ការជួសជុល​អ៊ុតកៅស៊ូ​ផ្លូវសហព័ន្ធរុស្ស៊ី​ក្រុមការងារ​នឹងជំរុញឲ្យរួចរាល់​ត្រឹមថ្ងៃទី ៣ វិច្ឆិកា មុនថ្ងៃប្រជុំអាស៊ាន

រដ្ឋបាលរាជធាននីភ្នំពេញ​បានជំរុញការងារជួសជុលគ្រឹះ និងអ៊ុតកៅស៊ូលើកំណាត់ផ្លូវសហពន្ធ័រុស្ស៉ីឲ្យរួចរាល់នៅត្រឹមថ្ងៃទី ៣ ខែវិច្ឆិកាខាងមុខនេះ មុនពេលដែលកម្ពុជារៀបចំកិច្ចប្រជុំកំពូលអាស៊ាន។

បើតាមការបញ្ជាក់របស់ក្រុមជំនាញជួសជុលផ្លូវឲ្យដឹងថា ជានិច្ចកាលលោក ឃួង ស្រេង អភិបាលរាជធានីភ្នំពេញតែងតែណែនាំដល់មន្ត្រីមន្ទីរសាធារណៈការ និងដឹកជញ្ជូនរាជធានីភ្នំពេញឲ្យចុះពិនិត្យផ្លូវជាប់ជាប្រចាំដើម្បីបានឃើញពីការ​ខូច​ខាតផ្លូវមួយចំនួនក្រោយទទួលរងការខូចខាតដោយទឹកភ្លៀងគឺត្រូវជួសជុលកែលម្អរឡើងវិញកុំចាំឲ្យខូចខាតខ្លាំងទើបជួសជុលនោះ។

មន្ត្រីជំនាញរបស់មន្ទីរសាធារណការ និងដឹកជញ្ជូនបានឲ្យដឹងថា៖ កំណាត់មហាវិថីសហពន្ធ័រុស្ស៉ី ដែលត្រូវអ៊ុតកៅស៊ូបេទីមីណឺនេះ មានប្រវែង១១គីឡូម៉ែត្រ និង៦៨ម៉ែត្រ ស្មើនឹង ៣៣ ២៥៦៨ ម៉ែត្រការ៉េ ដោយចាប់ពីស្តុបBKC កែងមហាវិថីព្រះមុន្នីវង្សដល់ស្ពានអាកាសចោមចៅ។

រដ្ឋបាលរាជធានីភ្នំពេញ ក៏ដូចក្រុមការងារក៏បានសុំការយោគយល់អធ្យាស្រយ័ពី បងប្អូនប្រជាពលរដ្ឋយើងដែលបានធ្វើកំណើរលើកំណាត់មហាវិថីសហពន្ធ័រុស្ស៉ី ក្នុងពេលកំពុងមានសកម្មភាពចាក់អ៊ុតកៅស៊ូផ្លូវ ដែលបណ្តាលឲ្យកកស្ទះចរាចរធ្វើឲ្យមានការរំខានខ្លះៗក្នុងការធ្វើដំណើរ។

សកម្មភាពរបស់រដ្ឋបាលរាជធានីភ្នំពេញក្រោយអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន និងការដឹកនាំអនុវត្តផ្ទាល់ពីលោក ឃួង ស្រេង អភិបាលនៃគណៈអភិបាលរាជធានីភ្នំពេញទាំងការកែលំអរហេដ្ឋារចនាសម្ព័ន្ធផ្លូវថ្នល់ ការកែលម្អរសោភ័ណភាពបរិស្ថានដើម្បីលើកកំពស់សម្រស់រាជធានីភ្នំពេញឲ្យកាន់តែស្រស់បំព្រងថែមទៀត ពិសេសឈានឆ្ពោះទៅកាន់ការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធឆ្នាំ២០២២ នាពេលដ៏ខ្លីខាងមុខនេះ នៅរាជធានីភ្នំពេញក៏ដូចជាការរៀបចំការប្រកួត កីឡាស៊ីហ្គេម និងប៉ារ៉ាហ្គេមដែលកម្ពុជាធ្វើជាម្ចាស់ផ្ទះផងដែរ៕

អត្ថបទ៖ ស្រីរ័ត្ន