អភិបាលខេត្តកំពង់ចាម ជំរុញ​ក្រុមជាងពន្លឿនការសាងសង់វិមានឯករាជ្យឲ្យរួចរាល់ ខណៈសល់ តែ៧ថ្ងៃទៀតត្រូវសម្ពោធ

ឯកឧត្ដម អ៊ុន ចាន់ដា អភិបាលខេត្តកំពង់ចាម បានជម្រុញដល់ក្រុមជាងឲ្យពន្លឿនការងារសាងសង់វិមានឯករាជ្យខេត្តកំពង់ចាម ដើម្បីរៀបចំសម្ពោធដាក់ឲ្យប្រើប្រាស់ជាផ្លូវការនៅថ្ងៃទី០៩ ខែវិច្ឆិកា ឆ្នាំ២០២២ ខាងមុខនេះ ពីព្រោះយើង នៅសល់ពេលខ្លីត្រឹមតែ៧ថ្ងៃទៀតប៉ុណ្ណោះ ។

ការជំរុញ​នេះ ធ្វើឡើងនាឱកាសអញ្ជើញដឹកនាំមន្ត្រីក្រោមឱវាទ និងក្រុមបច្ចេកទេសចុះពិនិត្យការដ្ឋានសាងសង់វិមានឯករាជ្យខេត្ត ដែលកំពុងដំណើរការសាង់នៅក្នុងភូមិទី៦ សង្កាត់វាលវង់ ក្រុងកំពង់ចាម នៅព្រឹកថ្ងៃទី២ ខែវិច្ឆិកា ឆ្នាំ ២០២២ នេះ ។

សូមបញ្ជាក់ថា វិមានឯករាជ្យខេត្តកំពង់ចាម បានចាប់ដំណើការសាងសង់កាលពីថ្ងៃទី០៦ ខែធ្នូ ឆ្នាំ២០២១ ។ មកដល់ពេលនេះ គម្រោងខាងលើ គឺសម្រេចការងារសាងសង់បានលទ្ធផលស្ទើរតែ ១០០% ហើយនោះ ។

គួរកត់សម្គាល់ដែរថា ការស្ថាបនាវិមានឯករាជ្យ ខេត្តកំពង់ចាម នេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម ធ្លាប់ប្រាប់ឲ្យដឹងថា ការរៀបចំសាងសង់វិមានឯករាជ្យនេះឡើងដើម្បីជាកន្លែងប្រារព្ធពិធីរំលឹកខួបអនុស្សាវរីយ៍បុណ្យឯករាជ្យជាតិ និងជាការរំលេចនូវស្នាដៃជាប្រវត្តិសាស្រ្ត នៃការអបអរសាទរបុណ្យឯករាជ្យជាតិ ក្រោមព្រះរាជបូជនីយកិច្ច ពីសំណាក់ព្រះបរមរតនកោដ្ឋ ដែលបានទាមទារឯករាជ្យពីអាណានិគមបារាំង និងបន្សល់ទុកស្នាដៃជាប្រវត្តិសាស្រ្ត ដល់ប្រជាពលរដ្ឋរបស់យើង និងកូនចៅជំនាន់ក្រោយៗបន្តទៀត ។

តាមការរំពឹងទុក សំណង់វិមានឯករាជ្យមួយនេះ ក៏ជាការចូលរួមចំណែកផងដែរ ក្នុងការលើកកម្ពស់សោភ័ណភាព ក្រុងកំពង់ចាម ដើម្បីទាក់ទាញភ្ញៀវទេសចរជាតិ និងអន្តរជាតិ នៅពេលដែលមកកំសាន្ត នៅខេត្តកំពង់ចាម ជាពិសេស ពួកគាត់អាចមកទស្សនាវិមានឯករាជ្យ ដែលមានលម្អទៅដោយសួនច្បារ និងភ្លើងពណ៏លើកកម្ពស់សោភ័ណភាព ក្នុងក្រុងកំពង់ចាម នឹងសម្រាប់ឈានទៅប្រកួតប្រជែងទីក្រុងស្អាត នាពេលខាងមុខ ផងដែរ ៕

អត្ថបទ៖ ឡេក ចាន់ពេជ្រ