ម្ចាស់ដីមួយកន្លែងនៅតែបន្តសងរបងរំលោភ​យក​ដី​សាធារណៈ ទោះបីមានការហាមឃាត់ពីអាជ្ញាធរ

បន្ទាប់ពីអាជ្ញាធរបានហាមឃាត់ម្ចាស់សំណង់កាលពីថ្ងៃទី២៧ ខែតុលា ឆ្នាំ២០២២ កន្លងមកនេះ ម្ចាស់សំណង់នៅតែបន្តធ្វើរបងដ៏រឹងមាំរំលោភចូលដីចំណីផ្លូវថ្នល់ជាតិលេខ៣៣ជាផ្លូវសារធារណះរបស់រដ្ឋដែលមានទីតាំងស្ថិតនៅក្នុងភូមិដើមច៌ា ឃុំកំពង់ត្រាចខាងលិច ស្រុកកំពង់ត្រាច ខេត្តកំពត រហូតមកដល់ថ្ងៃទី៣១ ខែតុលា ឆ្នាំ២០២២នេះ។

បើយោងតាមប្រភពពីពលរដ្ឋម្នាក់មិនបញ្ចេញឈ្មោះលួចខ្សឹបប្រាប់បន្តទៀត ទីតាំងធ្វើរបងរំលោភចូលដីចំណីផ្លូវជាតិ​លេខ៣៣ មួយកន្លែងនេះនៅតែបន្តធ្វើរបងរំលោភចូលដីចំណីផ្លូវ បើទោះបីអាជ្ញាធរធ្លាប់បានទៅហាមឃាត់ពីរបីដងមកហើយក្ដី។

បើតាមការបញ្ជាក់ពីលោក ព្រំ គឹមជី មេឃុំកំពង់ត្រាយខាងលិច បានប្រាប់អោយដឹងថា ការធ្វើរបងដ៏រឹងមាំរំលោភចូលដីចំណីផ្លូវសាធារណៈរបស់រដ្ឋមួយកន្លែងនេះ អត់មានច្បាប់ហើយធ្លាប់បានហាមឃាត់ និងធ្វើការណែនាំដល់ម្ចាស់ពីរទៅ​បីដងរួចមកហើយ ស្រាប់តែប៉ុន្មានថ្ងៃនេះឃើញបន្តធ្វើដដែល។

ជុំវិញបញ្ហាខាងលើប្រជាពលរដ្ឋ សូមឱ្យអាជ្ញាធរមូលដ្ឋានស្រុកកំពង់ត្រាច និងខេត្ត គួរចុះពិនិត្យកន្លែងធ្វើសំណង់ដ៏រឹងមាំមួយកន្លែងនេះ ហើយគួរមានចំណាត់ការយ៉ាងណាចំពោះបុគ្គលដែលហ៊ានបន្តធ្វើសំណង់បំពានចូលដីចំណីផ្លូវថ្នល់របស់រដ្ឋនេះផង៕

អត្ថបទ៖ សឹង រ៉ាត់