ព័ត៌មានជាតិ

រត់ ៤ សែន ជំហាន ប្រមូលថវិកាបានជាង ៦ ម៉ឺនដុល្លារ ជូនមន្ទីរពេទ្យកុមារអង្គរ

បានផុស

២ years មុន

នៅ

ថ្ងៃចន្ទ ៣១ តុលា ២០២២

ដោយ

តាមរយៈកម្មវិធីរត់ថ្មើជើងជាមួយ សាយ ៤សែនជំហាន ដើម្បីរៃអង្គាសថវិកាជួយសង្គ្រោះជីវិតកុមារពីជំងឺមហារីកនៅក្នុងមន្ទីរពេទ្យ«កុមារ អង្គរ»ខេត្តសៀមរាប ក្នុងរយៈពេល ៩ថ្ងៃ ដោយគិតត្រឹមថ្ងៃទី ៣០ខែតុលា ប្រមូលថវិកាបានជាង ៦ម៉ឺនដុល្លារអាមេរិក បានប្រគល់ជូនមន្ទីរពេទ្យកុមារអង្គរខេត្តសៀមរាប ម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអូន បឋម (សាយ) ជាតារាចម្រៀងនិងតារាសម្ដែងមួយរូបមានឈ្មោះបោះសំឡេងនៅកម្ពុជា សហការជាមួយសហភាពសហព័ន្ធយុវជនកម្ពុជា បានធ្វើដំណើររត់ថ្មើជើងចម្ងាយ សាយ ៤សែនជំហាន ដើម្បីរៃអង្គាសថវិកាជួយសង្គ្រោះជីវិតកុមារពីជំងឺមហារីកនៅក្នុងមន្ទីរពេទ្យកុមារអង្គរ។ ក្នុងដំណើរនៃការរត់ចម្ងាយរបស់ លោក អូន បឋម ទៅដល់ខេរត្តសៀមរាប ក៏មានការទទួលស្វាគមន៍ពីលោក អ៊ឹង គឹមលាង អភិបាលរងខេត្ត ព្រមទាំងថ្នាក់ដឹកនាំ មន្ទីរ អាជ្ញាធរក្រុង ស្រុក និងសហភាពសហព័ន្ធយុវជនកម្ពុជា ខេត្ត ក្រុង ស្រុក ដើម្បីចូលរួមលើកទឹកចិត្តចំពោះ សាយ និងសហការី ក៏ដូចជាការចូលរួមជាមួយកម្មវិធី« ៤សែនជំហានដើម្បីរៃអង្គាសថវិកាជួយសង្គ្រោះជីវិតកុមារពីជំងឺមហារីកនៅក្នុងមន្ទីរពេទ្យកុមារ អង្គរ» ប្រមូលថវិកា ក្នុងការទ្រទ្រង់នូវសកម្មភាពនៃការព្យាបាលកុមារកម្ពុជា ដោយឥតគិតថ្ងៃ របស់មន្ទីរពេទ្យកុមារ អង្គរ។

ជាមួយគ្នានោះដែរ លោកអភិបាលរងខេត្តក៏បានថ្លែងអំណរគុណចំពោះការលះបង់របស់លោក អូន បឋម ហៅសាយ ដែលបានបង្កើតកម្មវិធីនេះឡើង ដើម្បីជាការក្រើនរំលឹកសតិស្មារតីរបស់របស់ជនរួមជាតិខ្មែរឲ្យមានស្មារតីចេះជួយគ្នា រួមសាមគ្គីគ្នា ក្នុងការទ្រទ្រង់ដល់ធនធានមនុស្ស ពិសេសចំពោះសុខភាពកុមារដែលជាទំពាំងស្នងឫស្សីនៃអនាគតប្រទេសជាតិ។

លោក អ៊ឹង គឹមលាង បានបន្តថា សកម្មភាពរបស់សាយគឺពិតជាទង្វើសប្បុរសធម៌ បង្កប់ទៅដោយអត្ថន័យ ក្ដីមេត្តាដ៏សម្បើមសម្រាប់ជីវិតកុមារនៅកម្ពុជា និងអាចក្លាយជាគំរូសម្រាប់យុវជនកម្ពុជា ដទៃទៀតក្នុងការរួមចំណែកតបស្នងចំពោះប្រទេសជាតិ ទៅតាមលទ្ធភាពរៀងៗខ្លួន។

យ៉ាងណាមិញ កម្មវិធីរត់ជាមួយសាយមានចម្ងាយ ៣០៣គីឡូម៉ែត្រ( ៤សែនជំហាន) ក្នុងរយៈពេល ៩ថ្ងៃ ចាប់ពីថ្ងៃទី២២ ខែតុលា ឆ្នាំ២០២២ ដល់ថ្ងៃទី៣១ ខែតុលា ឆ្នាំ២០២២ ដោយបានចេញដំណើរពី សហភាពសហព័ន្ធយុវជនកម្ពុជា ស្នាក់ការរាជធានីភ្នំពេញ ឆ្ពោះមកកាន់ខេត្តសៀមរាប តាមបណ្ដោយផ្លូវជាតិលេខ៦៕

ដោយ៖ ថារី

Related Topics:លោក អូន បឋម