ព័ត៌មានជាតិ

មន្ទីរពេទ្យកាល់ម៉ែត សម្ពោធដាក់ឲ្យប្រើប្រាស់ម៉ាស៊ីនថតឆ្លុះសរសៃឈាមជំនាន់ចុងក្រោយ ស្របតាមស្តង់ដារអន្តរជាតិ

បានផុស

២ years មុន

នៅ

ថ្ងៃសុក្រ ២៨ តុលា ២០២២

ដោយ

មន្ទីរពេទ្យកាល់ម៉ែត កាលពីព្រឹកថ្ងៃទី ២៨ ខែតុលា ឆ្នាំ ២០២២ បានបើកសម្ពោធដាក់ឲ្យប្រើប្រាស់ជាផ្លូវការនូវម៉ាស៊ីនថតឆ្លុះសរសៃឈាម Siemens Artis One (ស៊ីមិន អាធីស វ័ន) ជំនាន់ចុងក្រោយ ដើម្បីជំរុញការព្យាបាលអ្នកជំងឺកាន់តែទំនើប មានប្រសិទ្ធភាពខ្ពស់ ស្របតាមស្តង់ដារអន្តរជាតិ ក្រោមការដឹកនាំផ្ទាល់លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសាស្ត្រាចារ្យ សុខ ជួរ ប្រធានដេប៉ាតឺម៉ង់មជ្ឈមណ្ឌលព្យាបាលជំងឺបេះដូង បានឲ្យដឹងថា ម៉ាស៊ីនថតឆ្លុះសរសៃឈាម Siemens Artis One ជំនាន់ចុងក្រោយ មានអត្ថប្រយោជន៍សម្រាប់ក្រុមគ្រូពេទ្យសង្គ្រោះអ្នកជំងឺដូចជា ៖ ការថតឆ្លុះសរសៃឈាមបេះដូង និងព្យាបាលដោយដាក់រឺស័រក្នុងជំងឺស្ទះសរសៃឈាមបេះដូងស្រួចស្រាវ និង រ៉ាំរ៉ៃ ការអន្តរាគមន៍ក្នុងការព្យាបាលជំងឺបេះដូងពីកំណើត ការអន្តរាគមន៍ក្នុងការព្យាបាលជំងឺស្ទះសរសៃឈាមខួរក្បាលស្រួចស្រាវ អាចថតឆ្លុះ និងព្យាបាលជំងឺត្បៀតសរសៃឈាមសរីរាង្គផ្សេងៗ ការព្យាបាលជំងឺលើសសម្ពាធឈាមដែលមិនអាចគ្រប់គ្រងបានដោយថ្នាំ ការវាយតម្លៃ និងវាស់សម្ពាធឈាមក្នុងបេះដូង សរសៃឈាមអាក់អរ សរសៃឈាមសួត ដើម្បីកំណត់ដំណាក់កាល និងពេលដែលត្រូវព្យាបាលសម្រាប់ជំងឺបេះដូងពីកំណើតមួយចំនួន។

លោកសាស្ត្រាចារ្យ ឈាង រ៉ា បានថ្លែងថា ម៉ាស៊ីនថតឆ្លុះសរសៃឈាម Siemens Artis One ជំនាន់ចុងក្រោយនាពេលនេះ នឹងធ្វើឲ្យការព្យាបាល ការសង្គ្រោះអ្នកជំងឺកាន់តែលំអិត និងមានប្រសិទ្ធភាពខ្ពស់បន្ថែមទៀត។ លោកក៏បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំគ្រប់ផ្នែក នៃមន្ទីរពេទ្យកាល់ម៉ែត ក្នុងការលើកស្ទួយ និងអភិវឌ្ឍន៍មន្ទីរពេទ្យ ទទួលបានលទ្ធផលដ៏ល្អត្រចះត្រចង់ ក្លាយជាមន្ទីរពេទ្យឈានមុខក្នុងប្រទេស។ សមិទ្ធផលថ្មីនេះ បានឆ្លុះបញ្ចាំងឲ្យឃើញពីសមត្ថភាពដឹកនាំរបស់សាស្ត្រាចារ្យប្រធានដេប៉ាតឺម៉ង់ តាមរយៈកិច្ចខិតខំប្រឹងប្រែងរបស់ក្រុមគ្រូពេទ្យ ក្រុមការងារថែទាំ នៃមជ្ឈមណ្ឌលព្យាបាលជំងឺបេះដូងទាំងមូល ដែលបានលះបង់ទាំងកម្លាំងកាយ កម្លាំងចិត្ត យកចិត្តទុកដាក់លើការពិនិត្យ ព្យាបាលអ្នកជំងឺ ព្រមទាំងធ្វើនវានុវត្តន៍បច្ចេកទេសវេជ្ជសាស្ត្រថ្មីៗ ដើម្បីធ្វើឲ្យកាន់តែប្រសើរឡើងនូវការផ្តល់សេវាពិនិត្យ ព្យាបាលបែបទំនើប មានគុណភាពខ្ពស់ និងមានប្រសិទ្ធភាពខ្ពស់ ដោយផ្តល់ទំនុកចិត្តកាន់តែខ្ពស់បន្ថែមជូនដល់ប្រជាពលរដ្ឋ។

លោកសាស្ត្រាចារ្យ ឈាង រ៉ា បានថ្លែងអំណរគុណចំពោះក្រុមហ៊ុន យូនីក មេឌីខល ឌីស្រី្ទប្យ៊ូសិន ខូអិលធីឌី (Unique Medical Distribution Co.,Ltd.) ដែលសហការជាមួយក្រុមហ៊ុន មេដត្រូនិក អ៊ិនធើណេសិនណល (Medtronic International) ផ្តល់ជំនួយម៉ាស៊ីនថតឆ្លុះសរសៃឈាមបន្ថែមថ្មីនាពេលនេះ ជាលើកទី ២ មានតម្លៃសរុប ៦០០,០០០USD (ប្រាំមួយរយពាន់ដុល្លារអាមេរិក) ព្រមទាំងបញ្ជូនអ្នកជំនាញមកជួយបង្ហាត់បង្ហាញ បណ្ដុះបណ្ដាល នៅកន្លែងផ្ទាល់ និងគាំទ្រឲ្យគ្រូពេទ្យឯកទេសមន្ទីរពេទ្យទៅសិក្សាបន្ថែមនៅក្រៅប្រទេស ដែលសបញ្ជាក់ឲ្យឃើញនូវទឹកចិត្តចូលរួមជួយអភិវឌ្ឍន៍ វិស័យសុខាភិបាល ស្របតាមគោលនយោបាយរបស់ក្រសួងសុខាភិបាល និងរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាល សម្ដេច តែងតែយកចិត្តទុកដាក់គិតគូរជួយឧបត្ថម្ភគាំទ្រ និងផ្ដល់អាទិភាពដល់វិស័យសុខាភិបាល៕

អត្ថបទ ៖ រស្មី