ដោយសារខេត្តនេះ បានរៀបចំពិធីប្រណាំងទូករយៈពេល៣ថ្ងៃចាប់ពីថ្ងៃទី១៦-១៨ ខែតុលា ឆ្នាំ២០២២។ ដោយឡែកខេត្តក្រចេះ ក៏បានរៀបចំពិធីប្រណាំងទូករយៈពេល៣ថ្ងៃផងដែរ ចាប់ពីថ្ងៃទី២១-២៣ ខែតុលា ឆ្នាំ២០២២ ដែលបានទាក់ទាញភ្ញៀវទេសចរ និងប្រជាពលរដ្ឋជាច្រើនកុះករ។

រីឯខេត្តព្រះសីហនុបន្តទទួលបានភ្ញៀវទេសចរមកកម្សាន្តជាច្រើន បន្ទាប់ពីមានការដាក់ឱ្យដំណើរការ​សាកល្បង​ផ្លូវល្បឿនលឿនភ្នំពេញ-ព្រះសីហនុ រយៈពេល១ខែចាប់ពីថ្ងៃទី១ដល់ថ្ងៃទី៣១ ខែតុលា ឆ្នាំ២០២២។

ទន្ទឹមនឹងនេះ បណ្តាខេត្តផ្សេងទៀត ដែលនៅជាប់បណ្តោយដងទន្លេ បាននិងកំពុងត្រៀមរៀបចំព្រឹត្តិការណ៍​ប្រណាំងទូកទៅតាមពេលវេលាសមស្រប និងស្ថានភាពជាក់ស្តែងក្នុងមូលដ្ឋានរបស់ខ្លួន៕