ព័ត៌មានជាតិ

មួយថ្ងៃអាទិត្យម្សិលមិញ មានគ្រោះថ្នាក់ចរាចរណ៍ចំនួន១០លើក ស្លាប់ចំនួន៧នាក់

បានផុស

៤ years មុន

នៅ

ថ្ងៃចន្ទ ៤ មករា ២០២១

ដោយ

លោកឧត្តមសេនីយ៍ ឆាយ គឹមខឿន អ្នកនាំពាក្យអគ្គស្នងការនគរបាលជាតិបានឲ្យដឹងថា រយៈពេលពេញមួយថ្ងៃម្សិលមិញ គឺនៅថ្ងៃអាទិត្យ ទី០៣ ខែមករា មានករណីគ្រោះថ្នាក់ចរាចរណ៍ចំនួន១០ លើក ក្នុងនោះស្លាប់ចំនួន០៧នាក់ របួសចំនួន១៤នាក់ របួសធ្ងន់ចំនួន១១នាក់ ដែលករណីគ្រោះថ្នាក់ចរាចរណ៍នេះ បានកើតឡើងនៅតាមរាជធានី ខេត្តចំនួន០៨។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែករយៈពេល២៤៨ថ្ងៃ ដោយចាប់ពីថ្ងៃទី០១ ខែឧសភា ដល់ថ្ងៃទី០៣ ខែមករា ឆ្នាំ២០២១ មានករណីគ្រោះថ្នាក់ចរាចរណ៍កើតឡើងចំនួន២០៥៥លើក ធ្វើឲ្យមនុស្សស្លាប់ចំនួន១០៤៦នាក់ របួសចំនួន៣០៤៨នាក់ របួសធ្ងន់ចំនួន១៨៥៨នាក់។

ជាមួយគ្នានេះ ក្នុងរយៈពេល២៤៨ថ្ងៃនេះដែរ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន២៥០៩៤៤គ្រឿង ក្នុងនោះមានម៉ូតូចំនួន១៨៤៧៩០គ្រឿង និងរថយន្តគ្រប់ប្រភេទចំនួន៦៦១៥៤គ្រឿង ក្នុងនោះរថយន្តតូចចំនួន៥៥០១៤គ្រឿង និងរថយន្តធំចំនួន១១១៤០គ្រឿង។

លោកឧត្តមសេនីយ៍ ឆាយ គឹមខឿន បានឲ្យដឹងថា សម្រាប់ថ្ងៃទី០៣ ខែមករានេះដែរ មានយានយន្តល្មើសចំនួន៧៥៦គ្រឿង ត្រូវបានពិនិត្យ និងពិន័យ ក្នុងនោះម៉ូតូចំនួន៥៧៨គ្រឿង និងរថយន្ត១៧៨ ចំនួនគ្រឿង។

ក្នុងចំណោមម៉ូតូល្មើសទាំង៥៧៨គ្រឿងនោះ បើកបរដោយអត់មួកសុវត្ថិភាពចំនួន៥២៤នាក់, បើកបរល្មើសសញ្ញាចំនួន៣០គ្រឿង, បើកបរក្នុងស្ថានភាពស្រវឹងចំនួន០៩នាក់, បើកបរដោយអត់ស្លាកលេខចំនួន០៧គ្រឿង និងបើកបរប្រើទូរស័ព្ទចំនួន០៨ នាក់។

យានយន្តទាំង១៧៨គ្រឿងនោះ មានយានយន្តតូចចំនួន១៤១គ្រឿង និងយានយន្តធំចំនួន៣៧គ្រឿង ហើយក្នុងចំណោមយានយន្តទាំងនោះ មានល្មើសល្បឿនចំនួន១៩ គ្រឿង, អត់មានប័ណ្ណបើកបរចំនួន០៨ នាក់, ល្មើសញ្ញាចំនួន១០គ្រឿង, បើកបរអត់ដាក់ខ្សែក្រវ៉ាត់ចំនួន១០៣ នាក់, លើសចំណុះចំនួន០៧ គ្រឿង, បើកបរក្នុងស្ថានភាពស្រវឹងចំនួន០៤នាក់, អត់ស្លាកលេខចំនួន១៤ គ្រឿង និងបើកបរប្រើទូរសព្ទចំនួន១៣ នាក់៕

អត្ថបទ ៖ កោះកែវ

Related Topics:សរុបរបាយការណ៍